سانكسيا قىسپاعىندا قالعان رەسەي ۇكىمەتى وداقتاس ەلدەرمەن اراداعى الىس-بەرىس، بارىس-كەلىستى ۇدەتە تۇسۋگە قۇلىقتى. كرەمل قازاقستانداعى ىقپالىن جوعالتا قويماعان ورىس اۋديتورياسىنىڭ ءورىسى كەڭەيە تۇسكەنىن قالايدى. دەموكراتياعا بەت بۇرا باستاعان كورشىسى "ورىس الەمىنىڭ" قۇندىلىقتارىنان تەرىس اينالا ما دەپ قاۋىپتەنەدى. ماسكەۋ ءۇشىن ورىس ءتىلىنىڭ قولدانىستان، سۇرانىستان قالماۋى – باستى مۇددە.
وسىنى مەڭزەگەن ميشۋستين سمايىلوۆپەن جۇزدەسۋدە مادەني-قوعامي باعىتتاعى ارىپتەستىككە كوبىرەك ءمان بەردى.
"ءبىز مادەني-گۋمانيتارلى سالاداعى قارىم-قاتىناسىمىزدىڭ قارقىن العانىن قالايمىز. قازاقستاندا رەسەيلىك جوو-لاردىڭ بولىمشەسىن اشۋ بويىندا قىزۋ جۇمىس ءجۇرىپ جاتىر. الداعى ۋاقىتتا الماتىدا ماسكەۋ ينجەنەرلىك-فيزيكالىق ينستيتۋتىنىڭ فيليالى اشىلادى.
وداقتاسىمىز ورىس تىلىنە ايرىقشا قۇرمەتپەن قارايدى، وسىنداعى ءورىستىلدى اۋديتوريانىڭ ءورىسى تارىلماۋىنا مۇقيات ءمان بەرەدى، ورىس ءتىلىنىڭ رەسمي ءتىل دەگەن دارەجەسى بار.
قازاقستان وسىندا ساپارلاپ كەلەتىن ءبىزدىڭ ازاماتتار ءۇشىن ەركىن پىكىر الماساتىن ءورىستىلدى ورتا قالىپتاستىرىپ، كاسىبي بايلانىستار ورناتۋعا مۇمكىندىك بەرىپ وتىر. ورىس ءتىلى مادەني ارىپتەستىك ورناتۋعا دانەكەر بولىپ، ەكى ەلدىڭ اراسىن جاقىنداستىرا تۇسۋدە، – دەيدى ميشۋستين.
بىلتىرلارى باسپا ءسوز وكىلدەرىنە سۇحبات بەرگەن پۋتين دە وسى سارىندا سويلەگەن ەدى. قازاقستانعا "تولىق ماعىناسىندا ورىسشا سويلەيتىن ەل" دەپ باعا بەرگەن كرەمل كوسەمى:
– بىزدە (رەسەي مەن قازاقستان اراسىندا – رەد.) وتە تەرەڭ گۋمانيتارلىق بايلانىس بار. ورىس ءتىلىن ساقتاۋعا جانە دامىتۋعا مۇقيات قاراپ وتىرعانى ءۇشىن قازاقستان باسشىلىعىنا ەرەكشە العىس ايتامىن. قازاقستاندا قانشا ادام ورىس ءتىلىن ۇيرەنىپ جاتقانىن وزدەرىڭىز دە بىلسىزدەر. ول – تولىق ماعىناسىندا ورىس تىلىندە سويلەيتىن ەل. ورىس تىلىندە وقىتاتىن مەكتەپتەردىڭ، (رەسەيلىك) جوعارى وقۋ ورىندارى فيليالدارىنىڭ سانى ارتىپ كەلەدى، ولارعا كونكۋرس تا كوپ، – دەپ مالىمدەگەن-تۇعىن.
ءميشۋستيننىڭ ايتۋىنشا، قازاقستان مەن رەسەي ەۋرازيالىق وداقتىڭ جۇمىسىن جۇردەكتەتىپ، بۇرىنعىعا قاراعاندا قاۋىرت قيمىلداۋدا. بۇعان ءتىپتى باتىس سانكسيالارى دا كەدەرگى كەلتىرە الماۋدا. ساراپشىلاردىڭ پىكىرىنشە ساۋدا-ساتتىقپەن اينالىساتىن كەڭىستىگى تارىلعان رەسەيدىڭ ءوز ونىمدەرىن وداقتاس ەلدەردىڭ نارىعىنا تىقپالاۋدان وزگە جولى جوق. مۇنى ميشۋستين دە راستاپ وتىر.
ەكى ەل اراسىنداعى ساۋدا-ساتتىقتىڭ ورىستەۋىنە كەدەرگى كەلتىرەتىن بيۋروكراتيانىڭ كوزىن قۇرتۋ كەرەك، قامالداردى قۇلاتىپ، ورتاق نارىق، ورتاق ەكونوميكا قالىپتاستىرايىق. قىزمەت تۇرلەرى، تاۋار اينالىمى، كاپيتالى اۋدارىمى، ادام كۇشىمەن الماسۋ ءبىز ءۇشىن قالىپتى قۇبىلىسقا اينالۋى ءتيىس.
وسىلايشا باتىس پەن اقش-قا مويىنسۇنبايتىن، دەربەس ينفراقۇرىلىم قالىپتاستىرامىز. ءبىزدىڭ كاسىپكەرلەر باتىستىڭ سانكسيالارى مەن ارانداتۋىنان قورعالاتىن بولادى.
ەۋرازيالىق ينتەگراسيانىڭ جەمىسىن جەپ، قىزىعىن كورەتىن كەزەڭگە كەلدىك. وداق اياسىنداعى بايلانىستاردى تەرەڭدەتە تۇسۋگە ءتيىسپىز. ءبىزدىڭ قۇشاعىمىز اشىق ءاليحان مىرزا، سىزدەردەن جاۋاپ كۇتەمىز، وداقتىڭ تامىرىنا قان جۇگىرتەتىن كەز-كەلگەن ۇسىنىستى تالقىلاۋعا دايىنبىز، – دەدى ميشۋستين.
