الماتىدا جاڭا اشىلعان مۋزەيدىڭ العاشقى ءۇش كۇنىندە 14 مىڭنان استام ادام كەلگەن. قالا تۇرعىندارى مەن قوناقتارىنىڭ ونەرگە دەگەن قىزىعۋشىلىعى جاقسى بولعانىمەن، وكىنىشكە قاراي، ءۆانداليزمنىڭ جيىرمادان استام دەرەگى تىركەلدى. بەلگىسىز ادامدار كەيبىر ەكسپوناتتارعا زيان كەلتىرىپ، قابىرعالاردى بۇلدىرگەن، دەپ حابارلايدى Dalanews.kz.
"ءاربىر ەكسپونات – قازاقستاندىقتاردىڭ ورتاق مادەني ءارى تاريحي مۇراسى، ول كەلەر ۇرپاققا سول قالپىندا جەتۋى ءتيىس. رەستاۆراتورلارىمىز قالىپقا كەلتىرۋ جۇمىستارىنا كىرىسىپ كەتتى، ءبىز ەكسپوناتتار مەن عيماراتتىڭ باستاپقى كەلبەتىن قايتارۋ ءۇشىن بار كۇشىمىزدى سالامىز"، - دەدى مۋزەي ديرەكتورى تاتيانا حودجايەۆا.
مۋزەي اكىمشىلىگى كەلۋشىلەرگە مۋزەي ەرەجەلەرىن قاتاڭ ساقتاۋدى ەسكەرتتى: ەكسپوناتتارعا قول تيگىزبەۋ، ارنايى بەلگىلەنگەن جەرلەردە عانا ءتۇسىرىلىم جاساۋ، كەي زالداردا فوتو-ۆيدەو تۇسىرۋگە تىيىم سالىنعانىن ەستە ۇستاۋ قاجەت. جارقىل قولدانۋ، كوممەرسيالىق ماقساتتا ءتۇسىرۋ جانە ارنايى قۇرال-جابدىقتارمەن (شتاتيۆ جانە ت.ب.) جۇمىس ىستەۋگە رۇقسات جوق. ەرەجە بۇزۋشىلار اكىمشىلىك تە، قىلمىستىق تا جاۋاپكەرشىلىككە تارتىلۋى مۇمكىن.
ەسكە سالايىق، بۇل الماتىداعى ءبىرىنشى جاعداي ەمەس. بۇعان دەيىن جاڭارتىلىپ جاتقان سايران كولىنىڭ ماڭايى قوقىسقا تولىپ، رەسمي اشىلماي جاتىپ لاستانعان ەدى. دەمالۋعا كەلگەندەر ارتتارىنان قوقىستى جيناماي كەتكەن.
قوعام بەلسەندىلەرى مەن قالا تۇرعىندارى مۇنداي ارەكەتتەردى جاۋاپسىزدىق پەن مادەنيەتسىزدىكتىڭ كورىنىسى دەپ باعالاپ وتىر.
جۋرناليست سىرىم يتقۇلوۆ تا وسى جاعدايعا قاتىستى پىكىر بىلدىرگەن بولاتىن.
«وسىنداي ادامداردىڭ بيلىكتەن بىردەڭە تالاپ ەتۋگە ەشقانداي قۇقىعى جوق دەپ ويلايمىن. بارلىق ماسەلەگە ءوزىمىز كىنالىمىز، ءبارىن ءوز قولىمىزبەن جاساپ جاتىرمىز»، – دەدى ول.
الەۋمەتتىك جەلى قولدانۋشىلارى مۇنداي كەلەڭسىزدىكتەردى بولدىرماۋ ءۇشىن بەينەكامەرا ورناتىپ، ءتارتىپ بۇزعاندارعا ايىپپۇل سالۋدى ۇسىنۋدا.
مامانداردىڭ ايتۋىنشا، قوعامنىڭ مادەني ورىندارعا جانە ورتاق كەڭىستىككە دەگەن كوزقاراسى وزگەرمەيىنشە، قالاداعى جاڭا جوبالاردىڭ قۇندىلىعىن ساقتاۋ قيىن.
