توتەنشە جاعدايلار ءمينيسترى شىڭعىس ءارىنوۆ قازاقستاندا جەرتولەلەر مەن پاركينگتەر حالىقتى بومبادان قورعاۋعا ارنالعان ورىن رەتىندە پايدالانىلاتىنىن مالىمدەدى، دەپ حابارلايدى Dalanews.kz.
ءمينيستردىڭ ايتۋىنشا، الەمدىك تاجىريبە كورسەتكەندەي، جەراستى قۇرىلىستارى، پاركينگتەر مەن جەرتولەلەر توتەنشە جاعداي كەزىندە ادامداردى قورعاۋدىڭ ەڭ ءتيىمدى جولدارىنىڭ ءبىرى.
“ءبىز بۇرىنعىداي ارنايى ۇلكەن بومباپانالار سالۋ تاجىريبەسىنەن باس تارتۋدامىز. ونىڭ ورنىنا حالىققا قولجەتىمدى جەرتولەلەر مەن پاركينگتەردى پانالاۋ ورىندارى رەتىندە قاراستىرىپ وتىرمىز. الدىن الا ەسەپتەۋىمىز بويىنشا، بۇل جەرلەردە 14 ميلليونعا جۋىق ادامدى ورنالاستىرۋعا بولادى”، – دەدى ءارىنوۆ.
ءمينيستردىڭ سوزىنشە، ساۋدا ورتالىقتارىنىڭ يەلەرى توتەنشە جاعداي كەزىندە پاركينگتەرىن حالىققا ۋاقىتشا قورعانىس ورنى رەتىندە پايدالانۋعا كەلىسىم بىلدىرگەن.
“ستراتەگيالىق جانە وندىرىستىك نىسانداردا ورنالاسقان بومباپانالاردىڭ 70%-ى جەكەمەنشىككە تيەسىلى. بۇل ورىندار ەڭ الدىمەن كاسىپورىن قىزمەتكەرلەرىن قورعاۋعا ارنالعان. ال ولاردىڭ جەكە مەنشىككە بەرىلۋى زاڭعا قايشى ەمەس”، — دەدى ول.
دەگەنمەن مۇنداي قورعانىس ورىندارىنىڭ قازىرگى جاعدايى الاڭداۋشىلىق تۋعىزاتىنىن دا جاسىرمادى.
“ءبىز بۇل ماسەلەنى باقىلاۋدا ۇستاپ وتىرمىز. بارلىق بومباپانالارعا ينۆەنتاريزاسيا جۇرگىزىپ، ولاردى جەرگىلىكتى بيلىكپەن بىرگە ارنايى تىزىمگە ەنگىزەمىز. بۇرىن كاسىپورىندار وزدەرىنە تيەسىلى بۇل ورىنداردى بۇزىپ، باسقا ماقساتتا پايدالانىپ كەلگەن. بۇدان بىلاي مۇنداي ارەكەتتەرگە جول بەرىلمەيدى – ءبارى قاتاڭ باقىلاۋدا بولادى”، – دەپ سەندىردى مينيستر.
رەسمي مالىمەتكە سايكەس، ەلدەگى ونەركاسىپتىك نىسانداردا مىڭنان استام بومبادان قورعانۋ ورنى بار.
