Almaty oblysynda eki kúnnen beri qoqys poligony janyp jatyr. Dalanews.kz ahýalǵa sholý jasady.
Mán-jaiy
Almaty – Óskemen tasjolynyń 35-shaqyrymynda, Alataý aýyly mańyndaǵy "ADC TAZA ALEM" JShS-ine tiesili qatty turmystyq qaldyqtar poligonynda órt shyqqan.
Resmi málimetterge súiensek, jalpy aýmaǵy 35 gektar bolatyn poligonnyń shamamen 10 gektar jerinde qoqys janǵan.
TJM ne deidi?
Tótenshe jaǵdailar ministrligi málimetinshe, Almaty oblysynda qatty turmystyq qaldyqtar poligonyndaǵy órtti sóndirý jumystary áli de jalǵasyp jatyr.
"Jekelegen ýchaskelerde 10 metrge deiingi tereńdikte byqsý baiqalady. Órt oshaqtaryn sóndirý úshin inertti materialdarmen toltyryp jatyrmyz. Jel baǵyty qosymsha qiyndyq týǵyzyp otyr. Poligon aýdany soqamen jyrtyldy", - dedi TJM ókilderi.
7 órt sóndirý ýchaskesi qurylǵan. Oqiǵa ornynda Almaty oblysy TJD bastyǵy, polkovnik Dáýren Orazbekovtiń basshylyǵymen jedel shtab qurylǵan.
Órtti sóndirý jumystaryna Almaty oblysy, Almaty qalasy TJD, TJM 28237 áskeri bólimi, jergilikti atqarýshy organdar, "Qazseldenqorǵaý" jáne Almaty qalasy TJD qutqarý qyzmetiniń 120-ǵa jýyq adamy men 60-tan asa tehnikasy jumyldyrylǵan.
"Jaǵdai Tótenshe jaǵdailar ministrligi baqylaýynda. Órttiń jaqyn mańdaǵy aýmaqtarǵa taralý qaýpi joq", - dep sendirdi TJM ókilderi.
Ákimdik ne deidi?
Almaty oblysy ákimdigi málimetinshe, jumys táýlik boiy toqtap jatqan joq. Qosymsha "Tereń qara" kanalynan 2000 metrlik órt sóndirý quraly arqyly motopompamen sý berilip otyr.
"Órtti sóndirýge 108 adam jáne 54 tehnika jumyldyrylǵan. Mamandardyń aitýynsha, jaǵdai tolyq baqylaýda. Jumystar jalǵasyp jatyr", - dedi ákimdiktiń baspasóz qyzmeti ókili.
