– بۇدان 10-15 جىل بۇرىن ءوزىمىز وسىنداي الۋان ءتۇرلى ءونىم وندىرەمىز دەپ ويلاپ پا ەدىك؟ ال بۇگىن ول شىندىققا اينالدى، – دەگەن نۇرسۇلتان ءابىش ۇلى ءوڭىرىمىز كاسىپكەرلىكتى دامىتۋ ارقىلى كوشباسشى ايماققا اينالۋى تيىستىگىن جەتكىزدى.
كەزدەسۋدە ەلباسىعا ءوڭىر باسشىسى جانسەيىت تۇيمەبايەۆ وبلىستىڭ الەۋمەتتىك-ەكونوميكالىق كورسەتكىشتەرى تۋرالى بايانداپ، اۋىل شارۋاشىلىق ونىمدەرىنىڭ كورمەسى ۇسىنىلدى.
جيىن سوڭىندا نۇرسۇلتان نازاربايەۆ جينالعان كوپشىلىككە باق-بەرەكە تىلەپ، جوعارى وندىرىستىك كورسەتكىشتەرگە قول جەتكىزۋلەرىنە نيەتتەستىگىن ءبىلدىردى.
ايتا كەتەيىك، مەملەكەتتىك يندۋستريالدى-يننوۆاسيالىق دامۋ باعدارلاماسى اياسىندا ىسكە قوسىلعان «DALA-FRUIT.KZ» جشس-ندە باستاپقىدا 83 ادام تۇراقتى جۇمىسپەن قامتىلىپ، كومپانيا جۇمىسىن باستاعان ءۇش جىلدا ونىڭ سانى 277 ادامعا جەتكەن. جالپى كولەمى 106،5 گەكتار بولاتىن سەرىكتەستىك باۋىنا 215 مىڭ تۇپتەن استام جەمىس اعاشتارى ەگىلگەن. مۇندا المانىڭ «گرەنني»، «سميت»، «فۋدجي»، «گولدەن –دەليشەس»، «گالا»، «ايدەرەد» الحورى مەن شيەنىڭ «ستەنلەي» اتتى شەتەلدىك سۇرىپتارىن كەزدەستىرۋگە بولادى. ياعني، مۇنداعى 1 گەكتەر جەرگە شامامەن 2500 ءتۇپ اعاش كوشەتى قوندىرىلعان. زاماناۋي تەحنيكامەن جابدىقتالعان باۋ تامشىلاتىپ سۋارۋ جۇيەسى ارقىلى جۇمىس ىستەيدى.
وڭتۇستىك قازاقستاندا ينتەنسيۆتى باۋ شارۋاشىلىعىن قارقىندى دامىتۋ جۇمىستارى قولعا الىنعانى بەلگىلى. وبلىستا جالپى جەمىس-جيدەك اعاشتارى القاپتارىنىڭ كولەمى 19،5 مىڭ گا قۇراسا، ونىڭ 2 مىڭ گەكتارى قارقىندى باۋلارعا جاتادى. ءوڭىر شارۋالارى وسى جىلى ايماقتا 1،5 مىڭ گا جەرگە قارقىندى باۋ تاسىلىمەن كوشەتتەر وتىرعىزىپ، ينتەنسيۆتى باۋلاردىڭ جالپى كولەمىن 3،5 مىڭ گا جەتكىزۋ جوسپارلانۋدا.
جالپى، اۋىل شارۋاشىلىعى سالاسى وڭتۇستىك قازاقستان وبلىسى ەكونوميكاسىنىڭ نەگىزگى باعىتى. وسى جىلدىڭ قاڭتار - ناۋرىز ايلارىنا اۋىل شارۋاشىلىعىنىڭ جالپى ءونىم كولەمى 64،4 ملرد.تڭ، قۇراپ، وتكەن جىلدىڭ ءتيىستى كەزەڭىمەن سالىستىرعاندا 7،9 ملرد. تڭ. ارتتى. وسىلايشا، رەسپۋبليكا بويىنشا اۋىل شارۋاشىلىعىندا وقو ۇلەسى 18،2 % قۇراپ، ءبىرىنشى ورىنعا شىقتى.
وقو اكىمىنىڭ باسپا ءسوز قىزمەتى
