رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپتىڭ بۋداپەشتكە جوسپارلانعان كەزدەسۋى قيىنداي ءتۇستى. بۇعان ەۋروپا ەلدەرىنىڭ بىرىنەن سوڭ ءبىرى ءپۋتيننىڭ كەلۋىنە قارسى شىعۋى سەبەپ بولىپ وتىر، دەپ حابارلايدى Dalanews.kz.
دونالد ترامپ جۋرناليستەرگە بەرگەن سۇحباتىندا بۇل كەزدەسۋگە قاتىستى تۇپكىلىكتى شەشىمنىڭ ءالى قابىلدانباعانىن ايتتى. ونىڭ سوزىنشە، ناقتى شەشىم الداعى كۇندەرى جاريالانادى.
پۋتين مەن ترامپتىڭ ۆەنگريا استاناسىندا جۇزدەسەتىنى جونىندە العاشقى اقپارات 16 قازاندا ولاردىڭ تەلەفون ارقىلى سويلەسكەنىنەن كەيىن بەلگىلى بولعان ەدى. سول كەزدە رەسەي پرەزيدەنتىنىڭ باسپا ءسوز حاتشىسى دميتريي پەسكوۆ كەزدەسۋدىڭ جاقىن ارادا وتەتىنىنە ءۇمىت ارتقان ەدى. دايىندىق اياسىندا رەسەي سىرتقى ىستەر ءمينيسترى سەرگەي لاۆروۆ پەن اقش مەملەكەتتىك حاتشىسى ماركو رۋبيونىڭ جەكە كەزدەسۋى جوسپارلانعان.
الايدا 20 قازاندا ولار تەلەفون ارقىلى سويلەسكەننەن كەيىن باتىستىق اقپارات اگەنتتىكتەرى اق ۇيدەگى دەرەككوزدەرگە سىلتەمە جاساپ، سامميتكە دايىندىقتىڭ ۋاقىتشا توقتاعانىن حابارلادى. اقپارات كوزدەرىنىڭ ايتۋىنشا،ترامپ اكىمشىلىگى تاراپتاردىڭ كەلىسسوز وتكىزۋگە ءالى دايىن ەمەس ەكەنىن العا تارتقان. وسىعان بايلانىستى لاۆروۆ پەن رۋبيونىڭ كەزدەسۋى دە كەيىنگە قالدىرىلعان.
ءقازىر جاعداي كۇردەلەنە ءتۇستى: ءبىر جاعىنان ەۋروپا ەلدەرى ءپۋتيننىڭ ساپارىنا اشىق قارسىلىق تانىتسا، ەكىنشى جاعىنان اقش تاراپى كەزدەسۋگە اسا ساقتىقپەن قاراۋدا.
