لوس-اندجەلەستە ورمان ورتەنىپ، سالدارىنان 10 ادام قازا تاپتى، دەپ حابارلايدى Dalanews.kz.

Fox News تەلەارناسىنىڭ مالىمەتىنشە، 10 مىڭنان استام ءۇي وتقا ورانعان. ال ورتەنگەن اۋماقتىڭ جالپى كولەمى 12 مىڭ گەكتاردان استى.

ايتا كەتەيىك، كاليفورنيا شتاتىنداعى ورمان ءورتى 7 قاڭتاردا باستالدى. بۇل مىڭداعان ادامنىڭ ومىرىنە ءقاۋىپ ءتوندىرىپ وتىر. جالپى العاندا، جەتى ءىرى ءورت وشاعى تىركەلگەن، ولاردىڭ ءبىرى لوس-اندجەلەستىڭ ايگىلى گولليۆۋد توبەلەرىن شارپىعان. سونداي-اق ورتتەن شوۋ-بيزنەس جۇلدىزدارىنىڭ ەليتالىق ۇيلەرى دە زارداپ شەكتى. الدىن الا باعالاۋ بويىنشا، ماتەريالدىق شىعىن 50 ميلليارد دوللاردان اسادى.

جاعداي ءالى دە كۇردەلى. اپات بولعان ايماقتان 180 مىڭنان استام ادامدى شۇعىل ەۆاكۋاسيالاۋ تۋرالى بۇيرىق بەرىلدى. جەرگىلىكتى بيلىك پەن قۇتقارۋشىلار ءورتتى اۋىزدىقتاۋ ءۇشىن بار كۇشىن سالىپ جاتىر. الايدا اپات ازىرگە باسىلماي تۇر.

سونىمەن قاتار لوس-اندجەلەس پوليسياسى مەن قۇتقارۋشىلارى ورتپەن عانا ەمەس، قىلمىسپەن دە كۇرەسىپ جاتىر. ولار ەۆاكۋاسيالانعان تۇرعىنداردىڭ ۇيلەرىن تونادى دەگەن كۇدىكپەن 20 ءمارودوردى ۇستادى.

ەسكە سالايىق، بۇعان دەيىن “حالىقارالىق باعدارلامالار ورتالىعى” اق – “بولاشاق” باعدارلاماسىنىڭ اكىمشىسى كاليفورنيا شتاتىندا ورىن الىپ جاتقان ورتكە بايلانىستى مالىمدەمە جاساعان ەدى.

“حالىقارالىق باعدارلامالار ورتالىعى” اق كاليفورنيا شتاتىنداعى ورمان ورتىمەن بايلانىستى جاعدايدى مۇقيات باقىلاۋدا. اقش-تىڭ كاليفورنيا شتاتىندا قازاقستاننىڭ 73 ستيپەندياتى ءبىلىم الىپ جاتىر، ونىڭ ىشىندە “بولاشاق” باعدارلاماسى بويىنشا 56 ستۋدەنت جانە “عىلىمي تاعىلىمداما” باعدارلاماسى بويىنشا 17 ستۋدەنت وقۋعا بارعان”، – دەلىنگەن جۇما كۇنگى حابارلامادا.

مالىمدەمەدە بارلىق ستيپەندياتتىڭ ءقاۋىپسىز جەردە ەكەنى جانە كۋراتورلارمەن بايلانىستا ەكەنى ايتىلعان.

“ستيپەندياتتار جەرگىلىكتى بيلىك ۇسىنعان نۇسقاۋلىقتاردى ورىنداپ، ءبىزدى جاعداي تۋرالى جەدەل حاباردار ەتىپ وتىر. ءبىز ۋنيۆەرسيتەتتەرمەن تۇراقتى بايلانىستامىز جانە كەز كەلگەن وزگەرىستەرگە دايىنبىز"، – دەپ سەندىردى ورتالىق.

سونىمەن قاتار ستيپەندياتتارعا قاۋىپسىزدىك شارالارىن قاتاڭ ساقتاۋ قاجەتتىگىن ەسكەرتتى.