الماتى وبلىسىندا ەكى كۇننەن بەرى قوقىس پوليگونى جانىپ جاتىر. Dalanews.kz احۋالعا شولۋ جاسادى.
ءمان-جايى
الماتى – وسكەمەن تاسجولىنىڭ 35-شاقىرىمىندا، الاتاۋ اۋىلى ماڭىنداعى "ADC TAZA ALEM" جشس-ىنە تيەسىلى قاتتى تۇرمىستىق قالدىقتار پوليگونىندا ءورت شىققان.
رەسمي مالىمەتتەرگە سۇيەنسەك، جالپى اۋماعى 35 گەكتار بولاتىن پوليگوننىڭ شامامەن 10 گەكتار جەرىندە قوقىس جانعان.
تجم نە دەيدى؟
توتەنشە جاعدايلار مينيسترلىگى مالىمەتىنشە، الماتى وبلىسىندا قاتتى تۇرمىستىق قالدىقتار پوليگونىنداعى ءورتتى ءسوندىرۋ جۇمىستارى ءالى دە جالعاسىپ جاتىر.
"جەكەلەگەن ۋچاسكەلەردە 10 مەترگە دەيىنگى تەرەڭدىكتە بىقسۋ بايقالادى. ءورت وشاقتارىن ءسوندىرۋ ءۇشىن ينەرتتى ماتەريالدارمەن تولتىرىپ جاتىرمىز. جەل باعىتى قوسىمشا قيىندىق تۋعىزىپ وتىر. پوليگون اۋدانى سوقامەن جىرتىلدى"، - دەدى تجم وكىلدەرى.
7 ءورت ءسوندىرۋ ۋچاسكەسى قۇرىلعان. وقيعا ورنىندا الماتى وبلىسى تجد باستىعى، پولكوۆنيك داۋرەن ورازبەكوۆتىڭ باسشىلىعىمەن جەدەل شتاب قۇرىلعان.
ءورتتى ءسوندىرۋ جۇمىستارىنا الماتى وبلىسى، الماتى قالاسى تجد، تجم 28237 اسكەري ءبولىمى، جەرگىلىكتى اتقارۋشى ورگاندار، "قازسەلدەنقورعاۋ" جانە الماتى قالاسى تجد قۇتقارۋ قىزمەتىنىڭ 120-عا جۋىق ادامى مەن 60-تان اسا تەحنيكاسى جۇمىلدىرىلعان.
"جاعداي توتەنشە جاعدايلار مينيسترلىگى باقىلاۋىندا. ءورتتىڭ جاقىن ماڭداعى اۋماقتارعا تارالۋ ءقاۋپى جوق"، - دەپ سەندىردى تجم وكىلدەرى.
اكىمدىك نە دەيدى؟
الماتى وبلىسى اكىمدىگى مالىمەتىنشە، جۇمىس تاۋلىك بويى توقتاپ جاتقان جوق. قوسىمشا "تەرەڭ قارا" كانالىنان 2000 مەترلىك ءورت ءسوندىرۋ قۇرالى ارقىلى موتوپومپامەن سۋ بەرىلىپ وتىر.
"ءورتتى سوندىرۋگە 108 ادام جانە 54 تەحنيكا جۇمىلدىرىلعان. مامانداردىڭ ايتۋىنشا، جاعداي تولىق باقىلاۋدا. جۇمىستار جالعاسىپ جاتىر"، - دەدى اكىمدىكتىڭ باسپا ءسوز قىزمەتى وكىلى.
