اقوردادا مەملەكەتتىك كەڭەسشى ەرلان ءقاريننىڭ توراعالىعىمەن بالالاردىڭ قاۋىپسىزدىگىن قامتاماسىز ەتۋ، كامەلەتكە تولماعاندارعا قاتىستى قۇقىقبۇزۋشىلىقتاردىڭ الدىن الۋ ماسەلەلەرىنە ارنالعان جيىن ءوتتى، - دەپ حابارلايدى Dalanews.kz.
باسقوسۋعا وقۋ-اعارتۋ ءمينيسترى، سونداي-اق عىلىم جانە جوعارى ءبىلىم، دەنساۋلىق ساقتاۋ، سيفرلىق دامۋ، يننوۆاسيالار جانە اەروعارىش ونەركاسىبى، ىشكى ىستەر مينيسترلىكتەرىنىڭ، باس پروكۋراتۋرانىڭ، پرەزيدەنت اكىمشىلىگى قۇرىلىمدىق بولىمشەلەرىنىڭ وكىلدەرى، بالا قۇقىقتارى جونىندەگى ۋاكىل قاتىستى.
مەملەكەتتىك كەڭەسشى قازىرگى تاڭدا بالالاردى قورعاۋ ءۇشىن مەملەكەت تاراپىنان ءبىرقاتار پارمەندى شارا قابىلدانىپ جاتقانىنا نازار اۋداردى. اتاپ ايتقاندا، مەكتەپ پسيحولوگتارىنىڭ، الەۋمەتتىك پەداگوگتەردىڭ جانە پسيحولوگيالىق قولداۋ ورتالىقتارىنىڭ كادرلىق قۇرامى كۇشەيتىلدى. «111» قىزمەتىنىڭ QR-كودى ازىرلەنىپ، بارلىق وقۋ ورىندارىنا ورنالاستىرىلۋدا. «كيبەرقاداعالاۋ» جۇيەسى ارقىلى ينتەرنەتتەگى زياندى كونتەنت جويىلىپ جاتىر.
ەرلان قارين بىلتىر مەملەكەت بىرنەشە جەدەل ءارى ستراتەگيالىق شارالار قابىلداعانىن، سونىڭ ناتيجەسىندە بالالار اراسىندا وزىنە-وزى قول جۇمساۋ وقيعالارى ايتارلىقتاي ازايعانىن اتاپ ءوتتى.
مەملەكەتتىك كەڭەسشى وسى باعىتتاعى جۇمىستاردى جالعاستىرىپ، بالالاردىڭ قاۋىپسىزدىگىن قامتاماسىز ەتەتىن ءتيىستى شارالار قابىلداۋدى ۇيلەستىرۋ جونىندە تاپسىرما بەردى.
