Óskemende erekshe balalarǵa arnalǵan arnaiy áleýmettik qyzmetter kórsetiletin «DEMEY» Resýrstyq ortalyǵynyń saltanatty ashylý rásimi ótti. Oǵan Shyǵys Qazaqstan oblysynyń ákimi Nurymbet Saqtaǵanov qatysty, – dep habarlaidy Dalanews.kz
Bul ortalyqta balalar óz áleýetin damytyp, al ata-analar qiyn ómirlik jaǵdailarda qoldaý ala alady.
Ortalyq tirek-qimyl apparaty buzylǵan múmkindigi shekteýli balalardy damytý jáne ońaltý, sondai-aq qiyn ómirlik jaǵdaiǵa tap bolǵan otbasylardy ýaqytsha ornalastyrý, áleýmettik-psihologiialyq qoldaý kórsetý, quqyqtyq kómek alý maqsatynda quryldy.
Resýrstyq ortalyq Óskemen qalasynda, Týrgenev kóshesi, 30 meken-jaiynda ornalasqan burynǵy ákimshilik ǵimaratynda ashyldy. Bul nysan azamattardy áleýmettik qorǵaý salasyndaǵy qyzmetter kórsetý úshin berilgen.
"Jańa áleýmettik nysannyń ashylýymen quttyqtaimyn. Bul erekshe keńistik balalar úshin damý, jarqyn emotsiialar men jańa jetistikter orny bolsyn. Memleket múmkindigi shekteýli balalar tárbielep otyrǵan otbasylarǵa turaqty túrde kómek kórsetip keledi.
Búgin biz áleýmettik áriptestiktiń laiyqty úlgisin kórip otyrmyz. «DEMEY» túzetý ortalyǵy memlekettik ǵimarattan jańa oryn alyp, jóndeý jumystary biýdjet esebinen júrgizildi. Kásipkerler jihazdardy jańartýǵa, zamanaýi damytý quraldaryn, jattyǵý jabdyqtaryn satyp alýǵa óz úlesterin qosty", – dedi Nurymbet Saqtaǵanov.
Oblys ákiminiń aitýynsha, jańa ortalyq erekshe qajettiligi bar balalardy qamtýdy arttyryp, ońaltý jaǵdailaryn jaqsartýǵa, 18 jastan asqan psihonevrologiialyq aýytqýlary bar adamdarǵa qyzmet kórsetýge múmkindik beredi.
ShQO boiynsha osyndai 3615 bala bar, onyń ishinde oblys ortalyǵynda – 2156. Áleýmettik tólemder, arnaiy áleýmettik qyzmetter, tehnikalyq ońaltý quraldary, úide oqytý shyǵyndaryn óteý kózdelgen. Qazirgi tańda 685 múmkindigi shekteýli bala arnaiy áleýmettik qyzmetpen qamtylǵan. Memlekettik áleýmettik tapsyrys arqyly 134 balaǵa ońaltý, bilim berý, túzetý qyzmetteri kórsetilýde.
Ortalyqta reabilitologtyń keńesi, emdik jáne beiimdik dene shynyqtyrý, logoped, defektolog, neiropsiholog, ergoterapevt qyzmetteri, damytýshy sabaqtar, erekshe bilim berý qajettiligi bar balalardy mektepke daiyndaý, túrli úiirmeler (qolóner, sýret salý) usynylady. Sonymen qatar, sensorlyq integratsiia zaly, relaksatsiia bólmesi, demalys jáne oiyn bólmeleri bar. Erekshe balalardyń ata-analary psihologtyń keńesin ala alady.
Qiyn ómirlik jaǵdaiǵa tap bolǵan adamdardy qoldaý ortalyǵynda, daǵdarys bólimshesinde psiholog qyzmeti kórsetiledi, uiyqtaityn bólmeler, ózin-ózi qamtamasyz etýge arnalǵan jaǵdailar, úsh mezgil tamaq, terapevt dárigerdiń alǵashqy tekserýi qarastyrylǵan. Budan bólek, mundai otbasylarǵa járdemaqy rásimdeý jáne jumyspen qamtý boiynsha kómek kórsetiledi.
Resýrstyq ortalyqtyń resmi ashylýynan keiin balalarǵa arnalǵan oiyn-saýyq baǵdarlamasy uiymdastyryldy.
