قازاقستاننىڭ كيبەرپوليسياسى رەسەي اۋماعىندا ارنايى وپەراسيا جۇرگىزىپ، بىرنەشە تۇلعانى ۇستادى، دەپ حابارلايدى Dalanews.kz.
21 قازان كۇنى ءىىم كيبەرقىلمىسپەن كۇرەس دەپارتامەنتىنىڭ قىزمەتكەرلەرى رەسەي ءىىم كيبەرپوليسيا باسقارماسىمەن بىرلەسىپ، ۇزاق ۋاقىت جۇرگىزىلگەن جەدەل-ىزدەستىرۋ شارالارىنىڭ ناتيجەسىندە رەسەيدىڭ ءۇش وڭىرىندە ينتەرنەت-الاياقتارعا ارنالعان SIM-كارتالاردى جەتكىزۋ جانە جاپپاي بەلسەندىرۋ ارناسىن ۇيىمداستىرعان تۇلعالاردى ۇستادى.
بۇل تۋرالى ءىىم كيبەرقىلمىسپەن كۇرەس دەپارتامەنتى باستىعىنىڭ ورىنباسارى اسلان ۇسكەمبايەۆ مالىمدەدى.
ونىڭ ايتۋىنشا، ارنايى وپەراسيا بارىسىندا 11 SIM-box قۇرىلعىسى، 3 نوۋتبۋك، 31 ۇيالى تەلەفون، سونداي-اق 19 مىڭنان استام قازاقستاندىق جانە ەۋروپالىق SIM-كارتا تاركىلەنگەن.
"تاركىلەنگەن نوۋتبۋكتەردەن پايدالانۋشىلاردىڭ ارەكەت تاريحى جازىلعان "لوگ-فايلدار" تابىلدى. وندا 2023 جىلدىڭ باسىنان بەرى بەلسەندىرىلگەن قازاقستاندىق جانە وزگە وپەراتورلاردىڭ ابونەنتتىك نومىرلەرى تىركەلگەن. بۇل نومىرلەر كەيىن ازاماتتارعا جالعان قوڭىراۋلار شالۋ ارقىلى الاياقتىق جاساۋعا قولدانىلعان. قازىرگى تاڭدا سول نومىرلەردىڭ ناقتى قىلمىستىق ىستەردە پايدالانىلعانى انىقتالدى"، – دەدى ۇسكەمبايەۆ.
ارنايى وپەراسيا ناتيجەسىندە رەسەي فەدەراسياسىنىڭ ءتورت ازاماتى ۇستالدى.
قازىرگى تاڭدا تەرگەۋ جانە جەدەل شارالار جالعاسىپ جاتىر.
ۇسكەمبايەۆتىڭ ايتۋىنشا، ەكى ەلدىڭ قۇقىق قورعاۋ ورگاندارىنىڭ بىرلەسكەن ءىس-قيمىلى ترانسۇلتتىق ۇيىمداسقان توپتىڭ قىزمەتىن توقتاتۋعا، ازاماتتاردى الاياقتىق سحەمالارعا تارتۋدىڭ الدىن الۋعا جانە حالىقارالىق كيبەرقىلمىسقا ەلەۋلى سوققى بەرۋگە مۇمكىندىك بەرگەن.
