Almatyda azamattyq nekedegi áielin asqan qatygezdikpen óltirgen burynǵy politsiia qyzmetkeri 15 jylǵa bas bostandyǵynan aiyryldy, dep habarlaidy dalanews.kz "Kriminalnyi Kazahstan" arnasyna siltep.
Oqiǵa byltyr mamyrda bolǵan. Er adam janjal kezinde balalardyń kózinshe áieline pyshaqpen 39 ret soqqy jasaǵan. Keiin ózine qol jumsamaq bolǵan, biraq aman qalǵan.
Sot otyrysynda aiyptalýshy ne bolǵanyn tek aýrýhanada esin jiǵannan keiin túsingenin aitqan. Alaida sot onyń bul ýájin qabyldamady.
Burynǵy politsiia qyzmetkeri azamattyq nekedegi áielin asqan qatygezdikpen óltirgeni úshin kináli dep tanylyp, 15 jylǵa bas bostandyǵynan aiyryldy. Ol jazasyn qaýipsizdigi ortasha mekemede óteidi.
Sonymen qatar, sottalǵan adam marqumnyń otbasyna moraldyq ziian úshin 10 million teńge ótemaqy tóleýge mindetteldi. Erli-zaiyptynyń artynda úsh bala qaldy.
