رەسپۋبليكالىق ادۆوكاتتار القاسىنىڭ ءتوراعاسى ءمادي مىرزاعارايەۆ كونستيتۋسيالىق رەفورما جونىندەگى كوميسسيانىڭ ءبىرىنشى وتىرىسىندا سوت سانكسياسىنسىز ۇستاۋ مەرزىمىن قىسقارتۋ جانە ادۆوكاتۋرا ينستيتۋتىنىڭ كونستيتۋسيالىق مارتەبەسىن بەكىتۋ قاجەتتىگىن ايتتى، دەپ حابارلايدى Dalanews.kz
سپيكەردىڭ ايتۋىنشا، جەكە باس بوستاندىعى - بارلىق قۇقىقتىڭ نەگىزى جانە بۇل قاعيدات كونستيتۋسيادا ناقتى تەتىكتەرمەن بەكىتىلۋى ءتيىس. قازىرگى قىلمىستىق پروسەستە ۋاقىتشا ۇستاۋدىڭ ۇزاقتىعى ادام قۇقىعىنا تىكەلەي قاتەر توندىرەدى. ءمادي مىرزاعارايەۆ تەحنولوگيالىق مۇمكىندىكتەردى العا تارتا وتىرىپ، بۇل تاجىريبەنى تۇبەگەيلى قايتا قاراۋ قاجەتتىگىن اتاپ ءوتتى.
«ۋاقىتشا ۇستاۋ - بۇل تەرگەۋدىڭ العاشقى كەزەڭىندەگى ءماجبۇرلى، ايرىقشا شارا. ءبىراق وسى ۋاقىتشا شارانىڭ ءوزى مەيلىنشە قىسقا مەرزىمگە عانا قولدانىلۋى ءتيىس. ەڭ باستىسى - سوت قاراۋىنا تەز ارادا جەتكىزۋ. تەحنولوگيالار دامىعان بۇگىنگى زاماندا ماتەريالداردى سوتقا ۇسىنۋ ءۇشىن ۇزاق ۋاقىتتىڭ قاجەتى جوق. نەگىزگى تەرگەۋ ارەكەتتەرى العاشقى تاۋلىكتە-اق اتقارىلادى. سوت باقىلاۋىن ەرتەرەك ىسكە قوسۋ ازاماتقا عانا ەمەس، مەملەكەتكە دە ءتيىمدى. سوت سانكسياسى - تەرگەۋ زاڭدىلىعىنىڭ باستى كەپىلى جانە قوعام سەنىمىنىڭ تىرەگى. وسى رەتتە، حالىقارالىق وزىق تاجىريبەنى ەسكەرە وتىرىپ، كونستيتۋسيادا سوت سانكسياسىنسىز ۇستاۋ مەرزىمىن 72 ساعاتتان 48 ساعاتقا دەيىن قىسقارتۋدى ۇسىنامىن»،- دەدى ءمادي مىرزاعارايەۆ.
سونىمەن قاتار، سپيكەر حالىقارالىق دەڭگەيدە مويىندالعان «ميراندا قاعيداسى» - قۇقىقتىق مەملەكەتتىڭ مىزعىماس ولشەمى ەكەنىن باسا ايتتى. سوعان سايكەس، ازامات ءوز قۇقىعىن تاعدىرى تارازىعا تۇسكەن العاشقى مينۋتتان باستاپ بىلۋگە ءتيىس. ال سول قۇقىقتاردىڭ ىشىندەگى ەڭ ماڭىزدىسى - كاسىبي ادۆوكاتتىڭ كومەگىنە جۇگىنۋ قۇقىعى. سوندىقتان مىرزاعارايەۆ ءوز سوزىندە ادۆوكاتۋرا ينستيتۋتىنىڭ قازىرگى قۇقىقتىق جاعدايىنا توقتالدى. ول كونستيتۋسيادا بىلىكتى زاڭ كومەگىنە قۇقىق بەكىتىلگەنىمەن، سول كومەكتى قامتاماسىز ەتەتىن نەگىزگى ينستيتۋتتىڭ ماتىندە ناقتى اتالماعانىن ايتتى. ءمادي مىرزاعارايەۆ قازاقستاندا ادۆوكاتۋرانىڭ بۇرىن كونستيتۋسيالىق مارتەبەسى بولعانىن ەسكە سالىپ، تاريحي ولقىلىقتى قايتا جاساماۋعا شاقىردى.
«ادۆوكاتۋرا - تەك كاسىبي قاۋىمداستىق ەمەس، قۇقىقتىق مەملەكەتتىڭ اجىراماس تىرەك ينستيتۋتى. ءدال وسى ءرول ونىڭ مارتەبەسىن جالپى زاڭ دەڭگەيىندە عانا ەمەس، كونستيتۋسيا دەڭگەيىندە تانۋدىڭ تابيعي قيسىندىلىعىن كورسەتەدى. قازاقستان اۋماعىندا ادۆوكاتۋرانىڭ كونستيتۋسيالىق مارتەبەسى بۇرىن بولعان. تاۋەلسىزدىكتىڭ العاشقى جىلدارىنداعى رەفورمالار بارىسىندا ادۆوكاتۋرانىڭ اتا زاڭ ماتىنىنەن تىس قالۋى - تاريحي ولقىلىق. ناتيجەسىندە، كونستيتۋسيادا بىلىكتى زاڭ كومەگىنە قۇقىق بەكىتىلگەنىمەن، سول كومەكتى تاريحي تۇردە كورسەتىپ كەلە جاتقان نەگىزگى ينستيتۋتتىڭ ءوزى كونستيتۋسيا ماتىنىندە اتالماي قالدى»،- دەدى ءمادي مىرزاعارايەۆ.
ءسوز بارىسىندا ءمادي مىرزاعارايەۆ قازىرگى كونستيتۋسيالىق رەفورمانى ادۆوكاتۋرانىڭ مارتەبەسىن ورنىنا كەلتىرەتىن تاريحي مۇمكىندىك دەپ اتاپ ءوتتى. ول كونستيتۋسيادا ادۆوكاتۋرانىڭ قۇقىقتىق مارتەبەسىن بەكىتۋ مەملەكەتتىڭ جاريالاعان باعىتىنا، پرەزيدەنت ايقىنداعان ستراتەگيالىق باعدارعا جانە قوعامنىڭ سۇرانىسىنا تولىق سايكەس كەلەتىنىن باسا ايتتى.
