بۇگىندە جەرگىلىكتى بيلىك ورىندارى 2023 جىلعا دەيىن 1400 قۋاتاندىرۋ ورتالعىن ۇيىمداستىرۋ ءۇشىن ارنايى جەر تەلىمدەرىن اۋكسيونعا شىعارۋدى جوسپارلاپ وتىر. ال «ايماقتىق ەلەكتر جۇيەسى» كومپانياسى جول بويىندا 500 ستانسا سالۋدى موينىنا العان.
الداعى جىلدىڭ 1 قاڭتارىنان باستاپ كاسىپكەرلەرگە وزدەرى ورناتقان كولىكتى قۋاتتاندىرۋ ورتالىقتارىنان ەلەكتر قۋاتىن ساتۋعا رۇقسات بەردى.
كولىكتى قۋاتتاندىرۋ قۇنىن كاسىپكەرلەر وزدەرى بەلگىلەيدى، ياعني، قۋاتتاندىرۋ قۇنى ەلەكتر ەنەرگياسىنىڭ تاريفىنە قاتىسى جوق.
سونىمەن قاتار كولىكتى قۋاتتاندىرۋ ورتالىعىن سالعان كاسىپكەرلەر ءۇش جىلعا دەيىن جەر جانە مۇلىك سالعىنان بوساتىلادى. وسىلايشا وزبەك اعايىندار كاسىپكەرلەردى وسى ىسكە ينۆەستيسيا سالۋعا ىنتالاندىرۋدا.
ەڭ باستىسى كاسىپكەرلەر قۋاتتاندىرۋ ورتالىعىن سالۋ ءۇشىن سىرت ەلدەردەن ارنايى جابدىقتاردى جەتكىزگەن كەزدە ولار مەملەكەتكە كەدەندىك باج سالىعىن تولەمەيدى. بۇل دا ماڭىزدى جەڭىلدىك بولىپ تۇر.
ال 2024 جىلى جول بويىنداعى ساۋدا-ورتالىقتارى، كوڭىل كوتەرۋ ورتالىقتارى جانە جول بويىنداعى قوناق ۇيلەردىڭ جانىندا قۋاتتاندىرۋ ورتالىعى بولۋى شارت.
بۇدان باسقا كورشى ەلدەگى مينيسترلىكتەر، كوميتەتتەر، حوكيمياتتار جانە مەملەكەتتىك مەكەمەلەردىڭ كولىكتەرىنىڭ 50 پايىزى ەلەكتر قۋاتىمەن جۇرەتىن كولىكتەر بولۋى كەرەك دەگەن تالاپ تا قويىلۋدا. مۇنداي جاعدايدا جاقىن بولاشاقتا وزبەكستاننىڭ مەملەكەتتىك ورگاندارى 3863 ەلەكتروكار ساتىپ الۋى مۇمكىن.
وزبەكتەرى 2030 جىلدىڭ 1 قاڭتارىنان باستاپ ەلەكتر قۋاتىمەن جۇرەتىن كولىكتەردى وزدەرى شىعارىپ، ولاردى ۋتيل الىمنان بوساتپاقشى. بۇل باعىتتاعى ءوندىرىستى وركەندەتۋ ءۇشىن ەلەكتروكار شىعارۋعا قاجەتتى قوسىمشا بولشەكتەردى سىرتتان جەتكىزۋ كەزىندە كاسىپورىندار كەدەندىك باج سالىعىنان بوساتىلادى.
وسىلايشا شاۆكات ميرزيويەۆ بۇكىل وزبەكتى ەكولوگيالىق تۇرعىدان تازا كولىككە مىنگىزۋدى جوسپارلاپ وتىر. ال ءبىز بولساق، ورىستىڭ جامان كولىگىنەن قۇتىلا الماۋدامىز.
ەندى وزبەك اعايىندار جىل سايىن ەل اۋماعىنا ۋتيل الىمسىز 10 مىڭنان استام ەلەكتروكاردى كىرىگىزبەكشى. بۇدان باسقا وزبەك بيلىگى جولاۋشىلار تاسىمالىندا ەلەكتر قۋاتىمەن جۇرەتىن كولىك تۇرلەرىن پايدالانعان مەكەمەلەرگە مەملەكەتتىك ليسەنزيا بەرگەن كەزدە مەملەكەتتىك قۇن سالعىنان بوساتۋدى دا قاراستىرۋدا.
وزبەكستاننىڭ مەملەكەتتىك ستاتيستيكا كوميتەتىنىڭ مالىمەتىنشە، سوڭعى 11 ايدى كورشىمىز 61،3 ملن دوللارعا 1912 ەلەكتروكار ساتىپ العانى ءمالىم بولدى. ونىڭ باسىم بولىگىن وزبەكتەر قىتايدان (1675) جەتكىزگەن.
