Qoǵamda úlken talqyǵa túsken Atyraýdaǵy otbasynyń joǵalýyna qatysty qylmystyq iste Aqbaian Muqanǵalievanyń bul qylmysqa qatysy joq ekeni anyqtaldy. Osyǵan bailanysty oǵan qatysty qozǵalǵan qylmystyq qýdalaý resmi túrde toqtatyldy, dep dalanews.kz tilshisi Kursiv Media-ǵa silteme jasap habarlaidy.
Tergeý málimetinshe, kúdikti retinde ustalǵan Sultan Sársemáliev Almaty qalasyna jetkizilgennen keiin jasaǵan áreketin birden moiyndaǵan. Al Aqbaian Muqanǵalieva tergeý barysynda qoiylǵan suraqtarǵa tolyq jaýap bere almaǵan. Quzyrly organdar ony elge jetkizgen soń arnaiy meditsinalyq mekemege ornalastyrý týraly sheshim qabyldaǵan.
Atyraý oblysy politsiia departamenti tergeý basqarmasynyń asa mańyzdy ister jónindegi aǵa tergeýshisi Temirhan Qajymuratovtyń aitýynsha, Aqbaian Muqanǵalievany bastapqyda kúdikti dep taný protsestik qajettilikten týǵan.
"Deportatsiia arqyly jetkizilgen soń, tolyq saraptama qorytyndysy shyqpaiynsha, ony meditsinalyq uiymǵa ornalastyrý týraly sheshim qabyldandy. Sol sebepti ol kúdikti retinde tanyldy. Mundaǵy negizgi maqsat – onyń qylmysqa qatysy bar-joǵyn anyqtaý edi. Sóilesý barysynda psihikalyq aýytqýshylyq belgileri baiqaldy. Tergeý áreketterin tolyq júrgizýge múmkindik bolmady. Ol suraqtarǵa naqty jaýap bere almady, jaýap bergen kúnniń ózinde aýytqýshylyqpen jaýap berdi. Sondyqtan Aqbaian Muqanǵalievaǵa qatysty qylmystyq qýdalaý toqtatyldy", – dedi tergeýshi.
Osylaisha, tergeý qorytyndysy boiynsha Aqbaian Muqanǵalievanyń atalǵan aýyr qylmysqa qatysy dáleldenbegen. Al is boiynsha negizgi aiyp Sultan Sársemálievke qatysty qaralyp jatyr.
Buǵan deiin Qarabalinder áýletiniń týysy Farizat Kenjeǵalieva qaiǵyly oqiǵadan keiin balalardyń taǵdyryna qatysty pikir bildirgen edi.
