ەندى تۇركىستان وبلىسى بويىنشا ءبىراز اۋماققا تالشىقتى وپتيكالىق بايلانىس جەلىسى ءۇشىن قۇرىلىس جۇمىستارى باستالادى. تۇركىستان قالاسىنىڭ جاڭادان جاسالعان باس جوسپارىنا ساي قالا اۋماعىنىڭ كولەمى 35 مىڭ گەكتارعا ۇلعايىپ وتىر.
ال، قالانىڭ شىعىس بولىگىنەن، ياعني جاڭا قالاشىق «وتىرار» شاعىناۋدانى ءۇشىن 670 گەكتار جەر بولىنگەن. مۇنداعى 170 گەكتار اۋماققا سالىناتىن اكىمشىلىك-ىسكەرلىك ورتالىققا جانە 300 گەكتار جەرگە تۇرعىزىلاتىن كوپقاباتتى ۇيلەردىڭ بارلىعى دا كەلەشەكتە وسى جوعارى جىلدامدىقتاعى ينتەرنەت جەلىسىمەن قامتىلادى. دەمەك، مۇندا كەلەشەكتە 65 مىڭعا جۋىق تۇرعىن ورنالاسادى دەگەن جوسپار بار.
سونداي-اق، بۇل جەردە كوپتەگەن مەملەكەتتىك مەكەمەلەردىڭ عيماراتتارى (پروكۋراتۋرا، سوت، ءماجىلىس زالى، تەاتر) بوي كوتەرەدى. اتالعان مەكەمەلەردەن بولەك جاڭادان سالىناتىن جانە بۇرىننان بار كوپقاباتتى ءۇي تۇرعىندارى مەن قالاداعى بارلىق مەكتەپتەر، مەديسينا مەكەمەلەرى تالشىقتى وپتيكالىق بايلانىسپەن قامتىلادى. ەلباسى تۇركىستان قالاسىمەن قاتار كەنتاۋ قالاسىن دا دامىتۋعا ەرەكشە ءمان بەرىپ وتىر. سيفرلاندىرۋ شارالارى كەنتاۋ قالاسىنداعى كوپقاباتتى ۇيلەر مەن مەملەكەتتىك مەكەمەلەرىندە دە جۇزەگە اسپاق.
وسى باعىتتاعى قۇرىلىس جۇمىستارى كەلەسى جىلدىڭ ءبىرىنشى توقسانىندا باستالادى. بۇگىندە جاسالىنعان جوبالىق-سمەتالىق قۇجاتتار بويىنشا قۇرىلىس، جەر قاتىناستارى باسقارمالارىمەن بىرىگىپ دايىندىق جۇمىستارى پىسىقتالىپ، كەلىسىمدەر جۇرگىزىلۋدە. وسى جۇمىستار بىتە سالىسىمەن بولىنگەن قارجىنى جۇمساۋعا مۇمكىندىك اشىلادى. ياعني جوباداعى جۇمىستاردى ىستەيتىن مەردىگەرلەرگە كونكۋرستار جاريالانادى. بارلىق شارالار «سامۇرىق قازىنا» ءال-اۋقات قورىنىڭ تالاپتارى نەگىزىندە جۇزەگە اسادى. 2019 جىلدىڭ سوڭىنا دەيىن قۇرىلىس جۇمىستارى اياقتالىپ، جەلىلەر GPON نەگىزىندە جۇمىس ىستەيتىن بولادى.
كەلەر جىلى ىسكە اساتىن تاعى ءبىر جوباعا 300 ملن. تەڭگە ينۆەستيسيا قۇيىلماق. وندا وبلىستىڭ بارلىق اۋدان ورتالىقتارىنداعى مەملەكەتتىك قىزمەت ورگاندارى، ياعني مەكتەپتەر مەن مەديسينالىق ورتالىقتار تالشىقتى وپتيكالىق بايلانىس جەلىسىمەن قامتىلادى. بۇگىندە وبلىستىق ءبىلىم باسقارماسىنان ءبىلىم مەكەمەلەرىنىڭ تىزىمدەرىن الدىرىپ جاتىرمىز.
Dalanews.kz
