اتى اياقاستىنان وزگەرگەن بالا
– تالانتى تاس جارىپ، ميلليونداعان جۇرەكتى تاماشا انىمەن، سيرەك كەزدەسەر داۋسىمەن باۋراعان ديماش ءقازىر كۇللى قازاقتىڭ ديماشىنا اينالدى. بۇل سىزدەرگە دە ۇلكەن ماقتانىش ەكەنى ءسوزسىز. كۇللى الەمدى اۋزىنا قاراتقان دارىندى ۇلدىڭ وسكەن ورتاسى، وتباسى مەن بالالىق شاعى قالاي ءوتتى؟
– ديماش اكە-شەشەمنىڭ باۋىرىندا ءوستى. ول دۇنيەگە كەلگەندە جۇبايىم سۆەتا – ينستيتۋتتىڭ ستۋدەنتى، ال مەن وقۋدى جاڭادان بىتىرگەن جاس مامان ەدىم. ۇيدە ءۇش بالانىڭ ىشىندەگى جالعىز ۇل بولعاندىقتان، اكە-شەشەم مەنىڭ قامىمدى كۇيتتەپ، ۇنەمى قامقور بولىپ، جانىمدا ءجۇردى. ديماشتى دا جۇمىسىنان، ساباعىنان الاڭداماسىن، تۇنگى ۇيقىلارى تىنىش بولسىن دەپ ءوز قاستارىنا الدى. اكە-شەشەمىزدى «ماما، پاپا» دەيمىز. ديماش تا ءتىلى شىققاندا اتا-اجەسىن «ماما، پاپا»، ءبىزدى «اعاتاي، اپاتاي» دەپ كەتتى.
اتا-اجەسىنىڭ ىستىق ىقىلاسىنا بولەنىپ وسكەن بالا جامان بولمايدى. ديماش تا قازاقى تاربيەنىڭ قازانىندا قايناپ، مەيىرىمگە بولەنىپ، ەمىنەركىن ءوستى. اتا-انام بەس جاسىنان ونى مەكتەپكە جەتەلەپ اپارىپ، جەتەلەپ الىپ كەلەتىن. ءبىر ءسات قاستارىنان تاستاعان ەمەس.
ديماشتىڭ قارىنداسى مەن ءىنىسى بار. ءۇش بالامىز دا وتباسىندا مەيىرىمگە بولەنىپ ءوسىپ كەلەدى. قىزىم راۋشان ءوزىنىڭ ىنتا تالابىمەن نازاربايەۆ زياتكەرلiك مەكتەبىنە وقۋعا تۇسكەن. ءقازىر ول 9-سىنىپتا وقيدى. كىشى ۇلىم ءابىلمانسۇر – 4-سىنىپتىڭ وقۋشىسى. ول دا مۋزىكاعا بەيىم. دومبىرادا ءتاۋىر وينايدى. ەستۋ قابىلەتى دە اعاسى ديماشتىكىندەي. ەرتەڭگى كۇنى ول دا ونەر سالاسىن تاڭداپ جاتسا، قولىنان قاقپايمىز.
– ديماشتىڭ شىن ءاتى-جونى دىنمۇحاممەد بولار…
– راسىندا دا، ونىڭ ءتولقۇجاتتاعى ەسىمى – دىنمۇحاممەد قۇدايبەرگەن. ەركەلەتىپ، ءبارىمىز ديماش دەپ كەتكەنبىز. كوپشىلىككە دە ديماش بوپ تانىلدى.
جۇبايىم سۆەتانىڭ ديماشقا اياعى اۋىر. اكەم ىشتەگى ءسابيدى كۇتىپ جۇرگەندە «ەر بالا بولسا، ەسىمى ماناربەك بولادى» دەپ جۇرەتىن. سەبەبى، ماناربەك دەگەن اكەمنىڭ ەرەكشە قۇرمەت تۇتاتىن ستۋدەنتتىك كەزىندەگى دوسى بولاتىن. اكەمىزگە قارسى كەلۋ قايدا، سولاي-اق بولسىن دەپ جۇرە بەردىك. ءتىپتى الگى ەسىمنىڭ قۇلاعىمىزعا ءسىڭىسىپ كەتكەنى سونداي، ودان باسقا ات ويىمىزعا دا كەلگەن ەمەس. ءبىراق جاعداي اياقاستى وزگەردى. بىردە اكەم ەكەۋمىز باقتىعالي دەگەن اعامىزدىڭ ۇيىنە سالەمدەسە باردىق. ول دا اكەمنىڭ ستۋدەنت شاقتان بىرگە كەلە جاتقان دوسى بولاتىن. توردە جاسى توقسانعا كەلىپ قالعان اعامىزدىڭ اناسى دانەكەر اجەمىز وتىرعان. سابىرلىعىنان-اق ول كىسىنىڭ تەكتىلىگى اڭعارىلىپ تۇراتىن. شاي ءىشىپ بولعان سوڭ اجەمىز اكەمە قاراتا: «قۇدايبەرگەن، مەن ءبىر جاقسى ءتۇس كوردىم. نەمەرەلى بولاسىڭ، اتىن مۇحاممەد قويىڭدار!» دەدى. ءسال تاڭدانىپ قالدىق، دەگەنمەن، ۇلكەندى سىيلاپ وسكەن حالىقپىز، «اپا، ايتقانىڭىز بولسىن!» دەپ اكەم بىردەن كەلىسىمىن بەردى.
بىرەر كۇننەن كەيىن ومىرگە كەلگەن سابيگە اجەمىزدىڭ ايتقان اتى قويىلدى. وتباسىندا اقىلداسا كەلە، «ەرتەڭگى كۇنى بالا بولىپ تەنتەكتىك جاساسا، قاسيەتتى اتقا ءتىل ءتيۋى مۇمكىن. سوندىقتان دىنمۇحاممەد، ەركەلەتە ديماش دەپ قويايىق» دەستىك. وسىلايشا، تۇڭعىشىمىزدىڭ ەسىمى اياقاستىنان وزگەرىپ، دىنمۇحاممەد بولىپ كەتتى.
«سلاۆيان بازارى» ۇلكەن مەكتەپ بولدى
– ۇلىڭىزدىڭ تالانتىنا باس يگەن قالىڭ جۇرتشىلىق تەلەبايقاۋدىڭ ءاربىر كەزەڭىن قالت جىبەرمەي، ديماشتىڭ جەڭىسكە جەتۋىن ىشتەي تىلەپ وتىر. البەتتە، بۇل ونىڭ العاشقى بايقاۋى ەمەس. بۇگىنگە دەيىن ول تالاي حالىقارالىق كونكۋرستارعا قاتىسىپ، جەڭىمپاز اتانعانىن جاقسى بىلەمىز. بالاڭىزدىڭ بويىنداعى دارىنى العاش رەت قاشان بايقالدى؟
– جۇبايىم سۆەتا ەكەۋىمىز دە ونەر ادامدارى بولعاننان كەيىن وسى سالادا جاقىن ارالاساتىن دوس-جاراندار كوپ. ءوزىمىز تۇراتىن اقتوبە قالاسىنا گاسترولدىك ساپارمەن كەلگەن انشىلەردىڭ كوپشىلىگى ءبىزدىڭ ۇيگە تۇسپەي كەتپەيدى. ۇلىقپان جولداسوۆ، توقتار سەرىكوۆ، سايات مەدەۋوۆ، دوسىمجان تاڭاتاروۆ، «مۋزارت» توبى سەكىلدى قازاقتىڭ تالانتتى ۇل-قىزدارى ۇيىمىزدەن تالاي رەت ءدام تاتتى. وسى ونەرپاز اعا-اپكەلەرىنىڭ اندەرىن قۇلاعىنا ءسىڭىرىپ، ولاردىڭ ورتاسىندا ەمىن-ەركىن ەركەلەپ وسكەن ديماش تا كىشكەنتايىنان ونەرگە بەيىم بولدى. بالا كەزىندە تاماعىن كەنەپ، داۋسىن مىڭ قۇبىلتىپ، نەشە ءتۇرلى انگە باساتىن. ونىڭ مۋزىكاعا دەگەن ايرىقشا قۇمارلىعىن بايقاعان سوڭ، بەس جاسىندا بالالارعا ارنالعان مۋزىكالىق ستۋديانىڭ فورتەپيانو سىنىبىنا وقۋعا بەردىك. كەلەسى جىلى ديماش «اينالايىن» رەسپۋبليكالىق بايقاۋىنىڭ «فورتەپيانو» نوميناسياسى بويىنشا لاۋرەات اتاندى. 2008 جىلى «بايقوڭىردىڭ سىڭعىر داۋىستارى» اتتى بالالار مەن جاسوسپىرىمدەر اراسىنداعى حالىقارالىق كونكۋرستا ءبىرىنشى ورىن الدى. وسى بايقاۋدان شابىتتانىپ كەلگەنى سونداي، «جاس قانات» رەسپۋبليكالىق بايقاۋىنا قاتىسۋدى الدىنا ماقسات ەتىپ قويدى.
ءبىراز ىزدەندى، دايىندالدى. 17 جاسىندا «جاس قاناتتا» باعىن سىناپ، باس جۇلدە – «التىن قاناتتى» جەڭىپ الدى. وسىدان كەيىن ديماشقا ءتۇرلى بايقاۋلارعا قاتىسۋ تۋرالى ۇسىنىس كوپتەپ تۇسە باستادى. ۋكراينادا وتكەن «شىعىس بازارى» حالىقارالىق تەلەبايقاۋىندا تاعى دا باعى جانىپ، 28 ەلدەن كەلگەن ونەرپازداردىڭ ىشىنەن ءبىرىنشى ورىندى يەلەندى. ودان كەيىن قىرعىزستاندا ۇيىمداستىرىلعان حالىقارالىق «مەيكين ازيا» انشىلەر فەستيۆالىندە باس جۇلدەنى جەڭىپ الدى.
– ديماشتىڭ «سلاۆيان بازارى – 2015» حالىقارالىق بايقاۋىنا قاتىسىپ، ول جەردە قازاقتىڭ حالىق ءانى «دايديداۋدى» شىرقاتا سالىپ، گران-پري يەلەنگەنى دە كوز الدىمىزدا…
– ديماشتىڭ ونەرگە دەگەن ەرەك قۇلشىنىسىن بايقاعان سول فەستيۆالدىڭ قازاقستانداعى رەسمي وكىلى، مادەنيەت قايراتكەرى قارلىعاش ابدىكارىموۆا استاناعا ارنايى ىسساپارمەن كەلگەن ۆيتەبسكتەگى «سلاۆيان بازارى» بايقاۋىنىڭ ىرىكتەۋ توبىنا «شابىت» حالىقارالىق فەستيۆالىنىڭ اشىلۋ سالتاناتىندا قوناق رەتىندە ونەر كورسەتكەن ديماشتى سىرتتاي تانىستىرعان ەكەن. بەلورۋس تاراپى جاقسى باعالاپ، قىزىعۋشىلىق تانىتىپ، بايقاۋعا قاتىسۋعا ۇسىنىس جاسادى. كەيىنىرەك رەسمي شاقىرۋ الدىق.
جالپى مۇنداي بايقاۋلارعا قاتىسۋدىڭ ارتىقشىلىعى سول، ونەر ولكەسىنە قادام باسقان جاستار قارىم-قابىلەتىن شىڭداپ، بولاشاققا دەگەن تالپىنىسىن ارتتىرۋعا مۇمكىندىك الادى. ديماشقا «سلاۆيان بازارى» ۇلكەن مەكتەپ بولدى. كىل جۇيرىكتەر قاتىسقان دودادا كاسىبي وركەسترمەن ءان شىرقاپ، ۇلكەن تاجىريبە جيناقتاپ قايتتى.
– ديماش سەكىلدى ونەردە جۇرگەن تالانتتى جاستارعا مەملەكەت تاراپىنان قولداۋ بار ما؟
– ەلىمىزدە وقيمىن، وسەمىن دەگەن جاستارعا قولداۋ كوپ. قازىرگى تاڭدا كوپتەگەن جاستار ءتۇرلى باعدارلاما ارقىلى شەت مەملەكەتتەردە تەگىن وقىپ، جاقسى ءبىلىم الىپ جاتىر. نەگىزى ونەر ادامى ءوز قازانىندا ءوزى قايناي بەرگەنىنەن ەشتەڭە شىقپايدى. ادام ەل كورىپ، جەر كورىپ، وزگەلەر ارقىلى ءوزىنىڭ ولقى تۇستارىن بايقاپ، كەمشىلىكتەرىن تۇزەپ، تاجىريبە جيناقتاسا – وركەندەي تۇسەدى. وسى جاعىنان الىپ قاراعاندا، قازاقستاندىق جاستار مەملەكەت تاراپىنان قولداۋدان كەندە ەمەس. ديماش وقيتىن قازاق ۇلتتىق ونەر ۋنيۆەرسيتەتىنىڭ ستۋدەنتتەرى ازيا مەن ەۋروپانىڭ تالاي ەلىن ارالاپ، كوپتەگەن بايقاۋدان جۇلدەلى ورالىپ جۇرگەنىن كورىپ ءجۇرمىز. «بۇلاق كورسەڭ – كوزىن اش» دەيدى حالقىمىز. مۇنىڭ ءبارى جاستاردىڭ ءوسۋى ءۇشىن مادەنيەت سالاسىنىڭ باسشىلىعى، مينيسترلىك تاراپىنان جاسالىپ جاتقان جۇيەلى ءىستىڭ ناتيجەسى.
بۇل بايقاۋ باسقالاردان كۇردەلىرەك…
– جۇرتشىلىقتىڭ ءبارى دەمىن ىشىنە تارتا باقىلاپ وتىرعان قىتايدىڭ I am a Singer تەلەبايقاۋىنا قاراي اڭگىمەمىزدى بۇرساق. ديماش بۇل بايقاۋعا قالاي كەلدى؟
– وتكەن جىلى ەرتاي ءنۇسىپجانوۆ اتتى ازامات حابارلاسىپ، جۇڭگو ەلىندە وتەتىن وسىناۋ سايىستىڭ عالامتورداعى سىلتەمەسىن جىبەرىپ: «بىرنەشە انشىلەردىڭ اندەرىن كونكۋرستىڭ ۇيىمداستىرۋشىلارىنا جولداماق ەدىم. ديماشتىڭ ورىنداۋىنداعى اندەردى دە جىبەرسەم، قالاي قارايسىز؟» دەپ سۇرادى. سايىستى ينتەرنەت ارقىلى سارالاپ كورىپ، ۇسىنىسقا قارسى بولمادىم. كەيىنىرەك ديماش جۇڭگو ەلىنە بارىپ، ۇيىمداستىرۋشىلار تاراپىنان وتكىزىلگەن ىرىكتەۋ كەزەڭىنە قاتىسىپ كەلدى. ول جاقتاعى ماماندار انشىلەردىڭ مۋزىكا سالاسىنداعى دەڭگەيىن تەكسەرىپ، قاتىسقان ونەر دودالارىمەن تانىسىپ، داۋىستارىنىڭ مۇمكىندىگىن زەرتتەپ، جالپى ينتەللەكتۋالدىق دەڭگەيىنە دەيىن زەردەلەپ كورەدى ەكەن. جان-جاقتى سۇرىپتاۋدان وتكەننەن كەيىن، ديماش قاڭتار ايىندا باستالاتىن وسى بايقاۋعا جولداما الدى.
كونكۋرستىڭ كۇردەلىلىگى سول، سايىسقا ونەر الەمىندە تالاي اسۋلاردان ءوتىپ، ابدەن شىنىققان، تىڭدارماندارىنىڭ قوشەمەتىنە بولەنگەن كاسىبي انشىلەر قاتىسادى. ونەرپازدارعا قويىلاتىن تالاپتار دا قاتاڭ. كونكۋرس قاتىسۋشىلارى بەكىتىلگەن ءاندى ناقىشىنا كەلتىرە ورىنداي الۋى ءوز الدىنا، شىعارمانىڭ تابيعاتىن جان-جاقتى اشىپ، ءتۇرلى قىرىنان تانىتا الۋى كەرەك. ءار كەزەڭنىڭ اراسى – بەس-التى كۇن. وسى مەرزىم ىشىندە جاڭاشا ارانجيروۆكا جاساپ، وركەسترگە لايىقتاپ پارتيتۋراعا ءتۇسىرىپ، وزىڭە بەيتانىس، بوگدە تىلدەگى اۋەننىڭ ءماتىنىن جاتتاپ، جان دۇنيەڭە سىڭىرە ءبىلۋ قاجەت. بۇل – اسا قيىن پروسەسس.
«جۇمىلا كوتەرگەن جۇك جەڭىل». ديماشقا ەل ازاماتتارى، ونەردە جۇرگەن اعالارى، دوستارى كومەگىن كورسەتۋدە. قاسىندا جۇرگەن دوسى الپامىس شاريموۆ، ورالدا ەرلان بەكچۋرين، اقتوبەدە باقىتبەك زەينەلوۆ، اتىراۋدا باۋىرجان اقتايەۆ، الماتىدا ۇلىقپان جولداسوۆ، استانادا دميتريي ۆالەريەۆيچ سىندى ازاماتتار بىرلەسىپ، ديماشتىڭ بەلگىلەپ بەرگەن ءان قۇرىلىمىنا سايكەس، ءار كەزەڭنىڭ شىعارمالارىنىڭ ارانجيروۆكاسىنا اتسالىسىپ، نوتاسىن قاعازعا ءتۇسىرىپ، وڭدەپ، قىتايدىڭ وركەسترىنە ۋاقىتىلى بەرىپ جىبەرۋدە. ناتيجەلەرىن وزدەرىڭىز تىڭداپ جۇرسىزدەر. مادەنيەت جانە سپورت مينيسترلىگى، ديماش وقيتىن قازاق ۇلتتىق ونەر ۋنيۆەرسيتەتىنىڭ ۇجىمى، اقتوبە وبلىسىنىڭ باسشىلىعى ۇلكەن قولداۋ كورسەتىپ وتىر. وسىناۋ سىن ساعاتتا ديماشقا تىلەكشى بولىپ وتىرعان قالىڭ كوپشىلىكتىڭ بارىنە العىسىم شەكسىز.
– كەز كەلگەن جەڭىس وڭاي كەلمەيتىنى بەلگىلى. بايقاۋ بارىسىندا قانداي قوبالجۋلار بولدى؟ ءدال قىتايدا ديماشتىڭ جۇلدىزى جارقىرايدى دەپ ويلادىڭىز ما؟
– ءاربىر ونەر دوداسى – ۇلكەن سترەسس. اسىرەسە، ءوزىڭدى مۇلدە تانىمايتىن بوگدە ەلدە، سىرىن بىلمەيتىن سان مىڭداعان كورەرمەننىڭ الدىندا ونەر كورسەتۋ – وڭاي ەمەس. ءارى حالىقارالىق سايىستارعا ءوزىڭ ءۇشىن عانا ەمەس، تۋعان ەلىڭنىڭ اتىنان دا باسەكەگە ءتۇسىپ، نامىسىن قورعايسىڭ. بۇل – ۇلكەن جاۋاپكەرشىلىك. بايقاۋلاردا باعىمىزدى سىناعان سايىن ءبىز وسىنى سەزىنەمىز. باۋىر ەتىڭ – بالاڭ سايىسقا ءتۇسىپ جاتقاندا قوبالجىماي وتىرا المايسىڭ، ارينە. ديماشتان بۇرىن ءوزىمىز كوبىرەك قينالاتىن سياقتىمىز كەيدە. باسقا ەلدەرگە بارعان كەزدە اۋا رايىنىڭ ارتۇرلىلىگىنە بايلانىستى ديماشقا سالقىن ءتيىپ، سىرقاتتانىپ قالعان كەزدەرى دە بولدى. اۋىرىپ تۇرعان بالانىڭ ساحنادا كۇردەلى اندەردى ورىنداپ تۇرعانىن كورۋ قانداي اۋىر ەكەنىن دە جۇرەگىمىزدەن وتكىزدىك. نەگىزىنەن بالامىزدىڭ دەنساۋلىعى ءۇشىن كوبىرەك قوبالجيمىز.
ەكىنشى سۇراعىڭىزعا كەلسەك، ءوزىم دە ونەر ادامى بولعاندىقتان، ديماشتىڭ داۋىس دياپازونى، قارىم-قابىلەتى، ءان ايتۋ مانەرىن جاقسى بىلەمىن. جالپى ونىڭ بويىنان ىشكى الەۋەتى كۇشتى جانە كورەرمەندى وزىنە باۋراپ الاتىن قاسيەتتى بايقايمىن. قىتايدا دا ونىڭ ايتقان ءانى جاقسى قابىلداناتىنىنا سەنىمدى بولدىق. وسى سەنىمىمىز الداعى ۋاقىتتا دا اقتالادى دەپ ۇمىتتەنەمىن.
– بايقاۋدىڭ ءبىرىنشى تۋرىندا ديماش Sos dun terrien en detresse اتتى فرانسۋز انىمەن سىنعا ءتۇستى. ءاندى قانشالىقتى ءساتتى ورىنداعانىنان حاباردارمىز. الايدا ۆيتاستىڭ «وپەرا 2» انىنەن كەيىن ءبىراز شۋ بولعانىن دا بىلەمىز. شۋ نەدەن شىقتى؟
– بايقاۋدىڭ ەكىنشى كەزەڭىندە ديماش ۇيىمداستىرۋشىلاردىڭ ۇسىنىسىمەن ۆيتاستىڭ ەڭ كۇردەلى سانالاتىن «وپەرا 2» ءانىن شىرقادى. بۇل ەندى بايقاۋدىڭ ۇيىمداستىرۋشىلارى مەن شاعىمدانۋشى اراسىندا بولعان تۇسىنبەستىك بولسا كەرەك. نەگىزى، تىكەلەي وزىمىزگە كەلىپ، شاعىم ايتقان ەشكىم جوق.
لارا فابيانعا دا قازاقى كادەسىي سىيلار ەدىك…
– قازاق ءباسپاسوزى دە، جۇڭگو باسىلىمدارى دا ديماشتىڭ ءستيلى وزگەرگەنىن ايتىپ جاتىر. بالاڭىزدىڭ جەكە ءستيليسى بار ما، الدە بۇل ونىڭ جەكە قالاۋى ما؟
– جالپى ادامنىڭ سانا-سەزىمى ۋاقىت وزعان سايىن جەتىلىپ، دامي تۇسەدى. مىسالى، 17 جاستاعى ديماش پەن 22 جاستاعى ديماشتى سالىستىرا المايسىڭ. جىل وتكەن سايىن كوزقاراس تا، ۇستانىم دا وزگەرەتىنى بەلگىلى. ديماشتىڭ دا ءستيلىن وزگەرتىپ وتىرۋى زاڭدىلىق. ال قىتايداعى ستيلىنە كەلسەك، كونكۋرس بويىنشا جۇمىس ىستەيتىن ارنايى ستيليستەر بار. ولار بىزگە وزىندىك جوبالارىن ۇسىنادى. ال ءبىز كاسىبي ماماندارمەن بىرگە، الگى كوستيۋمدەردى بايقاپ كورىپ، كوڭىلىمىزگە ۇناعاندارىن عانا ساحناعا الىپ شىعامىز.
– ديماشتىڭ ايگىلى دجەكي چانمەن كەزدەسۋدەگى اسەرى جايلى الەۋمەتتىك جەلىدەگى پاراقشاسىنان وقىپ بىلدىك. دجەكي چانعا قازاقتىڭ شاپانىن كيگىزدىڭىزدەر. ەندى لارا فابيان دا ديماشپەن كەزدەسكىسى كەلەدى ەكەن. ايگىلى فابيانعا نە سىيلار ەدىڭىزدەر؟
– جالپى ءبىزدىڭ وتباسىمىزعا جاقسى ادامدار كوپ كەزدەستى. ءوزىمىز دە ادامنىڭ بويىنداعى ءبىر جىلت ەتكەن جاقسى قاسيەتىن كورسەك قۋانىپ، وعان ۇنەمى تىلەكشى بولىپ وتىرامىز. جانىڭدى ساۋلەلەندىرىپ، جۇرەگىڭدى مەيىرىمگە بولەيتىن جاقسى جاندار ءومىرىڭنىڭ شامشىراعى سەكىلدى. ولاردىڭ كوزقاراسى، مىنەز-قۇلقى ومىرىڭە دە شۋاق شاشىپ، بولاشاققا دەگەن سەنىمىڭدى ۇلعايتادى. سەنىم دەگەنىمىز – ماقساتىڭدى ايقىنداي تۇسەتىن جاقسى قاسيەت. ايگىلى دجەكي چانمەن كەزدەسۋدەن كەيىن ديماش ۇيگە ەرەكشە شاتتانىپ كەلدى. «قانداي جاقسى ادام. وسىنشا اتاعىنا قاراماي، وتە قاراپايىم، كىشىپەيىل جان ەكەن» دەپ، قاتتى اسەرلەنگەنىن ايتىپ تاۋىسا المادى. دجەكي چان سەكىلدى جاقسى ازاماتتىڭ جايساڭ مىنەزى ديماشتىڭ بولاشاقتا ءدال سونداي جۇرەگى كەڭ، مىقتى ازامات بولۋعا دەگەن تالپىنىسىن كۇشەيتە ءتۇستى دەپ ويلايمىن.
ال لارا فابيانمەن كەزدەسۋدىڭ مەرزىمى ءالى ناقتىلانعان جوق. قازىرگى كونكۋرس ول تۋرالى ويلاۋعا دا مۇرشا بەرەر ەمەس. ەگەر سايىستان كەيىن ونداي مۇمكىندىك بولىپ جاتسا، فابيانعا مىندەتتى تۇردە قازاقى ناقىشتاعى دۇنيە سىيلايتىنىمىز انىق.
– كەيبىر باسىلىمدار قىتايداعى جۇلدىزدى ساتتەن كەيىن ديماشتىڭ بەدەلى بۇرىنعىدان دا ارتىپ، قالاماقىسى بىرنەشە ەسە كوبەيدى دەپ شۋلاپ جاتىر. بۇل قانشالىقتى راس؟
– ديماشتى ونەر جولىنا باعىتتاعاندا وعان تويدان تابىس تاپقىزا قويايىق دەگەن نيەتىمىز ءاۋ باستان بولعان ەمەس. كەيبىر سارىجاعال اقپارات قۇرالدارى ايتىپ جۇرگەندەي، ديماشتىڭ قالاماقىسى پالەندەي بولىپتى دەگەن سوزدەر شىندىققا ەش جاناسپايدى. ءبىز ونداي اقپارات بەرگەن جوقپىز، تاپ قازىرگى ساتتە ءبىزدىڭ باستى مۇراتىمىز سايىستى ناتيجەلى اياقتاۋ، باسقانى ويلايتىن مۇمكىندىك تە جوق. اتا-انا رەتىندەگى باستى ارمانىمىز – ۇلىمىزدىڭ ازامات بولعانىن كورۋ. ەگەر ول ۇيگە جۇلدەلى ورالىپ جاتسا، وندا ەڭبەگىمىزدىڭ ەش كەتپەگەنى. بۇل ءوزى ءۇشىن – ۇلكەن قۋانىش، ال ءبىز ءۇشىن – ماقتانىش.
– بايقاۋدان كەيىن ونەر جوبالارىنا قاتىسۋعا ۇسىنىس تا كوپ ءتۇسىپ جاتقان بولار.
– ونەر جوبالارىنا قاتىسۋعا دەگەن ۇسىنىس بۇعان دەيىن دە كوپ بولعان. ءقازىر دا بارشىلىق. ءبىراق قايسىسىنا قاتىساتىنىمىزدى بولاشاقتا كورە جاتارمىز. شىعارماشىلىق ادامى ۇنەمى ءوزىن دامىتىپ وتىرعانى ءجون. ءوتىپ جاتقان ءتۇرلى كونكۋرس پەن سايىس ونەر ادامىن وسىرەدى، كەمشىن تۇسىن تۇزەتىپ، تاجىريبە جيناقتاۋعا مۇمكىندىك بەرەدى. سوندىقتان ىڭعايىمىزعا، كوزقاراسىمىزعا، ۇستانىمىزعا ءدوپ كەلىپ جاتسا، نەگە ديماشتىڭ باعىن سىناپ كورمەسكە؟!
– ايتپاقشى، ءسىزدى بالاڭىزدىڭ شىعارماشىلىعىمەن شىنداپ اينالىسۋ ءۇشىن ءوز ەركىڭىزبەن اقتوبە وبلىستىق مادەنيەت باسقارماسى باسشىسى قىزمەتىنەن كەتتى دەپ ەستىدىك. بۇل راس پا؟
– ول راس. ديماش ءتۇرلى ونەر دودالارىنا قاتىسىپ جۇرگەننەن كەيىن ونىڭ كوپتەگەن كونسەرتتىك شارالارى بار. ءارى حالىقارالىق جارىس بولعاننان كەيىن ۇلىمنىڭ قاسىندا ءجۇرىپ، وعان دەمەۋ كورسەتكىم كەلدى. ودان بولەك، وسىدان ءبىراز جىل بۇرىن «ديماش ءالي» اتتى شىعارماشىلىق ورتالىق قۇرعان ەدىك. بۇل ورتالىق جاس ونەرپازدارعا بەينەبايان تۇسىرۋگە، اۋديوجازبالارىن جازۋعا قول ۇشىن بەرەدى. كەلەشەكتە وسى ورتالىعىمىزدىڭ جۇمىسىن دا جانداندىرۋ ماقساتىندا وتباسىممەن اقىلداسا وتىرىپ، وسىنداي شەشىمگە كەلدىم.
– اڭگىمەڭىزگە راقمەت. ديماشتى تەك بيىكتەن كورەيىك!
سۇحباتتاسقان قىمبات توقتامۇرات
دەرەككوزى: aikyn.kz
