الماتى ماڭىندا اپاتقا ۇشىراعان Bek Air ۇشاعى ۇشۋعا دەيىنگى دايىندىق رەتتەلمەگەن ءتۇرلى تەحنيكالىق رەگلامەنتتەردىڭ “اراسىندا” قالىپ، سول سەبەپتى “جاعدايدىڭ تۇتقىنىنا اينالدى”. مۇنداي مالىمدەمەنى باس كولىك پروكۋراتۋراسى جاسادى، دەپ حابارلايدى Dalanews.kz.
مەكەمەنىڭ مالىمەتىنشە، سالالىق قاۋىپسىزدىككە قاتىستى زاماناۋي تالاپتارعا ساي كەشەندى زاڭنامانىڭ جوقتىعى وسىنداي ماسەلەلەردى تۋدىرعان. ۆەدومستۆونىڭ سوزىنشە، ۇزاق ۋاقىت بويى اۋە كولىگى سالاسىنداعى ماڭىزدى پروسەستەر بىر-بىرىمەن بايلانىسپاعان ىشكى ەرەجەلەرمەن عانا رەتتەلىپ كەلدى، ال كولىك مينيسترلىگىندە وسى باعىتتا ناقتى نورماتيۆتىك-قۇقىقتىق اكتىلەر قابىلداۋعا زاڭدى وكىلەتتىك بولماعان.
پروكۋرورلار باستاماسىمەن جاڭا زاڭعا وزگەرىستەر ەنگىزىلىپ، ۇشاقتاردى مۇزدان قورعاۋ ەرەجەلەرى بەكىتىلدى. بۇل تەك اۆياسيا سالاسى عانا ەمەس، تەمىرجول مەن اۆتوكولىك ينفراقۇرىلىمىندا دا شەشىمىن تاپپاعان ماسەلەلەر بار. ماسەلەن، تەمىرجولداعى ۆاگونداردى جوندەۋ جانە جوندەۋ كاسىپورىندارىنا قويىلاتىن بىلىكتىلىك تالاپتارى ءالى كۇنگە دەيىن “قازاقستان تەمىر جولى” كومپانياسىنىڭ ىشكى اكتىلەرىمەن عانا شەكتەلگەن. ال زاڭعا سايكەس، مۇنداي پروسەستەر نورماتيۆتىك-قۇقىقتىق تارتىپتە رەتتەلۋى كەرەك. باس كولىك پروكۋراتۋراسىنىڭ تالاپ ەتۋىمەن كولىك مينيسترلىگى ءتيىستى نورماتيۆتىك-قۇقىقتىق اكتىلەردى ازىرلەۋ ءۇشىن ۆەدومستۆوارالىق جۇمىس توبىن قۇردى.
ەل ىشىندەگى اۆتوجولدار قاۋىپسىزدىگى دە ءدال وسىنداي ولقىلىقتارعا تاپ بولىپ وتىر. ءقاۋىپتى ۋچاسكەلەردە ءجيى ورىن الاتىن جول-كولىك وقيعالارىنىڭ الدىن الۋ تەتىكتەرى ايقىن ەمەس، ال كولىك مينيسترلىگىندە زاڭدى تۇردە ىقپال ەتەتىن وكىلەتتىكتەر بولمادى. پروكۋراتۋرا ۇسىنىسىنان كەيىن “جول قوزعالىسى تۋرالى” زاڭعا تولىقتىرۋلار ەنگىزۋ قارالىپ جاتىر. سونىمەن بىرگە توتەنشە جاعدايلار مينيسترلىگى تراسسالارداعى مەديسينا-سپاساتەلنىي پۋنكتتەردىڭ ورنىن انىقتايتىن ارنايى ادىستەمە بەكىتتى. بۇل دەر كەزىندە كومەك كورسەتۋگە جاعداي جاسايدى.
بۇعان دەيىن 300 شاقىرىمدىق ماگيسترالدىق جول جابىلىپ، 400-گە جۋىق ۆاگوننىڭ پايدالانىلۋىنا تىيىم سالىنعانى حابارلانعان. الداعى ۋاقىتتا كولىك پروكۋراتۋراسى رەسپۋبليكاداعى بارلىق كولىك ينفراقۇرىلىمىنداعى نەگىزگى ءۇش ماسەلەنى جويۋدى كوزدەپ وتىر.
