Qazaqstannyń kiberpolitsiiasy Resei aýmaǵynda arnaiy operatsiia júrgizip, birneshe tulǵany ustady, dep habarlaidy Dalanews.kz.
21 qazan kúni IIM Kiberqylmyspen kúres departamentiniń qyzmetkerleri Resei IIM kiberpolitsiia basqarmasymen birlesip, uzaq ýaqyt júrgizilgen jedel-izdestirý sharalarynyń nátijesinde Reseidiń úsh óńirinde internet-alaiaqtarǵa arnalǵan SIM-kartalardy jetkizý jáne jappai belsendirý arnasyn uiymdastyrǵan tulǵalardy ustady.
Bul týraly IIM Kiberqylmyspen kúres departamenti bastyǵynyń orynbasary Aslan Úskembaev málimdedi.
Onyń aitýynsha, arnaiy operatsiia barysynda 11 SIM-box qurylǵysy, 3 noýtbýk, 31 uialy telefon, sondai-aq 19 myńnan astam qazaqstandyq jáne eýropalyq SIM-karta tárkilengen.
"Tárkilengen noýtbýkterden paidalanýshylardyń áreket tarihy jazylǵan "log-faildar" tabyldy. Onda 2023 jyldyń basynan beri belsendirilgen qazaqstandyq jáne ózge operatorlardyń abonenttik nómirleri tirkelgen. Bul nómirler keiin azamattarǵa jalǵan qońyraýlar shalý arqyly alaiaqtyq jasaýǵa qoldanylǵan. Qazirgi tańda sol nómirlerdiń naqty qylmystyq isterde paidalanylǵany anyqtaldy", – dedi Úskembaev.
Arnaiy operatsiia nátijesinde Resei Federatsiiasynyń tórt azamaty ustaldy.
Qazirgi tańda tergeý jáne jedel sharalar jalǵasyp jatyr.
Úskembaevtyń aitýynsha, eki eldiń quqyq qorǵaý organdarynyń birlesken is-qimyly transulttyq uiymdasqan toptyń qyzmetin toqtatýǵa, azamattardy alaiaqtyq shemalarǵa tartýdyń aldyn alýǵa jáne halyqaralyq kiberqylmysqa eleýli soqqy berýge múmkindik bergen.
