مەملەكەت بانكتەرگە تىزەسىن قاتتىراق باتىرا باستاعاندىقتان، ەلىمىزدەگى بىرنەشە بانك قوجايىندارى بۇرىنعى باسەكەلەستىك پەن الاۋىزدىقتارىن ۇمىتىپ، بىرلەسىپ قۋاتتى لوببي قۇرۋ جونىندە اقىلداسا باستادى. ولاردىڭ ويىنشا، سوڭعى ەكى جىلدا مەملەكەت جەكەمەنشىك بانكتەرگە كوپ ءتيىسىپ، مۇمكىندىكتەرىن دە، دامۋ پەرسپەكتيۆالارىن دا شەكتەي باستاعان. بۇل تۋرالى DALA INSIDE ارناسى جازدى.
"بانكتەرگە سالىناتىن كورپوراتيۆتى تابىس سالىعى كەلەسى جىلدان باستاپ 20 پايىزدان 25 پايىزعا كوتەرىلەدى. ونىمەن قاتار، جەكەمەنشىك تۇلعالارعا كەپىلسىز كرەديت بەرۋ بويىنشا كوپتەگەن شەكتەۋ ەنگىزىلدى. ەندى مەملەكەت جەكە تۇلعالاردىڭ دەپوزيتتەرىن دە قاراپ وتىرماق. اتالعان ءۇش قىسىم بانكتەردى تازا تابىسىنان ايىراتىنى انىق. بانك قوجايىندارى وسىعان الاڭداپ وتىر"، - دەيدى DALA INSIDE دەرەككوزى.
بۇعان دەيىن بانكتەردىڭ نەگىزگى "ۆىرۋچكاسى" جەكە تۇلعالارعا كەپىلسىز نەسيە بەرۋدەن كەلەتىن. بيىلعى جىلدىڭ 7 ايىندا ەلىمىزدەگى بانكتەردىڭ تازا تابىسى 1،6 تريلليون تەڭگەنى قۇرادى. ەندى جاڭا شەكتەۋ نورمالارى ەنگىزىلسە، كرەديت الاتىن جەكە تۇلعالاردىڭ سانى كۇرت ازايادى. سونىمەن بىرگە، كولەڭكەلى، بەيرەسمي تابىسى بار ادامدار اقشاسىن دەپوزيتتەن شەشىپ، قولما-قول تۇرىندە ۇيىندە ساقتايدى دەگەن بولجامدار بار. سەبەبى سالىق ورگاندارى كەز-كەلگەن جەكە تۇلعانىڭ دەپوزيتتەگى قارجىسىنا قاتىستى سۇراق قويۋ مۇمكىندىگىنە يە بولماق. ءدال وسى تۇستا تابىسى ازايعان بانكتەردىڭ سالىق جۇكتەمەسى دە ارتىپ، ودان قالاتىن تازا تابىس مۇلدە ماردىمسىز بولۋ ءقاۋپى بار.
"بانكتەر سەزىپ وتىر. 2025 ولاردىڭ مول تابىس الاتىن سوڭعى جىلى. 2026 جىلى مۇنداي مۇمكىندىك مۇلدە بولمايدى. سوندىقتان، ءوز قۇقىقتارى مەن بيزنەستەرىن قورعاۋ ءۇشىن بىرىگىپ، لوببيلەرىن كۇشەيتپەك. وسى ورايدا، بانك اكسيونەرلەرى قازاقستان قارجىگەرلەر قاۋىمداستىعىنىڭ ىقپالىن ارتتىرۋدى كوزدەگەن. قاۋىمداستىققا ۇكىمەتپەن قاتاڭ سويلەسە الاتىن بەدەلى بار، بەلگىلى بانكيرلەردىڭ ءبىرىن باسشى قىلۋ يدەياسى دا تالقىلانعان"، - دەپ ءبولىستى دەرەككوز.
بانكيرلەر ۇكىمەتكە قىزىل سىزىقتار قويۋعا دايىن. ياعني ءقازىر قابىلدانعان نورمالاردان باسقا بولاشاقتا بانكتەردىڭ تابىسىنا اۋىز سالاتىن، ءومىرىن قيىنداتاتىن جاڭا شەكتەۋلەر ەنگىزىلمەۋگە ءتيىس.
