Memleket bankterge tizesin qattyraq batyra bastaǵandyqtan, elimizdegi birneshe bank qojaiyndary burynǵy básekelestik pen alaýyzdyqtaryn umytyp, birlesip qýatty lobbi qurý jóninde aqyldasa bastady. Olardyń oiynsha, sońǵy eki jylda memleket jekemenshik bankterge kóp tiisip, múmkindikterin de, damý perspektivalaryn da shektei bastaǵan. Bul týraly DALA INSIDE arnasy jazdy.
"Bankterge salynatyn korporativti tabys salyǵy kelesi jyldan bastap 20 paiyzdan 25 paiyzǵa kóteriledi. Onymen qatar, jekemenshik tulǵalarǵa kepilsiz kredit berý boiynsha kóptegen shekteý engizildi. Endi memleket jeke tulǵalardyń depozitterin de qarap otyrmaq. Atalǵan úsh qysym bankterdi taza tabysynan aiyratyny anyq. Bank qojaiyndary osyǵan alańdap otyr", - deidi DALA INSIDE derekkózi.
Buǵan deiin bankterdiń negizgi "vyrýchkasy" jeke tulǵalarǵa kepilsiz nesie berýden keletin. Biylǵy jyldyń 7 aiynda elimizdegi bankterdiń taza tabysy 1,6 trillion teńgeni qurady. Endi jańa shekteý normalary engizilse, kredit alatyn jeke tulǵalardyń sany kúrt azaiady. Sonymen birge, kóleńkeli, beiresmi tabysy bar adamdar aqshasyn depozitten sheship, qolma-qol túrinde úiinde saqtaidy degen boljamdar bar. Sebebi salyq organdary kez-kelgen jeke tulǵanyń depozittegi qarjysyna qatysty suraq qoiý múmkindigine ie bolmaq. Dál osy tusta tabysy azaiǵan bankterdiń salyq júktemesi de artyp, odan qalatyn taza tabys múlde mardymsyz bolý qaýpi bar.
"Bankter sezip otyr. 2025 olardyń mol tabys alatyn sońǵy jyly. 2026 jyly mundai múmkindik múlde bolmaidy. Sondyqtan, óz quqyqtary men biznesterin qorǵaý úshin birigip, lobbilerin kúsheitpek. Osy oraida, bank aktsionerleri Qazaqstan qarjygerler qaýymdastyǵynyń yqpalyn arttyrýdy kózdegen. Qaýymdastyqqa Úkimetpen qatań sóilese alatyn bedeli bar, belgili bankirlerdiń birin basshy qylý ideiasy da talqylanǵan", - dep bólisti derekkóz.
Bankirler Úkimetke qyzyl syzyqtar qoiýǵa daiyn. Iaǵni qazir qabyldanǵan normalardan basqa bolashaqta bankterdiń tabysyna aýyz salatyn, ómirin qiyndatatyn jańa shekteýler engizilmeýge tiis.
