وسكەمەندە تاعى ءبىر مەرزىمدى اسكەري قىزمەتشى قازا تاپتى، دەپ حابارلايدى Dalanews.kz.
بۇل تۋرالى قۇرلىق اسكەرى باسپا ءسوز قىزمەتى مالىمدەدى.
"23 قاڭتاردا وسكەمەن گارنيزونىنداعى اسكەري بولىمدەردىڭ بىرىندە قاراۋىل قىزمەتىن اتقارۋ كەزىندە مەرزىمدى اسكەري قىزمەتشى وزىنە بەكىتىلگەن قارۋدان وز-وزىنە وق اتىپ، العان جاراقاتىنان كوز جۇمدى. اسكەري قىزمەتشى وتكەن جىلدىڭ ءساۋىر ايىندا مەرزىمدى اسكەري قىزمەتكە شاقىرىلعان"، - دەپ جازىلعان حابارلامادا.
بۇل دەرەك بويىنشا ءىىم شىعىس وڭىرلىك اسكەري-تەرگەۋ باسقارماسىنىڭ وسكەمەن ءبولىمى قىلمىستىق ءىس قوزعاعان.
"سوتالدى تەرگەپ-تەكسەرۋ بارىسى وسكەمەن گارنيزونىنىڭ اسكەري پروكۋراتۋراسىنىڭ باقىلاۋىندا. وقيعانىڭ سەبەپتەرى مەن ءمان-جايى انىقتالىپ جاتىر. تەرگەۋ مۇددەسىنە بايلانىستى وزگە اقپارات جاريا ەتىلمەيدى"، - دەپ جازىلعان حابارلامادا.
قورعانىس ءمينيسترىنىڭ تاپسىرماسى بويىنشا وقيعانىڭ ءمان-جايىن جان-جاقتى انىقتاۋ ماقساتىندا وقيعا ورنىندا قورعانىس ءمينيسترىنىڭ ورىنباسارى، گەنەرال-مايور اسقار مۇستابەكوۆتىڭ جەتەكشىلىگىمەن كوميسسيا جۇمىس ىستەپ جاتىر.
"قورعانىس مينيسترلىگى مەن قارۋلى كۇشتەر باسشىلىعى مارقۇمنىڭ تۋعان-تۋىستارى، جاقىندارىنا كوڭىل ايتادى. وتباسىنا قولدانىستاعى زاڭناماعا سايكەس بارلىق كومەك كورسەتىلەدى"، - دەپ جازىلعان حابارلامادا.
ەسكە سالايىق، جۋىردا اقتاۋدا اسكەري قىزمەتشى كوز جۇمدى.
