وسكەمەندە ەرەكشە بالالارعا ارنالعان ارنايى الەۋمەتتىك قىزمەتتەر كورسەتىلەتىن «DEMEY» رەسۋرستىق ورتالىعىنىڭ سالتاناتتى اشىلۋ ءراسىمى ءوتتى. وعان شىعىس قازاقستان وبلىسىنىڭ اكىمى نۇرىمبەت ساقتاعانوۆ قاتىستى، – دەپ حابارلايدى Dalanews.kz
بۇل ورتالىقتا بالالار ءوز الەۋەتىن دامىتىپ، ال اتا-انالار قيىن ومىرلىك جاعدايلاردا قولداۋ الا الادى.
ورتالىق تىرەك-قيمىل اپپاراتى بۇزىلعان مۇمكىندىگى شەكتەۋلى بالالاردى دامىتۋ جانە وڭالتۋ، سونداي-اق قيىن ومىرلىك جاعدايعا تاپ بولعان وتباسىلاردى ۋاقىتشا ورنالاستىرۋ، الەۋمەتتىك-پسيحولوگيالىق قولداۋ كورسەتۋ، قۇقىقتىق كومەك الۋ ماقساتىندا قۇرىلدى.
رەسۋرستىق ورتالىق وسكەمەن قالاسىندا، تۋرگەنيەۆ كوشەسى، 30 مەكەن-جايىندا ورنالاسقان بۇرىنعى اكىمشىلىك عيماراتىندا اشىلدى. بۇل نىسان ازاماتتاردى الەۋمەتتىك قورعاۋ سالاسىنداعى قىزمەتتەر كورسەتۋ ءۇشىن بەرىلگەن.
"جاڭا الەۋمەتتىك نىساننىڭ اشىلۋىمەن قۇتتىقتايمىن. بۇل ەرەكشە كەڭىستىك بالالار ءۇشىن دامۋ، جارقىن ەموسيالار مەن جاڭا جەتىستىكتەر ورنى بولسىن. مەملەكەت مۇمكىندىگى شەكتەۋلى بالالار تاربيەلەپ وتىرعان وتباسىلارعا تۇراقتى تۇردە كومەك كورسەتىپ كەلەدى.
بۇگىن ءبىز الەۋمەتتىك ارىپتەستىكتىڭ لايىقتى ۇلگىسىن كورىپ وتىرمىز. «DEMEY» تۇزەتۋ ورتالىعى مەملەكەتتىك عيماراتتان جاڭا ورىن الىپ، جوندەۋ جۇمىستارى بيۋدجەت ەسەبىنەن جۇرگىزىلدى. كاسىپكەرلەر جيھازداردى جاڭارتۋعا، زاماناۋي دامىتۋ قۇرالدارىن، جاتتىعۋ جابدىقتارىن ساتىپ الۋعا ءوز ۇلەستەرىن قوستى"، – دەدى نۇرىمبەت ساقتاعانوۆ.
وبلىس اكىمىنىڭ ايتۋىنشا، جاڭا ورتالىق ەرەكشە قاجەتتىلىگى بار بالالاردى قامتۋدى ارتتىرىپ، وڭالتۋ جاعدايلارىن جاقسارتۋعا، 18 جاستان اسقان پسيحونيەۆرولوگيالىق اۋىتقۋلارى بار ادامدارعا قىزمەت كورسەتۋگە مۇمكىندىك بەرەدى.
شقو بويىنشا وسىنداي 3615 بالا بار، ونىڭ ىشىندە وبلىس ورتالىعىندا – 2156. الەۋمەتتىك تولەمدەر، ارنايى الەۋمەتتىك قىزمەتتەر، تەحنيكالىق وڭالتۋ قۇرالدارى، ۇيدە وقىتۋ شىعىندارىن وتەۋ كوزدەلگەن. قازىرگى تاڭدا 685 مۇمكىندىگى شەكتەۋلى بالا ارنايى الەۋمەتتىك قىزمەتپەن قامتىلعان. مەملەكەتتىك الەۋمەتتىك تاپسىرىس ارقىلى 134 بالاعا وڭالتۋ، ءبىلىم بەرۋ، تۇزەتۋ قىزمەتتەرى كورسەتىلۋدە.
ورتالىقتا رەابيليتولوگتىڭ كەڭەسى، ەمدىك جانە بەيىمدىك دەنە شىنىقتىرۋ، لوگوپەد، دەفەكتولوگ، نەيروپسيحولوگ، ەرگوتەراپيەۆت قىزمەتتەرى، دامىتۋشى ساباقتار، ەرەكشە ءبىلىم بەرۋ قاجەتتىلىگى بار بالالاردى مەكتەپكە دايىنداۋ، ءتۇرلى ۇيىرمەلەر (قولونەر، سۋرەت سالۋ) ۇسىنىلادى. سونىمەن قاتار، سەنسورلىق ينتەگراسيا زالى، رەلاكساسيا بولمەسى، دەمالىس جانە ويىن بولمەلەرى بار. ەرەكشە بالالاردىڭ اتا-انالارى پسيحولوگتىڭ كەڭەسىن الا الادى.
قيىن ومىرلىك جاعدايعا تاپ بولعان ادامداردى قولداۋ ورتالىعىندا، داعدارىس بولىمشەسىندە پسيحولوگ قىزمەتى كورسەتىلەدى، ۇيىقتايتىن بولمەلەر، ءوزىن-وزى قامتاماسىز ەتۋگە ارنالعان جاعدايلار، ءۇش مەزگىل تاماق، تەراپيەۆت دارىگەردىڭ العاشقى تەكسەرۋى قاراستىرىلعان. بۇدان بولەك، مۇنداي وتباسىلارعا جاردەماقى راسىمدەۋ جانە جۇمىسپەن قامتۋ بويىنشا كومەك كورسەتىلەدى.
رەسۋرستىق ورتالىقتىڭ رەسمي اشىلۋىنان كەيىن بالالارعا ارنالعان ويىن-ساۋىق باعدارلاماسى ۇيىمداستىرىلدى.
