24 جىلعا باس بوستاندىعىنان ايىرىلعان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ قارىنداسى ارۋجان بيشىمبايەۆا الەۋمەتتىك جەلىدە اعاسىنىڭ ىسىنە قاتىستى ءوز كوزقاراسىن جاريالادى. ول اعاسىنا تاعىلعان ايىپتاردىڭ كەيبىر تۇستارى دالەلسىز ەكەنىن جانە قوعامدىق پىكىردىڭ شىندىقتان الشاقتاپ بارا جاتقانىن ايتتى، دەپ حابارلايدى Dalanews.kz.
ارۋجان بيشىمبايەۆا سوت ۇكىمىندەگى «ازاپتاۋ» تۋرالى باپتىڭ نەگىزسىز ەكەنىنە سەنىمدى. ونىڭ ايتۋىنشا، مارقۇم سالتانات نۇكەنوۆانىڭ دەنەسىندە اۋىر جاراقاتتار تىركەلمەگەن، ىشكى اعزالارى مەن سۇيەكتەرى دە ءبۇتىن بولعان. بيشىمبايەۆا دەنەدەگى كوگەرگەن جەرلەردى «تۇنگى توبەلەستىڭ سالدارى» دەپ باعالاپ، «شىن مانىندە، ازاپتاۋ بەلگىلەرى جوق» ەكەنىن العا تارتتى.
«ونى ەشكىم ۇستاپ وتىرعان جوق، ەشكىم ازاپتاعان دا جوق. قالاسا كەز كەلگەن ۋاقىتتا كەتۋگە مۇمكىندىگى بولدى، ءبىراق باسقا تاڭداۋ جاسادى جانە قاتەلەستى»، – دەيدى ارۋجان بيشىمبايەۆا.
سونىمەن قاتار ول الەۋمەتتىك جەلىدەگى پىكىرلەرگە دە نارازىلىعىن ءبىلدىردى. اسىرەسە، اعاسىن مانياكقا تەڭەپ، سەريالىق قىلمىسكەرلەرمەن سالىستىرعانداردى «جاعدايدى دۇرىس بىلمەيتىن، باسقا بەتتەردى وقيتىن، ەموسياعا بەرىلگەن ادامدار مەن ورىنسىز فاناتتار» دەپ اتادى.
ونىڭ پىكىرىنشە، بيشىمبايەۆتىڭ ءىسى بويىنشا شىعارىلعان جازا تىم قاتال. سونىمەن قاتار، مارقۇم سالتانات نۇكەنوۆانىڭ وتباسىنىڭ قازىرگى ارەكەتىن «قارجى ماقساتىنداعى قۋدالاۋدى جالعاستىرۋ» دەپ ەسەپتەيتىنىن ءبىلدىردى.
بۇدان بولەك، ارۋجان بيشىمبايەۆا اعاسىنىڭ بۇرىنعى ايەلى نازىم قاھارمانعا قاتىستى دا پىكىر ءبىلدىردى. ونىڭ ايتۋىنشا، نازىم ەشقاشان اعاسىنىڭ تاراپىنان زورلىق-زومبىلىق تۋرالى شاعىم ايتپاعان. «جاقسى ايەلدەن، اسىرەسە ءۇش بالانىڭ اناسىنان ەشكىم اجىراسپايدى»، – دەدى ول.
ەسكە سالساق، بۇرىنعى مينيستر قۋاندىق بيشىمبايەۆ 2024 جىلى مامىردا ايەلى سالتانات نۇكەنوۆانى ولتىرگەنى ءۇشىن 24 جىلعا سوتتالعان بولاتىن. سوت ماتەريالدارى بويىنشا، بيشىمبايەۆ جۇبايىن مەيرامحانادا بىرنەشە ساعات بويى ۇرىپ-سوعىپ، كەيىن جابىرلەنۋشىگە ەشقانداي كومەك كورسەتپەي، بولعان جايتتى جاسىرۋعا تىرىسقان. سوت ونى «ەرەكشە قاتىگەزدىكپەن كىسى ءولتىرۋ جانە جۇيەلى تۇردە ازاپتاۋ» باپتارى بويىنشا كىنالى دەپ تاپتى. بۇل ءىس ەل ىشىندە كەڭىنەن تالقىلانىپ، سوت پروسەسى القابيلەردىڭ قاتىسۋىمەن ءوتىپ، تىكەلەي ەفيردە كورسەتىلگەن ەدى.
