تۇركىستان وبلىسىنداعى قاراپايىم حالىقتىڭ ايرىقشا سۇرانىسقا يە جوعارى جىلدامدىقتاعى ينتەرنەت جەلىسىمەن قامتاماسىز ەتۋ جولىندا كوپتەگەن جۇمىستار اتقارىلۋدا. ساپالى عالامتوردىڭ قولجەتىمدىلىكتى قامتاماسىز ەتۋ ءۇشىن تالشىقتى وپتيكالىق بايلانىس جۇيەلەرىنىڭ ماڭىزى زور. تالشىقتى وپتيكالىق بايلانىس جۇيەسى تۇرعىنداردىڭ ەلەكتروندى مەملەكەتتىك قىزمەتكە، قاشىقتىقتان وقىتۋعا جانە تەلەمەديسينا سالاسىنا قول جەتىمدىلىگىن ارتتىرادى. سونداي-اق، بۇل جۇيە شاعىن بيزنەستى دامىتۋدىڭ دا كوكجيەگەن كەڭەيتەتىنى انىق.
وسى رەتتە وڭتۇستىك وڭىرلىك تەلەكوممۋنيكاسيالار ديرەكسياسى تۇركىستان، قىزىلوردا جانە جامبىل وبلىستارى اۋماعىندا تالشىقتى وپتيكالىق بايلانىستى جوبالاۋ مەن سالۋ بويىنشا كوپتەگەن جوبالاردى ىسكە اسىرۋدى جوسپارلاپ وتىر. ال، تالشىقتى وپتيكالىق بايلانىس جەلىسى دەگەنىمىز – مالىمەتتەردى جارىق كومەگىمەن بەرۋگە ارنالعان كۇردەلى كابەلدەر جۇيەسى. ونىڭ جەتكىزۋ جىلدامدىعى مەن ساپاسى وتە جوعارى بولماق. باسقا ەلەكتر بايلانىس جەلىلەرىنە قاراعاندا اقپارات بەرۋ جىلدامدىعىنىڭ جوعارىلىعىمەن (100 شاقىرىمنان اساتىن قاشىقتىققا 107-109 بيت/س)، از شىعىندالۋىنا بايلانىستى الىس قاشىقتىققا اقپاراتتى رەترانسلياتورسىز جەتكىزۋ مۇمكىندىگىمەن، پايدالانۋعا يكەمدىلىگىمەن جانە ارزاندىعىمەن ەرەكشەلەنەدى.
«قازاقتەلەكوم» اق «تالشىقتى وپتيكالىق بايلانىس جەلىلەرى تەحنولوگيالارىن قولدانۋ ارقىلى قازاقستان رەسپۋبليكاسىنىڭ اۋىلدىق ەلدى مەكەندەرىندە ينتەرنەتكە كەڭ جولاقتى قولجەتىمدىلىكتى قامتاماسىز ەتۋ» جوباسى شەڭبەرىندە بيىل تۇركىستان وبلىسىنىڭ بىرنەشە اۋىلىندا تالشىقتى وپتيكالىق جەلىسىنىڭ قۇرىلىسىن اياقتادى.
بۇل جوباعا 250 مىڭنان استام تۇرعىنى بار 177 ەلدى مەكەن قامتىلسا، ازىرگە 5 اۋىلدا قۇرىلىسى اياقتالىپ، ولار قازان ايىندا ىسكە قوسىلدى. اتاپ ايتقاندا، بۇلاردىڭ قاتارىنا قوسمەزگىل، قۇراما، جەتكىنشەك، شىپان جانە قىزىلقۇم اۋىلدارى كىرىپ وتىر. اتالمىش ەلدى مەكەندەردە ورنالاسقان مەملەكەتتىك ورگانداردى جوعارى جىلدامدىقتاعى ينتەرنەتپەن قامتاماسىز ەتۋ ءۇشىن 2966 مەتردى قۇرايتىن وپتيكالىق كابەل توسەلگەن. قالعانى كەلەر جىلدىڭ ەنشىسىندە تۇر.
Dalanews.kz
