قاسىم-جومارت توقايەۆ سۋ رەسۋرستارىن ءتيىمدى پايدالانۋ جۇمىسىنىڭ باياۋ ءجۇرىپ جاتقانىن سىنعا الدى، دەپ حابارلايدى Dalanews.kz.
مەملەكەت باسشىسى ديقانداردىڭ ءالى دە سۋدى كوپ قاجەت ەتەتىن داقىلداردى ەگۋدى ازايتپاي وتىرعانىن جانە كەي وڭىرلەردە سۋدى رۇقساتسىز بۇرىپ الۋ فاكتىلەرى جيىلەگەنىن اتاپ ءوتتى. سونداي-اق «قارا نارىقتاعى» سۋ ساۋداسىنا قۇقىق قورعاۋ ورگاندارىنىڭ نازار اۋدارۋىن تاپسىردى.
پرەزيدەنت ارال تەڭىزىن قالپىنا كەلتىرۋ تاجىريبەسىن مىسالعا كەلتىرىپ، سولتۇستىك ارالداعى وڭ وزگەرىستەردى اتاپ ءوتتى.
«كاسپييدىڭ تارتىلۋى – اسا ءىرى ەكولوگيالىق قاتەر. بۇل تەك ءبىر ەلدىڭ عانا ەمەس، بۇكىل ايماقتىڭ تاعدىرىنا قاتىستى ماسەلە»، – دەدى ول.
توقايەۆ ۇكىمەتكە كاسپييدىڭ سۋ رەسۋرستارىن ساقتاۋ جونىندە مەملەكەتارالىق باعدارلاما ازىرلەۋدى تاپسىردى. ونىڭ پىكىرىنشە، قۇجات سەرىكتەس مەملەكەتتەردىڭ ۇيلەسىمدى ءارى جەدەل ارەكەت ەتۋىنە نەگىز بولۋى كەرەك.
