Búgin, 2025 jyly 8 qyrkúıekte QR Parlamenti qos palatasynyń birlesken otyrysy aldynda ózin qaýmalaǵan jýrnalıser suraqtaryna energetıka mınıstri Erlan Aqkenjenov jaýap berdi. Ol Qazaqstandaǵy benzın baǵasyna qatysty da pikir bildirdi, dep habarlaıdy Dalanews.kz.

BAQ ókilderi dollar baǵamynyń ósip jatqanyna mınıstr nazaryn aýdartty.

"Bul arada dollarǵa baılanatyndaı jaǵdaı joq bolar. İshki suranystar men usynystar bar, Reseı Federasıasyndaǵy jaǵdaıǵa baılanysty adamdardyń qobaljýy bar, qalaı degenmen de 7 myń shaqyrymǵa jýyq shekarany aınalyp ótýimiz múmkin emes qoı. Sondyqtan, Reseı óńirlerindegi benzın tapshylyǵy máselesi bizdiń azamattarymyzda da belgili bir deńgeıde alańdaýshylyq týǵyzýda", - dedi mınıstr.

Onyń aıtýynsha, búgingi tańda elimizde AI-95-ke qatysty jaǵdaı turaqty.

"Ótken aptada bizde 21 kúnniń, al qazir 26 kúnniń qory bar. Qor kólemi artyp, zaýyttar turaqty jumys istep tur. AI-92 boıynsha da jaǵdaı osyndaı. Meniń oıymsha, Reseı Federasıasyndaǵydaı jaǵdaı bizde qaıtalanbaıdy", - dep sendiredi Aqkenjenov.

Ol janar-jaǵarmaıdy elden tasyp áketýge salynǵan tyıym únemi uzartylyp otyratynyn da naqtylady.

Aıta ketsek, ótken aptada, ıaǵnı jańa oqý jyly aldynda AI-92 markaly benzın baǵasy elimizdegi megapolısterdiń janar-jaǵarmaı quıý beketterinde 6 teńgege deıin qymbattaǵany belgili.