Qazaqstanda 2025–2026 jyldardaǵy jylytý maýsymy turaqty ótken, alaida energetika salasynda júieli problemalar áli de ózekti, dep habarlaidy dalanews.kz.
Úkimet otyrysynda energetika vitse-ministri Suńǵat Esimhanov maýsym qorytyndylaryn jariialady.
«2025–2026 jyldardaǵy jylytý maýsymy aiaqtaldy. Júieli uiymdastyrylǵan jumystyń arqasynda ol turaqty ótti. Jylytý kezeńinde iri tehnologiialyq buzýshylyqtar oryn alǵan joq. Tutynýshylar elektr jáne jylý energiiasymen tolyq qamtamasyz etildi», - dedi vitse-ministr.
Onyń aitýynsha, ótken jyly energetika infraqurylymyn jóndeýge bólinetin qarjy artqan. Elektr stantsiialarynda jóndeý jumystaryna 348 mlrd teńge baǵyttalyp, bul aldyńǵy kezeńnen 6%-ǵa kóp bolǵan. Al jylý jelilerin jóndeýge bólingen qarjy 16%-ǵa ósip, 129 mlrd teńgege jetken.
«Elektr stantsiialarynda jóndeý kestesine sáikes 10 energoblokta, 63 qazandyqta, 39 týrbinada kúrdeli jóndeý júrgizildi. Elektr jelilerinde 17 myń shaqyrym jeli men 420 qosalqy stantsiia jóndeldi. 323 shaqyrym jylý jelisi rekonstrýktsiialanyp, aýystyryldy», - dedi ol.
Júrgizilgen jumystar nátijesinde jabdyqtardyń tozý deńgeii birshama tómendegen. Elektr stantsiialaryndaǵy tozý 53%-ǵa, elektr jelilerinde 66,2%-ǵa, al jylý jelilerinde 50%-ǵa deiin azaiǵan.
Sonymen qatar tehnologiialyq buzýshylyqtar sany da qysqarǵan. Elektr jelilerindegi aqaýlar 12%-ǵa, elektr stantsiialaryndaǵy kórsetkish 15%-ǵa tómendegen. Jylý jelilerindegi temperatýralyq rejimdi buzý jaǵdailary úsh ese azaiǵan.
«2025 jylǵy jeltoqsanda elektr generatsiiasynyń maksimýmyna qol jetkizildi – 17 273 MVt, bul ótken kezeńmen salystyrǵanda 7%-ǵa joǵary», - dedi vitse-ministr.
Alaida saladaǵy negizgi másele retinde energiia óndirýshi uiymdardyń qaryzy ataldy.
«Energiia óndirýshi uiymdardyń otyn úshin kreditorlyq beresheginiń edáýir kólemi mańyzdy problemalyq másele bolyp tabylady. “QazTransGaz-Aimaq” AQ aldyndaǵy bereshek 37,7 mlrd teńgeni quraidy», - dedi Suńǵat Esimhanov.
Kúzgi-qysqy kezeńde otyn qory da qalyptastyrylǵan. Qoimalarda 5,6 mln tonna kómir jáne 152 myń tonna mazýt jinalǵan. Jalpy kómir daiyndaý jospary 7,46 mln tonna bolsa, is júzinde 8,15 mln tonna nemese 109,8% oryndalǵan.
Aldaǵy jylytý maýsymyna daiyndyq aiasynda jóndeý jumystary jalǵasady. Biyl 9 energoblok, 55 qazandyq jáne 51 týrbinaǵa kúrdeli jóndeý júrgizý josparlanǵan.
«Elektr stantsiialarynda jóndeý jumystaryn qarjylandyrý 384 mlrd teńge deńgeiinde josparlanǵan, bul ótken jylǵy deńgeiden 9%-ǵa joǵary», - dedi ol.
Sonymen qatar elektr jelilerinde 1,2 myń shaqyrym jeli men 54 qosalqy stantsiia jóndelip jatyr. Jylý jelilerin jańǵyrtý jospary 377 shaqyrymdy quraidy.
Vitse-ministrdiń aitýynsha, bul sharalar júzege assa, jabdyqtardyń tozý deńgeii ári qarai tómendeidi: elektr stantsiialarynda 52%-ǵa, elektr jelilerinde 65,7%-ǵa, jylý jelilerinde 48%-ǵa deiin.
Memleket basshysynyń tapsyrmasymen energetika jáne kommýnaldyq sektordy jańǵyrtýdyń ulttyq jobasy iske asyrylýda. Biyl jalpy somasy 626,8 mlrd teńgege 130 km jylý jelisi men 10 490 km elektr jelisin jańǵyrtý kózdelgen.
Sondai-aq óńirlerdi qoldaý úshin Úkimet rezervinen 7 óńirge 25,4 mlrd teńge bólý josparlanǵan. Qazirgi tańda Shyǵys Qazaqstan, Jetisý jáne Abai oblystaryna qarajat bólingen.
Mysaly, Taldyqorǵanda jańa qazandyq salynyp jatyr, Ridderde jylý elektr ortalyǵy jańǵyrtylýda, al Semeide qazandyqtar jóndelip jatyr.
Jalpy, Úkimet aldaǵy jylytý maýsymyna daiyndyq jumystaryn jalǵastyryp, energetikalyq júieniń turaqtylyǵyn qamtamasyz etýge baǵyttalǵan sharalardy kúsheitpek.
