قوعامدا ٷلكەن تالقىعا تٷسكەن اتىراۋداعى وتباسىنىڭ جوعالۋىنا قاتىستى قىلمىستىق ٸستە اقبايان مۇقانعاليەۆانىڭ بۇل قىلمىسقا قاتىسى جوق ەكەنٸ انىقتالدى. وسىعان بايلانىستى وعان قاتىستى قوزعالعان قىلمىستىق قۋدالاۋ رەسمي تٷردە توقتاتىلدى, دەپ dalanews.kz تٸلشٸسٸ Kursiv Media-عا سٸلتەمە جاساپ حابارلايدى.
تەرگەۋ مەلٸمەتٸنشە, كٷدٸكتٸ رەتٸندە ۇستالعان سۇلتان سەرسەمەليەۆ الماتى قالاسىنا جەتكٸزٸلگەننەن كەيٸن جاساعان ەرەكەتٸن بٸردەن مويىنداعان. ال اقبايان مۇقانعاليەۆا تەرگەۋ بارىسىندا قويىلعان سۇراقتارعا تولىق جاۋاپ بەرە الماعان. قۇزىرلى ورگاندار ونى ەلگە جەتكٸزگەن سوڭ ارنايى مەديتسينالىق مەكەمەگە ورنالاستىرۋ تۋرالى شەشٸم قابىلداعان.
اتىراۋ وبلىسى پوليتسييا دەپارتامەنتٸ تەرگەۋ باسقارماسىنىڭ اسا ماڭىزدى ٸستەر جٶنٸندەگٸ اعا تەرگەۋشٸسٸ تەمٸرحان قاجىمۇراتوۆتىڭ ايتۋىنشا, اقبايان مۇقانعاليەۆانى باستاپقىدا كٷدٸكتٸ دەپ تانۋ پروتسەستٸك قاجەتتٸلٸكتەن تۋعان.
"دەپورتاتسييا ارقىلى جەتكٸزٸلگەن سوڭ, تولىق ساراپتاما قورىتىندىسى شىقپايىنشا, ونى مەديتسينالىق ۇيىمعا ورنالاستىرۋ تۋرالى شەشٸم قابىلداندى. سول سەبەپتٸ ول كٷدٸكتٸ رەتٸندە تانىلدى. مۇنداعى نەگٸزگٸ ماقسات – ونىڭ قىلمىسقا قاتىسى بار-جوعىن انىقتاۋ ەدٸ. سٶيلەسۋ بارىسىندا پسيحيكالىق اۋىتقۋشىلىق بەلگٸلەرٸ بايقالدى. تەرگەۋ ەرەكەتتەرٸن تولىق جٷرگٸزۋگە مٷمكٸندٸك بولمادى. ول سۇراقتارعا ناقتى جاۋاپ بەرە المادى, جاۋاپ بەرگەن كٷننٸڭ ٶزٸندە اۋىتقۋشىلىقپەن جاۋاپ بەردٸ. سوندىقتان اقبايان مۇقانعاليەۆاعا قاتىستى قىلمىستىق قۋدالاۋ توقتاتىلدى", – دەدٸ تەرگەۋشٸ.
وسىلايشا, تەرگەۋ قورىتىندىسى بويىنشا اقبايان مۇقانعاليەۆانىڭ اتالعان اۋىر قىلمىسقا قاتىسى دەلەلدەنبەگەن. ال ٸس بويىنشا نەگٸزگٸ ايىپ سۇلتان سەرسەمەليەۆكە قاتىستى قارالىپ جاتىر.
بۇعان دەيٸن قاراباليندەر ەۋلەتٸنٸڭ تۋىسى فاريزات كەنجەعاليەۆا قايعىلى وقيعادان كەيٸن بالالاردىڭ تاعدىرىنا قاتىستى پٸكٸر بٸلدٸرگەن ەدٸ.
