رۋدنىي قالاسىندا كليەنتتەردىڭ قۇرىلعىلارىنداعى بانك قوسىمشالارىن بۇزۋ ارقىلى اقشا ۇرلادى دەگەن كۇدىكپەن تەلەفون جوندەۋ شەبەرى ۇستالدى دەپ حابارلايدى Dalanews.kz قوستاناي وبلىستىق پد-نە سىلتەمە جاساپ.
ۆەدومستۆونىڭ باسپا ءسوز قىزمەتىنىڭ حابارلاۋىنشا، «موبيلنيك» جەدەل الدىن الۋ ءىس-شاراسى اياسىندا رۋدنىي قالاسىنىڭ پوليسەيلەرى بۇرىن قولدانىستا بولعان ۇيالى تەلەفونداردى جوندەۋ جانە ساتىپ الۋمەن اينالىسقان جەرگىلىكتى تۇرعىندى ۇستادى.
«تەرگەۋ مالىمەتىنشە، ەر ادام قۇرىلعىلاردى دياگنوستيكا جانە تەحنيكالىق قىزمەت كورسەتۋ ءۇشىن الىپ، كەيىن بانكتىك قوسىمشالارعا زاڭسىز قول جەتكىزىپ، قاراجاتتى ءوز شوتتارىنا اۋدارىپ وتىرعان»،- دەپ مالىمدەدى قوستاناي وبلىستىق پد.
كىرۋ ءۇشىن قۇپياسوزدەر رەتىندە تۋعان كۇندەر، يەلەرىنىڭ ەسىمدەرى جانە باسقا دا وڭاي بولجاناتىن كومبيناسيالار پايدالانىلعان.
«قازىرگى ۋاقىتتا كۇدىكتىنىڭ ءۇش قىلمىستىق ەپيزودقا قاتىسى بار ەكەنى دالەلدەندى»،- دەپ ناقتىلادى ۆەدومستۆو.
زياننىڭ جالپى سوماسى 1 ميلليون تەڭگەدەن استى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە، قوسىمشا فاكتىلەر مەن جابىرلەنۋشىلەر انىقتالۋدا.
پوليسيا ازاماتتاردى كيبەرقاۋىپسىزدىك شارالارىن ساقتاۋعا شاقىردى:
تەلەفوندى جوندەۋشى شەبەرگە دە قۇلىپتان بوساتىلعان كۇيىندە بەرمەڭىز؛
قۇرىلعىنى تاپسىرار الدىندا بانك قوسىمشالارىن ءوشىرىپ، بارلىق اككاۋنتتاردان شىعىڭىز؛
جەكە دەرەكتەردى قامتىمايتىن كۇردەلى قۇپياسوزدەردى پايدالانىڭىز؛
قۇرىلعىعا باقىلاۋ جوعالعان جاعدايدا، بىردەن بانك كارتالارى مەن ونلاين قول جەتىمدىلىكتى بانك كولل ورتالىعى ارقىلى بۇعاتتاڭىز.
