تۇركىستان وبلىسىندا جانتۇرشىگەرلىك وقيعا بولدى. 56 جاستاعى ەر ادام الدىمەن ايەلىن بالعامەن ۇرىپ ءولتىرىپ، ارتىنشا وزىنە قول جۇمساعان. الدىن الا مالىمەتتەر بويىنشا، قايعىلى جاعدايعا ەرلى-زايىپتىلار اراسىنداعى جانجال سەبەپ بولعان،- دەپ حابارلايدى Dalanews.kz
قاندى قىلمىس سايرام اۋدانىنداعى قارامۇرت اۋىلىندا بولعان. ايەلدىڭ دەنەسىن العاش بولىپ بالالارى كورگەن. مارقۇمنىڭ جاسى 45-تە ەدى.
مارقۇمنىڭ تۋىستارىنىڭ ايتۋىنشا، ايەلدىڭ دەنەسىندە اۋىر جاراقاتتار بولعان، بەتى مەن دەنەسى سوققىدان قاتتى زاقىمدانعان. وقيعا ورنىنان بالعا تابىلعان. ال كۇدىكتى كۇيەۋىنىڭ دەنەسى ءسال كەيىنىرەك اۋلاداعى اجەتحانادا اسۋلى كۇيىندە تابىلدى.
وقيعاعا دەيىن ول اۋديوجازبا قالدىرىپ كەتكەن. وندا ايەلىن قىزعانىشتان ولتىرگەنىن ايتقان. الايدا مارقۇمنىڭ جاقىندارى بۇل ايىپتاۋدى جوققا شىعارىپ وتىر. ولاردىڭ سوزىنشە، مارقۇم ەشقاشان وپاسىزدىق جاساماعان، كەرىسىنشە كۇيەۋى جۇمىس ىستەمەي، ءجيى جانجال شىعارىپ جۇرگەن.
- قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ، وقيعانىڭ بارلىق ءمان-جايلارىن انىقتاۋعا باعىتتالعان قاجەتتى ءىس-شارالار اتقارىلۋدا. تەرگەۋ بارىسى پوليسيا دەپارتامەنتى باسشىلىعىنىڭ قاتاڭ باقىلاۋىندا. ق ر قپك-نىڭ 201-بابىنا سايكەس تەرگەۋ مۇددەسىندەگى وزگە دە اقپاراتتار جاريا ەتۋگە جاتپايدى، - دەپ حابارلادى تۇركىستان وبلىسىنىڭ پد باسپا ءسوز قىزمەتى.
ەرلى-زايىپتىلاردىڭ ءتورت بالاسى (ەڭ ۇلكەنى – 13 جاستا، ەڭ كىشىسى – 4 جاستا) ۋاقىتشا بەيىمدەۋ ورتالىعىنا ورنالاستىرىلدى.
