بۇگىن، 2025 جىلى 8 قىركۇيەكتە ق ر پارلامەنتى قوس پالاتاسىنىڭ بىرلەسكەن وتىرىسى الدىندا ءوزىن قاۋمالاعان جۋرناليستەر سۇراقتارىنا ەنەرگەتيكا ءمينيسترى ەرلان اقكەنجەنوۆ جاۋاپ بەردى. ول قازاقستانداعى بەنزين باعاسىنا قاتىستى دا پىكىر ءبىلدىردى، دەپ حابارلايدى Dalanews.kz.
ب ا ق وكىلدەرى دوللار باعامىنىڭ ءوسىپ جاتقانىنا مينيستر نازارىن اۋدارتتى.
"بۇل ارادا دوللارعا بايلاناتىنداي جاعداي جوق بولار. ىشكى سۇرانىستار مەن ۇسىنىستار بار، رەسەي فەدەراسياسىنداعى جاعدايعا بايلانىستى ادامداردىڭ قوبالجۋى بار، قالاي دەگەنمەن دە 7 مىڭ شاقىرىمعا جۋىق شەكارانى اينالىپ ءوتۋىمىز مۇمكىن ەمەس قوي. سوندىقتان، رەسەي وڭىرلەرىندەگى بەنزين تاپشىلىعى ماسەلەسى ءبىزدىڭ ازاماتتارىمىزدا دا بەلگىلى ءبىر دەڭگەيدە الاڭداۋشىلىق تۋعىزۋدا"، - دەدى مينيستر.
ونىڭ ايتۋىنشا، بۇگىنگى تاڭدا ەلىمىزدە اي-95-كە قاتىستى جاعداي تۇراقتى.
"وتكەن اپتادا بىزدە 21 كۇننىڭ، ال ءقازىر 26 كۇننىڭ قورى بار. قور كولەمى ارتىپ، زاۋىتتار تۇراقتى جۇمىس ىستەپ تۇر. اي-92 بويىنشا دا جاعداي وسىنداي. مەنىڭ ويىمشا، رەسەي فەدەراسياسىنداعىداي جاعداي بىزدە قايتالانبايدى"، - دەپ سەندىرەدى اقكەنجەنوۆ.
ول جانار-جاعارمايدى ەلدەن تاسىپ اكەتۋگە سالىنعان تىيىم ۇنەمى ۇزارتىلىپ وتىراتىنىن دا ناقتىلادى.
ايتا كەتسەك، وتكەن اپتادا، ياعني جاڭا وقۋ جىلى الدىندا اي-92 ماركالى بەنزين باعاسى ەلىمىزدەگى مەگاپوليستەردىڭ جانار-جاعارماي قۇيۋ بەكەتتەرىندە 6 تەڭگەگە دەيىن قىمباتتاعانى بەلگىلى.
