Kúrshim aýylyndaǵy ortalyq saıabaq keshendi jóndeý jumystarynan keıin qaıta ashyldy. Halyqaralyq balalardy qorǵaý kúnimen tuspa-tus kelgen bul shara búldirshinderge baǵaly tartý bolǵandaı.

Jańa saıabaqtyń ishinde oıyn alańqaıy, fýtbol jáne basketbol alańdary, tipti shahmat ústelderi de bar.

Shyǵys óńirine jumys saparymen kelgen Parlament Májilisiniń depýtattary Rınat Zaıtovpen Maqsat Tolyqbaı kúrshimdikterdiń qýanyshyna kýá bolyp, merekesin jańa saıabaqta atap ótip jatqan búldirshinderge jyly lebiz arnady.

– Balalardyń kúlkisi úzilmesin. Olardyń árbir kúni búgingideı shýaqty bolsa eken deımiz. El erteńi jarqyn bolsyn! – dedi Májilis depýtaty Rınat Zaıtov.

Aıta keteıik, saıabaqty jóndeý jumystary ótken jyldyń sońynda aıaqtalǵan. Tıisti qujattama rettelgennen keıin saıabaq paıdalanýǵa berildi.

Kóktemde baq ishine tal egildi. Jóndeý jumystary aıasynda gúlzarlar daıyndalǵan bolatyn, búginge deıin kógaldandyrý jumystary tolyq júrgizildi.

Saıabaq ishindegi joldar jóndelip, jaryq tartylǵan. Qorshaý da jańartyldy. Balalar men jasóspirimderge qajetti jabdyqtar tutas bar ekenin aıttyq. Sonymen qatar saıabaq ishinde buqaralyq ish-sharalardy ótkizýge arnalǵan arnaıy oryn bar. Balalar merekesi búgin sol jerde atap ótildi.

Saltanatty túrde qyzyl lentany qıǵan mádenıet salasynyń ardageri Shákerhan Toıbaev balalardy jáne jergilikti halyqty quttyqtaı kele atqarylǵan jumysqa joǵary baǵa berdi.

– Balalardyń ýaqytyn tıimdi ótkizýine, jastardyń sportpen shuǵyldanyp shyńdalýyna, úlkenderdiń serýendep seıil qurýyna da yńǵaıly oryn boldy. Bul endi aýyldyqtardyń súıikti demalys ornyna aınalady, – dedi aýyl aqsaqaly.