Burynǵy ulttyq ekonomika ministri Qýandyq Bishimbaevtyń eks-jubaiy Nazym Qaharman burynǵy kúieýiniń týystarymen taǵy da sottasyp jatqanyn málimdedi. Onyń aitýynsha, bul joly ózinen 22 million teńge óndirip alý talap etilgen. Bul – oǵan qarsy berilgen besinshi talap aryz, dep dalanews.kz tilshisi Ulysmedia.kz basylymyna silteme jasap habarlaidy.
Nazym Qaharman áleýmettik jelidegi málimdemesinde jańa sot daýy Astanadaǵy «Haivill» turǵyn úi kesheninde ornalasqan kommertsiialyq nysanǵa qatysty ekenin túsindirdi.
Onyń aitýynsha, Qýandyq Bishimbaevpen nekede bolǵan kezde atalǵan nysandy ózi basqaryp, jalǵa alýshylardy taýyp, jaldaý aqysyn jinaýmen ainalysqan. Ajyrasqannan keiin nysandy basqarý Baqytjan Baijanovqa ótken. Keiin Qaharman taǵy on ai boiy ony basqarǵanyn aitady.
Nazym Qaharmannyń sózinshe, kommertsiialyq nysandy jalǵa berýden túsken qarajat balalarynyń qajettilikterine jumsalǵan. Ol aqshanyń mektepke, meditsinalyq qyzmetterge, repetitorlarǵa, demalysqa jáne balalardy kútip-baǵýǵa ketkenin jetkizdi.
"Barlyq túsken qarajat mektepke, alimentke, densaýlyqqa, demalysqa, dárigerler men repetitorlarǵa jumsaldy, iaǵni munyń bári aliment boiynsha ózara esep aiyrysý boldy. Barlyq shyǵyn jazylyp, kórsetildi. Ekinshi tarap bul týraly habardar boldy, bárin bildi jáne kelisim berdi", – dedi ol.
Qaharman bul qarajatqa qatysty burynǵy kúieýiniń týystarymen kelisim bolǵanyn alǵa tartady. Onyń pikirinshe, birneshe jyldan keiin aqshany qaitarýdy talap etý negizsiz. Alaida bul ýájder sotta qaralyp jatqandyqtan, olardyń quqyqtyq negizdiligine túpkilikti baǵa berilgen joq.
Nazym Qaharman jańa sot daýynyń bastalǵan ýaqytyna da narazylyq bildirdi. Onyń aitýynsha, uly Mansur qazirgi ýaqytta mektepti aiaqtap, sheteldik joǵary oqý oryndaryna túsýge daiyndalyp júr. Sondyqtan ol balalarynyń mańyzdy kezeńinde taǵy bir sot protsesiniń bastalǵanyna qynjylǵan.
"Nege bir-eki ai kúte almadyńyzdar? Úsh jyl boiy kúttińizder ǵoi. Ol mektepti bitirip, ýniversitetke túskenshe taǵy bir jyl kútýge ne kedergi boldy?" – dep surady Qaharman burynǵy kúieýiniń ata-anasynan.
Áieldiń aitýynsha, balalarǵa jańa sot daýy týraly olardyń ýniversitetterge qujat tapsyrý jumystary aiaqtalǵannan keiin ǵana aitylǵan.
Nazym Qaharmannyń málimetinshe, jańa talap aryz boiynsha alǵashqy sot otyrysy 19 qazanda ótken. Kelesi otyrys 11 qarashaǵa josparlanǵan. Sotta onyń múddesin advokat qorǵaidy. Sonymen qatar Qaharman ózi de aliment máselesi boiynsha sotqa júginýdi josparlap otyrǵanyn málimdedi. Onyń aitýynsha, alimentke qatysty talap somasy burynǵy kúieýiniń týystary surap otyrǵan qarajattan joǵary bolýy múmkin.
Eske salaiyq, 2026 jylǵy qazanda Astananyń mamandandyrylǵan aýdanaralyq ekonomikalyq soty Qýandyq Bishimbaevtyń anasy Almira Nurlybekovanyń Nazym Qaharmanǵa qatysty basqa talabyn ishinara qanaǵattandyrǵan. Sol kezde Nurlybekova 14 million teńgeden astam qarajat óndirýdi suraǵan.
Sot Qaharmanǵa tiesili NazKa jeke kásipkerliginen 6,6 million teńgeden astam qarajat óndirý týraly sheshim shyǵarǵan. Al 10,6 million teńgege qatysty ózge talap qaraýsyz qaldyrylǵan. Qazirgi 22 million teńgelik jańa daýdyń nátijesi ázirge belgisiz.
Aita keteiik, Qýandyq Bishimbaev 2024 jyly Saltanat Núkenovany óltirgeni jáne azaptaǵany úshin 24 jylǵa bas bostandyǵynan aiyrylǵan bolatyn.
