قازاقستاندا جۇمىس ىستەپ كەلگەن Tesla Education ءبىلىم بەرۋ ورتالىعىنا قاتىستى اتا-انالاردىڭ شاعىمى كوبەيدى. الەۋمەتتىك جەلىلەردە ونداعان ۆيدەو مەن جازبا تارالىپ، كەي اتا-انالار ورتالىقتى «الاياقتىق سحەما قولداندى» دەپ ايىپتاپ وتىر. ايتۋلارىنشا، كومپانيا 300-دەن استام اتا-انامەن ۇزاق مەرزىمدى كەلىسىمشارتقا وتىرىپ، الدىن الا تولەم العانىمەن، ءبىلىم ساپاسى كۇتكەن دەڭگەيدە بولماعان، دەپ حابارلايدى Dalanews.kz.

اتا-انالاردىڭ ءبىرى الەۋمەتتىك جەلىدە وقۋ ورداسىنا شاعىمدانعان. 

"Tesla Education ءبىلىم بەرۋ ورتالىعىنىڭ الاياقتىق سحەماسىنا قاتىستى شاعىمىمدى ايتقىم كەلەدى. ولار 300-دەن استام اتا-انانى الدادى. مەن دە سولاردىڭ قاتارىندامىن. كومپانيا Instagram-داعى تارگەت جارناما ارقىلى اتا-انالاردى تارتىپ، بىر-ەكى جىلدىق كەلىسىمشارتقا وتىرعىزادى. كوپشىلىگى ءبولىپ تولەۋگە كەلىسەدى. مەنىڭ بالامنىڭ ءبىر جىلدىق وقۋ اقىسى 660 مىڭ تەڭگە بولدى. ءبىراق ۋادە ەتىلگەن ءبىلىم ساپاسى مۇلدە سايكەس كەلمەدى. ماعان ولاردىڭ وقىتۋ دەڭگەيى ۇناماعاندىقتان ءارى بالامدى الىستان تاسىپ ءجۇرۋ قولايسىز بولعاندىقتان، كەلىسىمشارتتى بۇزۋعا ءماجبۇر بولدىم"، – دەيدى اتا-انا.

شاعىم يەلەرى ورتالىقتان اقشانى قايتارۋ دا قيىندىق تۋدىرعانىن ايتادى.

كوپشىلىك شاعىمنان كەيىن Tesla Education كومپانياسىنىڭ نەگىزىن قالاۋشى ايدوس سەكسەنالى رەسمي مالىمدەمە جاساپ، ورتالىقتىڭ جۇمىسى ۋاقىتشا توقتاتىلاتىنىن حابارلادى.

ونىڭ ايتۋىنشا، كومپانيا اۋىر قارجىلىق قيىندىققا تاپ بولعان:

"مەن – ايدوس مەليس ۇلى سەكسەنالى، ورتالىقتىڭ نەگىزىن قالاۋشىسىمىن. كومپانيانىڭ قىزمەتىن ۋاقىتشا توقتاتۋعا ءماجبۇر بولىپ وتىرمىز. بۇل وتە اۋىر شەشىم. جىلدار بويى بالالارعا ساپالى جانە ءقاۋىپسىز ورتا قالىپتاستىرۋعا بار كۇشىمىزدى سالدىق. وكىنىشكە قاراي، كومپانيا ۇلكەن قارجىلىق داعدارىسقا جانە كاسسالىق تاپشىلىققا تاپ بولدى. بۇل جاعداي ادەيى جاسالعان ارەكەت ەمەس. قاتەلىكتەر بولدى، ءبىراق ولاردىڭ ەشقايسىسى قاساقانا جاسالماعان"، – دەدى ول.

سەكسەنالى بارلىق تولەمدەر تولىق قايتارىلاتىنىن مالىمدەدى:

"كليەنتتەر الدىنداعى بارلىق مىندەتتەمەلەر ورىندالادى. قالعان ساباقتارعا تولەنگەن قاراجات تولىق كولەمدە قايتارىلادى. بۇل ۋاقىت الادى، ءبىراق ءار سومانىڭ قايتارىلۋىنا جەكە ءوزىم جاۋاپ بەرەمىن. ەشكىم نازاردان تىس قالمايدى"، – دەدى ول.

ونىڭ ايتۋىنشا، اقشا قايتارۋ پروسەسىن باقىلاۋ ءۇشىن اتا-انالارعا جەكە گرافيك پەن حابارلاما جۇيەسى ازىرلەنەدى.

نەگىزىن قالاۋشى قىزمەتكەرلەردى دە قورعادى.

"ورتالىقتىڭ بارلىق قىزمەتكەرلەرى نۇسقاۋلىق بويىنشا جانە مەنىڭ تاپسىرمالارىممەن جۇمىس ىستەدى. ولار ءاردايىم ورتالىقتىڭ ادال ءارى تۇراقتى قىزمەت ەتۋىن قالادى. جاۋاپكەرشىلىكتى ءوز موينىمنان المايمىن"، – دەپ اتاپ ءوتتى ول.