بۇگىندە ەلىمىزدەگى تۇرمىستىق قالدىقتاردى رەتتەۋ ىسىمەن ق ر يندۋستريا جانە ينفراقۇرىلىمدىق دامىتۋ مينيسترلىگى اينالىسادى. الدەكىمدەر تۇرمىستىق قالدىقتارمەن ق ر ەكولوگيا، گەولوگيا جانە تابيعي رەسۋرستار مينيسترلىگى اينالىسادى دەپ ويلاپ قالۋى مۇمكىن. ءوز كەزەگىندە ەكولوگ ماماندار پلاستيك بوتەلكەلەردى سىرت ەلدەرگە ەكسپورتتاۋعا ۋاقىتشا مورتوريي جاريالعان ق ر يندۋستريا جانە ينفراقۇرىلىمدىق دامىتۋ مينيسترلىگىنەن تۇرمىستىق قالدىقتاردى رەتتەۋ ءىسىن قۇزىرەتىن الىپ، باسقا ۆەدموستۆاعا بەرۋ كەرەك ەكەنىن ايتۋدا.
ەندى نەگىزگى ماسەلەگە كوشسەك. ءقازىر ەلىمىزدەگى پلاستيك بوتەلكەلەردى جيناۋ، سۇرىپتاۋ جانە وڭدەۋ سالاسىنىڭ مايىندا جىل سايىن 180-250 ملرد تەڭگە اينالادى ەكەن. شاشىلىپ جاتاتىن پلاستيك بوتەلكەلەردىڭ اينالاسىندا ەشكىم مۇنشاما قوماقتى قارجى اينالادى دەپ ويلاماۋى مۇمكىن. ايتپاقشى، 1 كەلى پلاستيك بوتەلكەنىڭ نارىقتاعى باعاسى 200-400 تەڭگە قۇرايدى ەكەن. ال ەلىمىزدەگى پلاستيك بۇيىمداردىڭ وڭدەۋمەن اينالىستانى كاسىپورىندارى جىل سايىن 60 مىڭ توننا تۇرمىستىق قالدىقتى وڭدەيتىن مۇمكىندىككە يە.
جاقىندا وسى پلاستيك بوتەلكەلەردى وڭدەۋ ىسىمەن اينالىساتىن كاسىپورىندار ق ر يندۋستريا جانە ينفراقۇرىلىمدىق دامىتۋ مينيسترلىگىنە وزدەرىنىڭ شيكىزات تاپشىلىعىن سەزىنگەندەرىن ايتىپ، شاعىمدانىپتى. ويتكەنى ەلىمىزدەگى پلاستيك بوتەلكەلەردى جيناپ، سۇرىپتاۋ ىسىمەن اينالىساتىن شاعىن كاسىپكەرلەر تۇرمىستىق قالدىقتاردى وتاندىق كاسىپورىندارعا وتكىزگەنشە، قىمبات باعاعا سىرت ەلدەرگە جىبەرگەندى ءجون كورەتىن بولسا كەرەك.
ءوز كەزەگىندە ق ر يندۋستريا جانە ينفراقۇرىلىمدىق دامىتۋ مينيسترلىگى نارىقتاعا جاعدايعا تالداۋ جاساپ، 2 ليتەر جانە ودان دا كولەمدىك پلاستيك بوتەلكەلەردى سىرت ەلدەرگە ەكسپورتتاۋعا 6 ايعا مارتوريي جاريالاعان.
مينيسترلىكتىڭ بۇل قادامى تۇرمىستىق قالدىقتاردى جيناپ، سۇرىپتاپ كەلگەن شاعىن كاسىپكەرلەرگە ۇناي قويماعانى بەلگىلى. مينيسترلىك وكىلدەرى بولسا، ۋاقىتشا موراتوريي تۇرمىستىق قالدىقتاردى وڭدەيتىن كاسىپورىنداردىڭ جۇمىسىنا سەرىپىن بەرىپ، ەلىمىزدە جاڭا جۇمىس ورىندارىن قۇرىپ، مەملەكەت قازىناسىنا ءبىرشاما سالىق تۇسەتىنىن ايتۋدا.
ال ۋاقىتشا ماراتورييگە نارازى توپ مينيسترلىك ءىرى كاسىپوىرنداردىڭ مۇددەسىن قولداپ وتىرعانىن ايتىپ، ايىپتادى. ولار ۋاقىتشا شەكتەۋدى دەرەۋ توقتاتپاسا تۇرمىستىق قالدىقتاردى جيناۋ، سۇرىپتاۋ ىسىمەن اينالىساتىن شاعىن كاسىپكەرلەر بانكروتقا ۇشىراپ، مىڭداعان ادام جۇمىسسىز قالاتىنىن جەتكىزدى.
سونداي-اق ولار ەلىمىزدەگى تۇرمىستىق قالدىقتاردى وڭدەۋ ىسىمەن اينالىساتىن كاسىپورىندار ەلىمىز بويىنشا جينالاتىن پلاستيك بوتەلكەلەردى تولىقتاي وڭدەۋگە وندىرىستىك قۋاتى جەتپەيتىنىن دە تىلگە تيەك ەتتى. باعامداپ قاراساڭىز، نارازى توپتىڭ دا ۋاجىنە قۇلاق اسۋعا بولادى.
بۇگىندە تۇرمىستىق قالدىقتاردى وڭدەيتىن كاسىپورىندار ەلىمىزدىڭ بارلىق وبلىسىندا جوق. شەكارا ماڭىنداعى تۇرمىستىق قالدىقتاردى جينايتىن شاعىن كاسىپكەرلەر ءۇشىن جيناعان تۇرمىستىق قالدىقتارىن مىڭداعان شاقىرىم قاشىقتا جاتقان وڭدەۋشى كاسىپورىنعان تاسىمالداعانشا ىرگەدەگى كورشى ەلدەرگى ساۋدالاعان ءتيىمدى. ويتكەنى، مىڭداعان شاقىرىم جول جۇرگەندە تۇسكەن تابىس كولىك شىعىنىن اقتامايتىنى انىق. وسى رەتتە موروترييعا قارسى شىعۋشىلاردى دا تۇسىنۋگە بولاتىنداي...
سوىنمەن قاتار تۇرمىستىق قالدىقتاردى سۇرىپتاپ، جيناۋمەن اينالىساتىن كاسىپكەرلەر بۇل سالادا جۇمىس كۇشىن تابۋ وتە قيىن ەكەنىن دە العا تارتۋدا. راسىمەن دە ءدال ءقازىر قازاقستاندا ەشكىمنىڭ تۇرمىستىق قالدىقتاردى سۇرىپتاۋ ىسىمەن اينالىسقىسى كەلمەيدى. ەگەر مورتوريي سوزىلاتىن بولسا، شاعىن كاسىپكەرلەر بانكروتقا ۇشىراپ، جۇمىسشىلارىنان ايىرىلۋى مۇمكىن. ال بۇدان كەيىن جۇيەلى ءىستى قايتا ۇيىمداستىرۋ قيىن بولاتىنى ايتپاسا دا تۇسىنىكتى. سوندىقتان بۇل ماسەلەدە ون رەت ويلانىپ، توعىز رەت تولعانىپ بارىپ شەشىم قابىلداۋدىڭ ماڭىزى زور ەكەنىن بايقايسىڭ.
ايتپاقشى، 2019 جىلى ەلىمىزدە كارتون قاعاز قالدىقتارىن سىرت ەلدەرگە ەكسپورتتاۋعا شەكتەۋ قويىلىپ، ونىڭ سوڭى دا ۇلكەن داۋعا ۇلاسقانى ەسىمىزدە. پلاستيك بوتەلكەلەر ەكسپورتىن شەكتەۋ ءىسى قاعاز-كارتوننىڭ جولىن قۋماسا ەكەن دەيمىز. ءوزىمىزدىڭ تۇرمىستىق قالدىقتاردىڭ ءوز جەرىمىزدە وڭدەلگەنى جاقسى. ءبىراق بۇل شارۋادا قوس تاراپتىڭ دا جاپپا شەكپەۋىنە باسا ءمان بەرگەن ءجون.
