Almatyda jańa ashylǵan mýzeidiń alǵashqy úsh kúninde 14 myńnan astam adam kelgen. Qala turǵyndary men qonaqtarynyń ónerge degen qyzyǵýshylyǵy jaqsy bolǵanymen, ókinishke qarai, vandalizmniń jiyrmadan astam deregi tirkeldi. Belgisiz adamdar keibir eksponattarǵa ziian keltirip, qabyrǵalardy búldirgen, dep habarlaidy Dalanews.kz.
"Árbir eksponat – qazaqstandyqtardyń ortaq mádeni ári tarihi murasy, ol keler urpaqqa sol qalpynda jetýi tiis. Restavratorlarymyz qalypqa keltirý jumystaryna kirisip ketti, biz eksponattar men ǵimarattyń bastapqy kelbetin qaitarý úshin bar kúshimizdi salamyz", - dedi mýzei direktory Tatiana Hodjaeva.
Mýzei ákimshiligi kelýshilerge mýzei erejelerin qatań saqtaýdy eskertti: eksponattarǵa qol tigizbeý, arnaiy belgilengen jerlerde ǵana túsirilim jasaý, kei zaldarda foto-video túsirýge tyiym salynǵanyn este ustaý qajet. Jarqyl qoldaný, kommertsiialyq maqsatta túsirý jáne arnaiy qural-jabdyqtarmen (shtativ jáne t.b.) jumys isteýge ruqsat joq. Ereje buzýshylar ákimshilik te, qylmystyq ta jaýapkershilikke tartylýy múmkin.
Eske salaiyq, bul Almatydaǵy birinshi jaǵdai emes. Buǵan deiin jańartylyp jatqan Sairan kóliniń mańaiy qoqysqa tolyp, resmi ashylmai jatyp lastanǵan edi. Demalýǵa kelgender arttarynan qoqysty jinamai ketken.
Qoǵam belsendileri men qala turǵyndary mundai áreketterdi jaýapsyzdyq pen mádenietsizdiktiń kórinisi dep baǵalap otyr.
Jýrnalist Syrym Itqulov ta osy jaǵdaiǵa qatysty pikir bildirgen bolatyn.
«Osyndai adamdardyń bilikten birdeńe talap etýge eshqandai quqyǵy joq dep oilaimyn. Barlyq máselege ózimiz kinálimiz, bárin óz qolymyzben jasap jatyrmyz», – dedi ol.
Áleýmettik jeli qoldanýshylary mundai keleńsizdikterdi boldyrmaý úshin beinekamera ornatyp, tártip buzǵandarǵa aiyppul salýdy usynýda.
Mamandardyń aitýynsha, qoǵamnyń mádeni oryndarǵa jáne ortaq keńistikke degen kózqarasy ózgermeiinshe, qaladaǵy jańa jobalardyń qundylyǵyn saqtaý qiyn.
