الماتىنىڭ اۋاسىن جاقسارتۋعا قاتىستى جاڭا جوبا ازىرلەنىپ جاتىر. بۇل تۋرالى قالا اكىمدىگى مالىمدەدى، دەپ حابارلايدى Dalanews.kz.

قالادا جاڭا ەرەجەلەر جوباسى - "اتموسفەرالىق اۋانى قورعاۋ سالاسىنداعى ارنايى ەكولوگيالىق تالاپتاردى ەنگىزۋ تۋرالى" قۇجات ازىرلەنىپ جاتىر. قۇجات بيىل تامىزدا قوعامدىق تالقىلاۋدان ءوتتى.

"جوبانىڭ باستى ماقساتى – مەگاپوليستەگى اۋانىڭ لاستانۋ دەڭگەيىن جۇيەلى تۇردە تومەندەتۋ. "رەنەسسانس پليۋس" كومپانياسىنىڭ دەرەگىنشە، زيان شىعارىندىلاردىڭ شامامەن 60 پايىزى كولىكتەن كەلەدى. قالعان بولىگى جەكە تۇرعىن ۇيلەر، ونەركاسىپ ورىندارى، مونشا مەن كاۋاپحانا، قوعامدىق تاماقتانۋ نىسانى مەن قۇرىلىس الاڭدارى سىندى ستاسيونارلىق لاستانۋ كوزدەرىنىڭ قىزمەتىمەن بايلانىستى"، - دەپ جازىلعان حابارلامادا.

اكىمدىك مالىمەتىنشە، بۇل ەرەجەلەر جوباسى - قالانىڭ بولاشاق ەكولوگيالىق ساياساتىنىڭ بەرىك ىرگەتاسى. ونىڭ نەگىزىندە زيان شىعارىندىنى ازايتۋعا، اۋا ساپاسىن جاقسارتۋعا باعىتتالعان ناقتى قادامدار مەن تەتىكتەر كەزەڭ-كەزەڭىمەن جۇزەگە اسپاق. ۇسىنىلعان شارالاردىڭ اراسىندا ءوندىرىس وشاقتارىن جاڭعىرتۋ، ەكولوگيالىق تازا وتىن تۇرلەرىنە كوشۋ سەكىلدى ماڭىزدى باعىتتار بار.

ەرەجەلەر جوباسىن قابىلداۋ مەن جۇزەگە اسىرۋ قالانىڭ ەكولوگيالىق جاعدايىن جاقسارتىپ، الماتىلىقتاردىڭ ءومىر سۇرۋىنە بارىنشا قولايلى جاعداي تۋعىزۋعا جول اشادى.