"روساتومنىڭ" باس ديرەكتورى الەكسەي ليحاچيەۆ پەن اتالعان رەسەيلىك مەملەكەتتىك كورپوراسيانىڭ ءبىرقاتار توپ-مەنەدجەرلەرى اقش قارجى مينيسترلىگى جاريالاعان Sdn-List-كە (بۇعاتتاۋعا نەمەسە شەكتەۋگە جاتاتىن ايىرىقشا كورسەتىلگەن تۇلعالار ءتىزىمى) ەندى. ال رەسەيدىڭ بۇل كومپانياسى قازاقستان ۇكىمەتىنىڭ ەلىمىزدە اتوم ەلەكتر ستانسياسىن سالۋ جونىندەگى كونسورسيۋمىنىڭ الەۋەتتى قاتىسۋشىلار تىزىمىندە بارىن باسا اتاي كەتەلىك، دەپ جازادى Dalanews.kz.
ينتەرفاكستىڭ مالىمەتىنشە، بۇل تىزىمدە الەكسەي ليحاچيەۆتەن بولەك ونىڭ ءبىرىنشى ورىنباسارلارى كيريلل كوماروۆ پەن الەكساندر لوكشين، سونداي-اق باس ديرەكتوردىڭ ءۇش ورىنباسارى: ماشينا جاساۋ بويىنشا – اندرەي نيكيپەلوۆ، ەكونوميكا جانە قارجى بويىنشا - يليا رەبروۆ، سيەۆمورپۋت ديرەكسياسىنىڭ ديرەكتورى ۆياچەسلاۆ رۋكشا دا بار.
بۇرىن "روساتومانىڭ" ءارتۇرلى قۇرىلىمدارى باتىس سانكسيالارىنا ۇشىراعان. اتاپ ايتقاندا، امەريكالىق SDN list تىزىمىنە Umatex، "رۋساتوم وۆەرسيز"، "اتومفلوت"، "روساتوم سيفرلىق شەشىمدەرى"، "روساتوم ميكروەلەكترونيكا"ەنگىزىلدى. ۇلىبريتانيا "روساتومنىڭ" باس ديرەكتورى الەكسەي ليحاچيەۆكە، "اتومفلوتقا" جانە "رەنەرا" كومپانيالارىنا قاتىستى سانكسيالار ەنگىزدى.
ال 2028 جىلدان باستاپ رەسەي ۋرانىن اقش-قا يمپورتتاۋعا تىيىم سالىنباق. بۇعان جاۋاپ رەتىندە قاراشا ايىندا رەسەي ۇكىمەتى بايىتىلعان ۋراننىڭ اقش-قا ەكسپورتىن ۋاقىتشا شەكتەدى.
ال بۇل جاعىمسىز حابار "روساتومنىڭ" جوسپارلارىنا كەرى اسەر ەتە الادى ما؟ كومپانيانىڭ ءوزى بۇل رەتتە بىلاي دەيدى:
"رەسەيدىڭ مەملەكەتتىك كورپوراسياسى - "روساتوم" باسشىلىعىنا قاتىستى ەنگىزىلگەن سانكسيالار "نەگىزسىز" جانە "زاڭسىز". بۇگىنگى تاڭدا "روساتوم" حالىقارالىق نارىقتاعى اتوم ەنەرگەتيكالىق تەحنولوگيالارى ەكسپورتىنىڭ الەمدىك كوشباسشىسى رەتىندە تانىلادى، سوندىقتان سانكسيالار دوستاس ەمەس مەملەكەتتەر تاراپىنان جوسىقسىز باسەكەلەستىكتىڭ ەلەمەنتى رەتىندە قابىلدانادى. "روساتوم" كومپانياسىنىڭ "كۇشەيتىلگەن سانكسيالىق قىسىم" رەجيمىندە ءومىر ءسۇرىپ جاتقانىنا ءۇش جىلدىڭ ءجۇزى بولدى. سوندىقتان ءبىز وعان بەيىمدەلىپ، كەز-كەلگەن دامۋعا دايىنبىز. "روساتوم" "سەرىكتەستەر الدىندا العان مىندەتتەمەلەرىن تولىق كولەمدە ورىنداۋدى جالعاستىراتىن بولادى".
ايتا كەتسەك، 2024 جىلى 17 جەلتوقساندا "روساتومنىڭ" "قازاتومونەركاسىپپەن" بىرلەسكەن كاسىپورىندارداعى كەيبىر ۇلەستەرىن ساتىپ جاتقانى ءمالىم بولدى. "روساتوم" مەملەكەتتىك كورپوراسياسىنىڭ كومپانيالار توبىنا كىرەتىن "ۋرانيۋم ۋان گرۋپ" اق "زارەچنوە" بك" اق-تاعى وزىنە تيەسىلى 49،979%، "حوراسان-U-داعى" 30% جانە "قىزىل قۇمداعى" 30% ۇلەسىن قىتايلىق كومپانيالارعا ساتتى. بۇگىندەرى شەتەلدىك ساراپشىلار بۇعان "قازاتومونەكاسىپتىڭ" باتىس سانكسيالارىنا ۇشىراۋ ىقتيمالدىلىعىنان قورقىپ، "روساتومعا" ءوتىنىش جاساۋى تۇرتكى بولۋى مۇمكىن دەگەن بولجامدى ايتادى.
