موڭعوليانىڭ ءبىلىم جانە عىلىم مينيسترلىگىنىڭ، ءبىلىم ينستيتۋتىنىڭ، بۇۇ بالالار قورىنىڭ (يۋنيسەف) موڭعولياداعى جانە بايان-ولگيي ايماعى گۋبەرناتورى كەڭسەسى وكىلدەرى، سونداي-اق قانداستار كوپ شوعىرلانعان ەلدى مەكەندەردەگى مەكتەپ ديرەكتورلارىنان قۇرالعان دەلەگاسياعا مەكتەپ ديرەكتورى جازيرا اياپبەرگەن قىزى ءبىلىم ۇياسىنىڭ تاريحىن جانە ماتەريالدىق-تەحنيكالىق بازاسىن تانىستىردى.
2006 جىلى اشىلعان مەكتەپ 2010 جىلى گيمنازيا مارتەبەسىنە يە بولدى. وسى ۋاقىت ىشىندە ءبىلىم وشاعىنان قانشاما تۇلەك قانات قاقتى. بۇگىندە سوڭعى ۇلگىدەگى قۇرالدارمەن جابدىقتالعان مەكتەپتە «سيفرلى كىتاپحانا» جەلىسى، روبوتوتەحنيكا كابينەتى جۇمىس ىستەيدى. وقۋشىلار شىعارماشىلىقتان دا كەندە ەمەس.
تالانتتى ورەندەر قوناقتاردى كۇمبىرلەگەن كۇيمەن قارسى السا، ەندى ءبىرى ۇلتتىق سپورت – توعىزقۇمالاقتى ناسيحاتتاپ وتىر. شاحمات، كوركەمسۋرەت ۇيىرمەسىنىڭ قاتىسۋشىلارى دا ونەرى مەن ويىنىن كورسەتتى. ال حالىقارالىق سەميناردا گيمنازيا ۇستازدارى «KPI ءمۇعالىم رەيتينگىسى»، «ءمۇعالىمنىڭ ەلەكتروندىق پورتفولياسى»، «IQ وقۋشى رەيتينگىسى»، «نەيروجەلى ارقىلى سويلەيتىن اۆاتارلار جاساۋ»، «باستاۋىش سىنىپتاردى وقىتۋدا سيفرلىق پلاتفورمالاردى پايدالانۋ»، «YouTube كانالى ارقىلى ماتەماتيكالىق ساۋاتتىلىقتى ارتتىرۋ»، «تەلەموست ارقىلى وقۋشىلاردىڭ كوممۋنيكاتيۆتىك قارىم-قاتىناسىن دامىتۋ»، «ءبىلىم الۋشىلاردىڭ بىلىمىندەگى ولقىلىقتاردى جويۋدا Wardwall سايتىمەن جۇمىستىڭ تيىمدىلىگى» تۋرالى ىس-تاجىريبەلەرىمەن ءبولىستى.
№175 "جاڭا عاسىر" گيمنازياسىنىڭ ديرەكتورى جازيرا قاراتايەۆانىڭ ايتۋىنشا، زامان تالابى سيفرلىق تەحنولوگيانى تالاپ ەتۋدە.
«ءبىز سەميناردا وسى ءۇردىستىڭ زاماناۋي ءبىلىم بەرۋدىڭ كىلتى ەكەنىن دالەلدەدىك. وسى تۇرعىدا ءمۇعالىم مەن وقۋشىنىڭ شىعارماشىلىعىن ارتتىرۋ ءۇشىن قانداي ءادىس-تاسىلدى قولداناتىنىمىزدى پاش ەتتىك. 2022-2027 جىلدارعا ارنالعان ءبىلىم ساپاسىن دامىتۋ باعدارلاماسى بار. وسىنىڭ ءبىر بولىگى – سيفرلىق تەحنولوگيادان تۇرادى. بىلتىر وقۋ جىلىنان بەرى العاشقى باسپالداعىنا قادام باستىق. بيىل وسى اتقارىلعان جۇمىستار بويىنشا ناتيجەگە تالداۋ جاساۋ ارقىلى الداعى جىلدارعا ماقسات قويدىق. بۇعان دەيىن رەسپۋبليكالىق سەمينارلار وتكىزسەك، ەندى مىنە حالىقارالىق دەڭگەيدە موڭعوليادان كەلگەن ارىپتەستەرىمىزگە تاجىريبەمىزدى كورسەتتىك»، – دەدى مەكتەپ ديرەكتورى جازيرا اياپبەرگەن قىزى.
ال اتامەكەندەگى ءبىلىم ۇيالارىنىڭ جەتىستىگىنە ءتانتى بولعان موڭعوليادان كەلگەن قانداستار ەرەكشە تەبىرەنىپ، ءسوز الدى. سونىڭ ءبىرى موڭعوليانىڭ ءبىلىم جانە عىلىم مينيسترلىگىنە قاراستى ۇلتتىق ءبىلىم بەرۋدى زەرتتەۋ ينسيتۋتىنىڭ عىلىمي قىزمەتكەرى گۇلميرا جاۋباي قىزى «قازاقستاندا تۇراتىن از ۇلت وكىلدەرى بالالارىنا قانداي قامقورلىق جاسالادى؟» جانە «ولاردىڭ وقۋ تاربيەسىنە قالاي كوڭىل بولىنەدى؟» دەگەن ماسەلە اياسىندا ۇيىمداستىرىلعان جۇمىس توبىنىڭ قۇرامىندا بولعانىنا قۋانىشتى.
بۇگىندە موڭعوليادا ەڭ از ۇلت – قازاقتار سانالادى. ودان كەيىن تىۆا ۇلتى.
«ەگەر قۇقىمىزدى شەكتەپ، قىسىم كورسەتسە، 40 شاقتى ماماندى قازاقستانعا جىبەرمەس ەدى. سوندىقتان موڭعوليا مەملەكەتى قازاق ءتىلىنىڭ جويىلماۋىنا بەلگىلى ءبىر دەڭگەيدە جاعداي جاساپ جاتىر. ەركىندىك بار. ەندى مۇنى ءبىلىم بەرۋ سالاسىنا قالاي كىرىكتىرە الامىز؟» دەگەن تۇرعىدا تاجىريبە الماسىپ ءجۇرمىز» دەگەن گۇلميرا جاۋباي قىزى پىكىرىن بىلايشا ساباقتادى.
«ءبىز موڭعوليادا از ۇلت بالالارىن وقىتىپ جاتقان مامان سانالامىز. جۇمىس توبىندا 40 ادام بار. مەملەكەتتىك ءتىلدى جەرگىلىكتى جەردە تۇراتىن ۇلتتىڭ انا تىلىمەن قاتار وقىتاتىن ءپان مەن ءتىلدى كىرىكتىرىپ وقىتاتىن ادىستەمەسىن بايان ولگيي ايماعىندا ەكى جىل تاجىربيەدەن وتكىزدىك. الدىمەن №153 مەكتەپكە بارىپ، «وقۋشىلار ءتورت ءتىلدى قالاي مەڭگەرەدى؟»، «ۇيعىر بالالارىنا مەملەكەتتىك ءتىلدى قالاي ۇيرەتىپ جاتىر؟» دەگەن ساۋالعا جاۋاپ ىزدەپ، تاجىريبە الماستىق. بۇل مەكتەپپەن 2018 جىلدان بەرى تىعىز قارىم-قاتىناستا جۇمىس ىستەيمىز. مۇنىمەن قوسا، مۇعالىمدەر بىلىكتىلىگىن قالاي جەتىلدىرىپ جاتقانىن دا بىلدىك.
جالپى، قازاقستاندا باسقا ەتنوس، ۇلت وكىلدەرىنىڭ بالاسى ءوز انا تىلىندە ءبىلىم الادى. بۇل جاقسى ءۇردىس. ءبىز دە، ولار دا سول مەملەكەتتىڭ قۇرامىندا تاعدىردىڭ جازۋىمەن ءومىر ءسۇرىپ جاتىر. ءوز باسىم موڭعوليادا دۇنيەگە كەلگەندى قالاعان جوقپىن. ءبىراق موڭعوليانىڭ ازاماتى بولسام دا، قازاقپىن. سوندىقتان الەمنىڭ قاي بۇرىشىندا جۇرسەم دە، قازاقتىعىمدى ساقتاپ قالۋىم كەرەك. بىزگە موڭعوليا مەملەكەتى انا ءتىلىمدى، ۇلتتىعىمدى ساقتاپ قالۋعا جاعداي جاسادى. سول ءۇشىن بۇل ەلگە العىسىمدى ايتامىن. ال وسىنداعى ۇيعىرلار، وزبەكتەر، تاجىكتەر، باسقا دا ۇلت وكىلدەرى قازاقستانعا ريزاشىلىعىن بىلدىرەدى دەپ ويلايمىن»، – دەدى گۇلميرا جاۋباي قىزى.
موڭعوليا ءبىلىم جانە عىلىم مينيسترلىگى، موڭعوليا ۇكىمەتىنىڭ شەشىمدەرىن ورىندايتىن اگەنتتىگى – ءبىلىم باسقارماسىنىڭ كادرلار ءبولىمىنىڭ باستىعى زولزايا رەنسەننىڭ ايتۋىنشا، الماتىداعى №153 جانە №175 گيمنازياسى مۇعالىمدەرىنىڭ ماماندىقتى جەتىلدىرۋ باعىتىنداعى جۇمىستارىمەن تانىسىپ، ءپاندى تىلگە كىرىكتىرىپ وقىتۋ ادىستەمەسىنىڭ قالاي جۇزەگە اسىپ جاتقانىن تاجىربيە جۇزىندە كوردىك.
«ەكى مەكتەپكە كەلگەندە نەنى كوڭىلگە ءتۇيدىم؟ بىرىنشىدەن، مۇعالىمدەردىڭ وزىنە دەگەن سەنىمدىلىگى، ەڭبەگىنە دەگەن ادالدىعى، وقۋشىعا ءبىلىم بەرۋگە دەگەن قۇشتارلىعىن بايقادىم. ەكىنشىدەن، ءبىلىم ۇيالارىنىڭ قازىرگى زاماناۋي تەحنولوگيامەن جابدىقتالعاندىعى. ۇشىنشىدەن، ساباقتاردىڭ ارنايى پلاتفورما نەگىزىندە وتەتىندىگى. جۇمىس توبىمەن كەلگەن مۇعالىمدەر، ديرەكتورلار دا وسىنى ەسكەرىپ، تاجىريبەدە قولدانادى دەگەن سەنىمدەمىن. بايان ولگيي ايماعىندا قازاقتاردىڭ بالاسىن وقىتىپ جاتقان قازاق ءتىلى مەن ادەبيەتى ءپانى مۇعالىمدەرىنىڭ بىلىكتىلىگىن موڭعوليادا شىڭداۋعا، ارتتىرۋعا مۇمكىندىك جوق. وسى ماقساتتا قازاقستان مەن موڭعوليا مەملەكەتى بىرلەسىپ، 60 شاقتى ءمۇعالىمنىڭ ءبىلىمىن جەتىلدىرۋدى قولعا الساق دەگەن ۇسىنىستى ءتيىستى ورگاندارعا جەتكىزگىم كەلەدى»، – دەپ تۇيىندەدى پىكىرىن زولزايا رەنسەن.
[caption id="attachment_95173" align="alignnone" width="1600"]
№175 جاڭا عاسىر مەكتەپ-گيمنازياسى[/caption]
ا.روزىباقييەۆ اتىنداعى №153 مەكتەپ-گيمنازيا ديرەكتورى شاۆحات وماروۆ دەلەگاسيانىڭ ەقىۇ كەلىسىمى بويىنشا جانە وقۋ-اعارتۋ مينيسترلىگىنىڭ كەلىسىمىمەن جۇزەگە اسقانىن جەتكىزدى. «ءبىزدىڭ مەكتەپتە كوپ تىلدە ءبىلىم بەرۋ مودەلى 2010 جىلى ەنگىزىلدى. 10 جىل ىشىندە ورتا ازيا بويىنشا رەسۋرستىق ورتالىققا اينالىپ، 60-قا جۋىق حالىقارالىق سەمينار وتكىزدىك. بەس كۇن بويى كوپ تىلدە ءبىلىم بەرۋ بويىنشا ادىستەمەلىك ءتاسىلدى ۇيرەتەمىز. سەبەبى، بۇل بايان ولگيي ايماعىندا قازاق مەكتەپتەرىنىڭ دامۋى ءۇشىن كەرەك ءتاسىل. مۇندا قازاق بالالارى 5-سىنىپقا دەيىن قازاقشا، سوسىن موڭعولشا وقيدى ەكەن. ءبىلىم ساپاسىن كوتەرۋ ءۇشىن مەكتەپتە انا ءتىلىن ساقتاپ قالىپ، سونىڭ اياسىندا موڭعول ءتىلىن كىرگىزىپ، كوپ ءتىلدى ءبىلىم بەرەتىن مەكتەپ جاسايتىن جوسپارى بار»، – دەدى شاۆكات نياز ۇلى.
موڭعوليادان كەلگەن دەلەگاسيا الماتىدا بەس كۇن بولادى. ال بايان ولگيي ايماعىنان كەلگەن ءمۇعالىم-قانداستار ەندىگى جولى بالالارىن الىپ كەلىپ، اتامەكەندى ارالاتاتىنىن جەتكىزدى.
اياۋلىم شايماردان، Dalanews.kz
https://dalanews.kz/del-qazir/95169-monggoliiadan-kelgen-delegaciia-almaty
