قازاقستان مەكتەپتەرىنە دەنە شىنىقتىرۋ پانىنە ءجۇزۋ ساباقتارىن ەنگىزۋ جوسپارلانىپ وتىر. وقۋ-اعارتۋ مينيسترلىگى جاڭا پيلوتتىق جوبانىڭ قالاي ىسكە اساتىنىن ءتۇسىندىردى، دەپ حابارلايدى Dalanews.kz.

وقۋ-اعارتۋ مينيسترلىگى سۋدا ءجۇزۋدى ۇيرەتۋ بويىنشا پيلوتتىق جوبانى استانا مەن الماتى قالالارىندا ىسكە اسىرۋ جوسپارلانىپ وتىرعانىن حابارلادى. ساباقتار مەكتەپ باسسەيندەرى، جاقىن ماڭداعى سپورت كەشەندەرىندە دە وتكىزىلەدى. ءاربىر مەكتەپ ءۇشىن ينفراقۇرىلىم مەن لوگيستيكا مۇمكىندىكتەرى ەسكەرىلە وتىرىپ جەكە تارتىپتە بەلگىلەنەدى.

مينيسترلىكتىڭ ايتۋىنشا، العاشقى كەزەڭدە جاڭا باسسەيندەر سالۋ جوسپارلانبايدى. مەكتەپتەر قازىرگى بار سپورت كەشەندەرىمەن جۇمىس ىستەيدى.

جوبا ازىرلەۋ كەزەڭىندە تۇر. بارلىق ماسەلەلەر تولىق پىسىقتالعاننان كەيىن شامامەن 2026 جىلدىڭ قىركۇيەگىندە باستالۋى جوسپارلانىپ وتىر.

ساباقتارعا تولەم مەملەكەت بيۋدجەتىنەن قاراستىرىلماعان. جوبا Qazaq Aquatics سۋ سپورتى تۇرلەرى فەدەراسياسىنىڭ قولداۋىمەن جۇزەگە اسىرىلادى. فەدەراسيا ءوز موينىنا مىنالاردى الادى:

              باسسەيندەردى جالعا الۋ؛

              قاجەتتى قۇرال-جابدىقتارمەن قامتاماسىز ەتۋ؛

              باسسەيندەر مەن سپورت ۇيىمدارىمەن ءوزارا ارەكەتتەستىكتى ۇيلەستىرۋ.

ءاربىر مەكتەپتە جوباعا قاتىسۋ شارتتارى جەكە تارتىپتە كەلىسىلەدى.