كەيىنگى بىرنەشە كۇننەن بەرى ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ توڭىرەگىندەگى داۋ تىيىلار ەمەس. ءاتى-جونى جازىلعان ءموردى پايدالانعان جۋرناليستيكا فاكۋلتەتىنىڭ دەكانى قانات اۋەسباي جۇرتتىڭ سىنىنا قالىپ، قىزۋ تالقىعا ءتۇستى، دەپ حابارلايدى Dalanews.kz.
ماسەلە نەدەن باستالدى؟
تانىمال جۋرناليست جۇلدىز ءابدىلدا Facebook پاراقشاسىندا قازۇۋ-دا وتكەن جاس تىلشىلەر فورۋمىنا قاتىستى جازبا جاريالاعان ەدى. ونىڭ سوزىنشە، فورۋم قاتىسۋشىلارىنا بەرىلگەن سەرتيفيكاتقا ۋنيۆەرسيتەتتىڭ نەمەسە فاكۋلتەتتىڭ ەمەس، دەكاننىڭ ءاتى-جونى جازىلعان جەكە ءمورى باسىلعان.
"قازۇۋ سياقتى بىلدەي ءبىر ۋنيۆەرسيتەتتە، اتام زاماننان كەلە جاتقان جۋرناليستيكا فاكۋلتەتىندە ءمور جوق پا سوندا؟ الدە جۋرفاكتى اۋەسبايدىڭ قاناتى ءبىرجولا جەكەشەلەندىرىپ الىپ پا ەدى؟ يپ-نىڭ قۇجاتى قۇساتىپ نە مىناۋ؟ "اۋەسبايدىڭ قاناتى ءوز-وزىنىڭ فاناتى" ەكەنىن بىلاي دا بىلەمىز عوي، ءبىراق مىناۋسى تىم ارتىق ەكەن"، – دەپ جازدى جۇلدىز ءابدىلدا.
كەيىنىرەك جوعارى وقۋ ورنىنىڭ باسپا ءسوز قىزمەتى ب ا ق وكىلدەرىنە بەرگەن پىكىرىندە بۇل جايتقا قاتىستى قاتىستى قىزمەتتىك تەكسەرىس باستالعانىن مالىمدەدى.
بۇل ءىس قالاي جالعاستى؟
تەكسەرىس باستالعاننان كەيىن دە قوعام تاراپىنان سىني پىكىر توقتامادى. الەۋمەتتىك جەلىدە وسى جاعدايعا قاتىستى جاڭا جازبالار پايدا بولدى.
جۋرناليستيكا فاكۋلتەتىندە ءبىلىم العانىن ايتقان جەلى قولدانۋشىلارىنىڭ ءبىرى وسى وقيعادان كەيىن قانات اۋەسباي قىزمەتىنەن كەتىپ، ورنىنا مانشۇك مۇقاشيەۆا كەلگەنىن جازدى. الايدا جازبا اۆتورى مانشۇك مۇقاشيەۆاعا دا كۇمان كەلتىرىپ، ۋنيۆەرسيتەت باسشىلىعىن بولاشاق جۋرناليستەرگە قيانات جاساماۋعا شاقىرعان.
"ءبىزدىڭ قۇتتى شاڭىراعىمىزدا تەك كىل مىقتىلار ەڭبەك ەتۋگە ءتيىس. قانداي ۇستازداردان ءدارىس الدىق ءبىز. بىلىققا، باتپاققا اينالدىرماڭدار! جۋرناليستيكا فاكۋلتەتى - ەلىمىزدەگى ماڭدايالدى فاكۋلتەت. فاكۋلتتەتتىڭ ابىرويىمەن ويناپ، ويقاستاپ، جونسىز-جۇيەسىز (قالاي-بولسا سولاي) ادامداردى باسشىلىققا قويا بەرۋگە بولمايدى. بۇل دەگەن بولاشاق ستۋدەنتتەردىڭ وبالىنا قالۋ، قازاقتىڭ قاسيەتتى ءسوز ونەرى مەن جۋرناليستيكاسىنا، قازاقستان ءبىلىمىنىڭ التىن ۇياسىنا قاستاندىق جاساۋ دەپ ويلايمىن. قوجاكەيەۆتىڭ ءاۋراعىنان قورقىڭدار! تانىمى تاياز، ارىپتەستەرىنە جۇعىمسىز، كاسىبيلىگى، مادەنيەتى تومەن ادامدى باسشىلىققا قويۋ - جۋرفاگىمىزدىڭ بولاشاعىنا بالتا شاپقانمەن تەڭ! ويلانايىق! بولاشاق جۋرناليستەرگە قيانات قىلمايىق! ءوزىمىز تۇلەپ ۇشقان فاكۋلتەتىمىزدى سيرككە اينالماسىن!" - دەپ اشىندى ول.
