Qazaqstan fýtbol federatsiiasy (QFF) burynǵy qyzmetkeri Qambar Omarovpen aradaǵy eńbek daýyna qatysty sotta jeńilip qaldy. Sot sheshimi boiynsha federatsiia oǵan jumys istemegen kezeńi úshin jalaqysyn tóleýge mindetteldi. Bul soma shamamen 50 million teńgeni quraidy. Bul týraly jýrnalist Mihail Kozachkov jazdy, dep habarlaidy dalanews.kz.
Jýrnalistiń jazýynsha, Astana sottarynda federatsiianyń burynǵy bas aýditory Qambar Omarov pen onyń eks-jumys berýshisi arasyndaǵy daý aiaqtalǵan. Omarov QFF-da 2025 jyldyń qańtarynan bastap jumys istegen. Onyń ai saiynǵy jalaqysy shamamen 2,5 million teńge bolǵan.
2026 jyldyń sáýirinde oǵan shtat qysqarýyna bailanysty eńbek sharty buzylatyny eskertilip, mamyr aiynda jumystan bosatylǵan. Buǵan qarsylyq bildirmegen burynǵy aýditor kelisimshartta kórsetilgen ótemaqyny talap etken.
Másele mynada: Omarov bir jyl jumys istegennen keiin qosymsha kelisimge qol qoiǵan. Qujat boiynsha taraptardyń yntymaqtastyǵy 2028 jyldyń qańtaryna deiin uzartylǵan. Sondai-aq jumys berýshiniń bastamasymen eńbek sharty buzylǵan jaǵdaida qyzmetkerge jumys istemegen qalǵan ailary úshin tolyq jalaqy tólenýi tiis bolǵan.
Osyǵan súiengen Omarov sotqa shaǵym túsirip, qalǵan 20 aidyń jalaqysyn, iaǵni shamamen 50 million teńge óndirýdi suraǵan. Budan bólek, osy kezeńge tiesili 20 million teńgege jýyq syiaqyny da talap etken.
Alaida fýtbol federatsiiasy talap aryzdy moiyndamaǵan. QFF ókilderiniń aitýynsha, qosymsha kelisim federatsiiada tirkelmegen jáne memlekettik enbek.kz aqparattyq júiesinde de joq. Sonymen qatar ótemaqy tóleý máselesi basshylyqpen kelisilmegen.
Degenmen sotta qujattyń zańdy túrde jasalǵanyn rastaǵan mańyzdy kýáger bolǵan. Ol – QFF-nyń burynǵy bas hatshysy David Loriia. Aita keteiik, qosymsha kelisimge federatsiia atynan qol qoiǵan da osy Loriia bolǵan.
Nátijesinde sot Omarovtyń talabyn ishinara qanaǵattandyrdy. Federatsiia burynǵy qyzmetkerine jumys istemegen kezeńi úshin tiesili jalaqyny tóleýge mindetteldi. Al syiaqy tóleý týraly talap qanaǵattandyrylmady. Sot mundai tólemdi yntalandyrý sipatyndaǵy qosymsha aqy dep tanyǵan.
Mihail Kozachkovtyń málimetinshe, sot sheshimi jaqynda zańdy kúshine engen. Sonymen qatar fýtbol federatsiiasy Omarovpen jasalǵan qosymsha kelisimdi jaramsyz dep taný týraly da talap qoiǵan. Alaida bul talap ta qanaǵattandyrylmaǵan.
