اقمولا وبلىسىندا ەر ادام “چات رۋلەتكا” قوسىمشاسى ارقىلى ۇلتارالىق ارازدىقتى قوزدىرعانى ءۇشىن ءۇش جىل التى ايعا باس بوستاندىعىنان ايىرىلدى، دەپ حابارلايدى Dalanews.kz.
بۇل تۋرالى باس پروكۋراتۋرانىڭ باسپا ءسوز قىزمەتى ءمالىم ەتتى.
“اقمولا وبلىسى استراحان اۋدانىنىڭ پروكۋراتۋراسى ۇلتارالىق ارازدىقتى قوزدىرۋ فاكتىسى بويىنشا قىلمىستىق ءىس بويىنشا كورسەتىلىم پروسەسىن ۇيىمداستىردى. ايىپتالۋشى ءۇش جىل التى ايعا باس بوستاندىعىنان ايىرىلدى”، – دەلىنگەن سەنبى كۇنگى حابارلامادا.
ءىس ماتەريالدارىنا سايكەس، 2024 جىلدىڭ جازىندا ەر ادام ماساڭ كۇيدە شەتەلدىك ازاماتپەن “چات رۋلەتكا” قوسىمشاسى ارقىلى سويلەسكەن. اڭگىمە بارىسىندا ول باسقا ۇلت وكىلدەرىنە بالاعات سوزدەرمەن قاتار قورلايتىن پىكىرلەر دە ايتقان.
ساراپتاما ونىڭ سوزدەرىندە ۇلتارالىق ارازدىقتى قوزدىرۋ بەلگىلەرى بار ەكەنىن راستادى. مەملەكەتتىك ايىپتاۋشىنىڭ دالەلدەرىمەن كەلىسكەن سوت ايىپتالۋشىنى كىنالى دەپ تانىپ، ۇكىم شىعاردى.
ەسكە سالايىق، وتكەن جىلى 21 جاستاعى الماتىلىق ەلينا ليۋ قازاق ءتىلى تۋرالى ايتقان بەيادەپ سوزدەرى ءۇشىن ەكى جىلعا سوتتالعان ەدى. سوت ونى ۇلتارالىق ارازدىق تۋدىرعانى ءۇشىن كىنالى دەپ تاپتى.
جۋرناليست ميحايل كوزاچكوۆتىڭ تەلەگرام-ارناسىنداعى اقپاراتقا سۇيەنسەك، وعان زاڭ تۇرعىسىنان ق ر قىلمىستىق كودەكسىنىڭ 174-بابى بويىنشا جازا تاعايىندالعان.
“ەلينا ليۋ وسى جاسىنا دەيىن كوپ نارسەگە قول جەتكىزدى: دۇنيەگە بالا اكەلدى، الەۋمەتتىك جەلىلەرگە تىركەلدى، ەندى مىنە تۇرمەدە وتىر. ول قىلمىستىق كودەكستىڭ 174-بابى “الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋعا، ازاماتتاردىڭ ۇلتتىق ار-نامىسى مەن قادiر-قاسيەتiن نە دiني سەزiمدەرiن قورلاۋعا باعىتتالعان ارەكەتى” ءۇشىن سوتتالدى”، - دەيدى ول.
بەلگىلى بولعانداي، وتكەن جىلدىڭ كۇزىندە ەلينا TikTok جەلىسىندە تىكەلەي ەفير وتكىزەدى. ونى مىڭعا جۋىق كورەرمەن تاماشالاعان. وسى ساتتە جازىلۋشىلاردىڭ ءبىرى ونىڭ ۇلتى مەن ءدىنىن سۇراپ، مەملەكەتتىك تىلدە سويلەۋىن تالاپ ەتەدى. ال جاس قىز بۇل سۇراققا دورەكى جاۋاپ بەرەدى.
“ول قازاق ءتىلىن ۇناتپايتىنىن ايتىپ، بۇل تىلدە تەك “مامبەتتەر” سويلەيتىنىن جەتكىزگەن. سونداي-اق ول الماتىداعى اباي كوشەسىندەگى كەپتەلىستەرگە اۋىلدان كەلگەندەردى كىنالى دەپ ايىپتاعان. قالا بەردى قالادا ەشكىم قازاقشا سويلەمەيتىنىن باسا ايتىپ، جازىلۋشىسىنا ۇرىسقان”، - دەيدى جۋرناليست.
وسىلايشا، ءليۋدىڭ ەفيردەگى ءسوزى ينتەرنەتتە تارالىپ، الەۋمەتتىك جەلىنى باقىلايتىن جەدەل ۋاكىل ونداعى الاۋىزدىق بەلگىلەرىن كورىپ، ەسەپ جازعان.
ساراپشى ليۋ سوزدەرىندە قازاق ۇلتى وكىلدەرىنىڭ ار-نامىسىنا قاتىستى قورلاۋ جانە ۇلتتىق ارازدىق پەن الاۋىزدىقتى قوزدىرۋ بەلگىلەرى بار ەكەنىن العا تارتقان. ناقتىراق ايتساق، “قازاق ۇلتىنىڭ وكىلدەرىن كەمسىتۋ” جانە “قازاق ۇلتىنىڭ ءتىلىن مەنسىنبەۋشىلىك” بار دەگەن قورىتىندىعا كەلگەن.
سوتتا ليۋ وزىنە جازىلۋشىنىڭ مەملەكەتتىك ءتىلدى بىلمەگەننەن كەيىن، قازاقستاننان كەتۋىن تالاپ ەتىپ “ارانداتۋشىلىققا بوي الدىرعانىن ايتقان”. ول كىناسىن مويىنداماي، تەك جاعىمسىز پىكىر جازعانداردىڭ “نامىسىنا تيگىسى كەلگەنىن، “ۇسقىنسىز ءتىل” دەگەن ءسوزدى قازاق تىلىندەگى بەيادەپ سوزدەرگە قاتىستى ايتقانىن تۇسىندىرگەن. ءبىراق سۋديا قاليما دۋانبەكوۆا ونىڭ جاۋابىن قاناعاتتاندىرمادى.
"سوت ءليۋدىڭ كىناسىنىڭ دالەلدەنگەنى تۋرالى قورىتىندىعا كەلىپ، ول ءوزىنىڭ ىس-ارەكەتىمەن ۇلتارالىق الاۋىزدىقتى تۋدىرعانىمەن، ۇلتتىق ار-نامىس پەن قادىر-قاسيەتتى قورلاۋمەن، ازاماتتاردىڭ قازاق ۇلتى وكىلدەرىنىڭ نامىسىنا تيگەن. ءليۋدىڭ سوزدەرى قازاقستان رەسپۋبليكاسىنىڭ ازاماتتارىنا ازاماتتىق جانە ساياسي دەسترۋكتيۆتى كوزقاراس تۋدىرادى"، – دەلىنگەن سوت ۇكىمىندە.
ناتيجەسىندە سوت ونى ۇلتارالىق الاۋىزدىقتى قوزدىرعانى ءۇشىن كىنالى دەپ تاۋىپ، ەكى جىلعا سوتتادى. ەلينا جازاسىن تومەنگى قاۋىپسىزدىك كولونياسىندا وتەيدى. ال بالاسى اجەسىنىڭ تاربيەسىنە بەرىلدى. ۇكىم ءالى زاڭدى كۇشىنە ەنگەن جوق.
