Qazaqstanda 956 myńǵa jýyq adam internet-platformalar arqyly jumys isteidi. Alaida tsifrlyq servisterdegi tehnikalyq aqaýlar olardyń bir mezette tabysynan aiyrylýyna ákelýi múmkin, dep habarlaidy dalanews.kz.
Osyǵan bailanysty «Ádilet» partiiasynyń depýtattary Úkimetten platformalyq jumyspen qamtýdaǵy táýekelderdi baǵalap, jumysshylardyń tabysyn qorǵaý tetikterin ázirleýdi surady.
«Ádilet» partiiasy fraktsiiasynyń depýtattary Gúlzira Atabaeva men Elena Smyshliaeva Eńbek jáne halyqty áleýmettik qorǵaý ministrine depýtattyq saýal joldady.
Depýtattardyń málimetinshe, 2026 jylǵy qyrkúiektegi jaǵdai boiynsha Qazaqstanda 35 internet-platforma operatory arqyly qyzmet kórsetetin 956 myńǵa jýyq oryndaýshy bolǵan. Aldaǵy ýaqytta platformalyq ekonomikaǵa tartylǵan azamattardyń sany odan ári artýy múmkin.
Alaida depýtattar platformalyq jumyspen qamtýdyń qazirgi júiesinde azamattardyń tabysyn qorǵaýǵa qatysty osal tustar bar ekenin atap ótti. Buǵan Yandex Go servisindegi tehnikalyq aqaýdy mysalǵa keltirdi. Saldarynan taksi júrgizýshileri men kýrerler ýaqytsha tapsyrys qabyldai almai, tabys tabý múmkindiginen aiyrylǵan. Sonymen qatar keibir oryndaýshylardyń tapqan aqshasyn shyǵaryp alýda qiyndyqtarǵa tap bolǵany týraly habarlamalar túsken.
Depýtattardyń pikirinshe, bir ǵana jeke tsifrlyq platformanyń jumysyndaǵy aqaý júzdegen myń adamnyń jumysyna jáne kúndelikti tabysyna tikelei áser etýi múmkin. Sondyqtan mundai jaǵdailarǵa daiyndyq pen oryndaýshylardyń quqyǵyn qorǵaý máselesin júieli túrde sheshý qajet.
Osyǵan bailanysty fraktsiia Úkimetke platformalyq jumyspen qamtýdyń eńbek naryǵyna tóndiretin táýekelderine keshendi baǵalaý júrgizýdi usyndy.
Sondai-aq depýtattar tsifrlyq platformalarda jappai tehnikalyq aqaý bolǵan jaǵdaida memlekettik organdar men operatorlardyń birlesip áreket etý josparyn ázirleýdi surady. Qujatta azamattardy shuǵyl habardar etý, tapsyrystarǵa qoljetimdilikti qalpyna keltirý, tólenbegen qarajatty jedel óteý jáne zardap shekken oryndaýshylarǵa erikti ótemaqy tóleý baǵdarlamalaryn qarastyrý usynylǵan.
Budan bólek, uzaqqa sozylǵan tehnikalyq aqaýlar kezinde platformalarda jumys isteitin azamattardy qorǵaýdyń naqty tetikterin operatorlarmen birlesip pysyqtaý qajettigi aityldy.
Depýtattar Memleket basshysynyń tsifrlyq jumyspen qamtýdy damytý jónindegi tapsyrmasy azamattardyń tek platforma arqyly tabys tabýyna ǵana emes, sol tabys kóziniń turaqtylyǵyna da kepildik beretin sheshimdermen qatar júrýge tiis ekenin atap ótti.
