Qazaqstanda ótken jylytý maýsymy iri apattarsyz aiaqtalǵanymen, Úkimet kelesi kezeńge daiyndyqty kúsheitýdi talap etti, dep habarlaidy dalanews.kz.
Úkimet otyrysynda Premer-ministr Oljas Bektenov energetika jáne turǵyn úi-kommýnaldyq sharýashylyq salasyna qatysty keń kólemdi baiandama jasap, óńirlerge naqty tapsyrmalar berdi.
«Ótken jylý berý maýsymy asa bir qaýipti apattyq jaǵdailarsyz aiaqtaldy. Elektr stantsiialaryndaǵy tehnologiialyq buzýshylyqtar sany byltyrǵy jylmen salystyrǵanda 15%-ǵa azaidy. 17 myń MVt elektr energiiasy óndirilip, tarihi eń joǵary deńgeige qol jetkizildi. Bul – ótken jylytý kezeńimen salystyrǵanda 7%-ǵa joǵary», – dedi premer-ministr.
Onyń aitýynsha, bul nátijeler qys mezgiline daiyndyqtyń sapaly júrgizilgenin kórsetedi. Sonymen qatar memleket basshysynyń tapsyrmasy aiasynda energetikalyq infraqurylymdy jańǵyrtý jumystary jalǵasyp jatyr.
«Tarifti investitsiiaǵa aiyrbastaý» baǵdarlamasy aiasynda biyl elektr stantsiialaryn jóndeý jáne jańǵyrtý jumystaryna shamamen 384 mlrd teńge qaralǵan, bul ótken jylmen salystyrǵanda 9%-ǵa kóp. Ulttyq joba aiasynda tek biyldyń ózinde 130 shaqyrym jylý jelileri men 10,5 myń shaqyrym elektr jelilerin jańǵyrtý josparlanǵan», – dedi ol.
Premer-ministrdiń sózinshe, bul sharalar jelilerdiń tozýyn 48% jáne 62%-ǵa deiin tómendetýge múmkindik beredi.
Sonymen birge Úkimet rezervinen óńirlerdi qoldaýǵa qomaqty qarajat bólingen.
«Búginde Úkimet rezervinen 25 mlrd teńgeden astam qarjy bólý týraly sheshim maquldandy. Bul qarajat Jetisý, Abai, Aqmola jáne Shyǵys Qazaqstan oblystarynda jylý kózderin jóndeýge jáne salýǵa, sondai-aq tórt óńirde 30 shaqyrymǵa jýyq jylý jelilerin jańartýǵa baǵyttaldy», – dedi Bektenov.
Alaida Úkimet basshysy keibir óńirlerde jumystyń baiaý júrip jatqanyn synǵa aldy.
«Qazirdiń ózinde keibir óńirlerde jumystardyń sozylyp ketý qaýpi týyndap otyr. Eger kúzde energiia nysandarynyń daiyndyq pasporttary alynbasa, onda óńir ákimderi tikelei jaýap beredi», – dedi premer-ministr.
Osyǵan bailanysty ol naqty ári qatań tapsyrmalar júktedi. Birinshi kezekte ákimdikter eki apta ishinde barlyq konkýrstyq rásimderdi aiaqtap, jóndeý jumystaryna kirisýi tiis.
«Eshqandai basy artyq biýrokratiia bolmaýy kerek. Jylýmen qamtamasyz etý nysandaryn jóndeý jumystaryn tamyz aiynyń sońynan keshiktirmei aiaqtaý qajet», – dedi ol.
Sonymen qatar bilim berý jáne densaýlyq saqtaý nysandary 1 qyrkúiekke deiin tolyq daiyn bolýy tiis.
Soltústik, ortalyq jáne shyǵys óńirlerde barlyq infraqurylym 15 qyrkúiekke deiin, al qalǵan óńirlerde 15 qazanǵa deiin tolyq daiyn bolýy kerek.
Premer-ministr ákimderge nysandardy jeke baqylaýǵa alýdy tapsyrdy.
«Ákimder jylý nysandaryna turaqty túrde baryp, jaǵdaidy jeke baqylaýda ustaýy qajet», – dedi ol.
Ekinshi tapsyrma «KEGOC» kompaniiasyna qatysty boldy. Energetika ministrligimen birlesip, 25 mamyrǵa deiin ulttyq mańyzy bar stantsiialardyń jumys rejimderin bekitý qajet.
Sondai-aq jóndeý jumystarynyń kólemin qysqartýǵa qatań tyiym salyndy.
Úshinshi baǵyt – otyn qory. Energetika jáne Kólik ministrlikteri ákimdiktermen birge 1 qyrkúiekke deiin jylý kózderi men temirjol tuiyqtarynda qajetti otyn qoryn aldyn ala jinaqtaýy tiis.
Premer-ministr barlyq jumystar belgilengen merzimde ári tolyq kólemde oryndalýy kerektigin qatań eskertti.
Osylaisha, Úkimet aldaǵy jylytý maýsymyna daiyndyqty kúsheitip, óńirlerge jaýapkershilikti tikelei júktep otyr.
