ءماجىلىس دەپۋتاتى مۇرات ابەنوۆ قازاقستاندا قالىڭدىق ۇرلاۋدى قىلمىستىق جاۋاپكەرشىلىككە تارتۋ تۋرالى ۇسىنىسىن ءتۇسىندىردى، دەپ حابارلايدى Dalanews.kz.

ول بۇل ۇسىنىستى قىلمىستىق، قىلمىستىق-اتقارۋ جانە قىلمىستىق-پروسەستىك كودەكستەردى وڭتايلاندىرۋ ماسەلەلەرى بويىنشا زاڭ جوباسى اياسىندا ەنگىزگەنىن اتاپ ءوتتى.

“مەن ءتيىستى تۇزەتۋ ەنگىزىپ، ۇسىنىس جاسادىم، ءقازىر ول جۇمىس توبىنىڭ قاراۋىندا. ءارتۇرلى جاۋاپكەرشىلىك تۇرلەرى قاراستىرىلعان، سونىڭ ىشىندە قىلمىستىق جازا – 3 جىلدان 5 جىلعا دەيىن باس بوستاندىعىنان ايىرۋ، ايىپپۇل سالۋ، قوعامدىق جۇمىستارعا تارتۋ. بارلىعى جاعدايعا بايلانىستى بەلگىلەنەدى. ەگەر بۇل قىلمىس بىرنەشە ادامنان قۇرالعان توپپەن جاسالسا، ەگەر جابىرلەنۋشى كامەلەتكە تولماعان بولسا نەمەسە ونىڭ دەنساۋلىعىنا زيان كەلتىرىلسە، وندا جازا اۋىر بولۋى ءتيىس. ويتكەنى، بۇل – ادامنىڭ ەركىنەن تىس ۇرلاۋ، ونى ۇيدە ماجبۇرلەپ ۇستاۋ، پسيحولوگيالىق جانە فيزيكالىق قىسىم كورسەتۋ. زاڭ جابىرلەنۋشىنىڭ جاعىندا بولۋى كەرەك”، – دەدى دەپۋتات.

2024 جىلى 4 جەلتوقساندا ءماجىلىس دەپۋتاتتارى مۇرات ابەنوۆ پەن ەدىل جاڭبىرشين “مادەنيەت تۋرالى” زاڭعا ەنگىزىلەتىن تۇزەتۋلەردى تالقىلاۋ بارىسىندا قالىڭدىق ۇرلاۋ ارەكەتتەرىن سىنعا الدى. ولاردىڭ پىكىرىن ءماجىلىس ءتوراعاسى ەرلان قوشانوۆ تا قولدادى. دەپۋتاتتار قالىڭدىق ۇرلاۋ ءۇشىن قىلمىستىق كودەكستە جەكە باپ ەنگىزۋدى ۇسىندى.