– تۇرعىندار سانىنىڭ ءوسۋى مەن قالانىڭ دامۋ ديناميكاسىن، ياعني جاڭا قۇرىلىس اۋداندارىنىڭ اشىلۋىن ەسكەرە وتىرىپ، الدىمەن جىلۋ، ەلەكتر، سۋ بەرۋ قۋاتىن ارتتىرۋ قاجەت. وسى فاكتورلارعا ءومىر ءسۇرۋ جايلىلىعى، قالانىڭ دامۋى، ينۆەستيسيا تارتۋ تىكەلەي بايلانىستى. مەملەكەت باسشىسىنىڭ تاپسىرماسى بويىنشا وسى ماسەلەنى شەشۋ ءۇشىن ءبىرقاتار ستراتەگيالىق نىسانداردىڭ قۇرىلىسىن جۇرگىزىپ جاتىرمىز.
مىسالى، سۋعا قاتىستى ماسەلەلەردى شەشۋ ءۇشىن وتكەن جىلدان باستاپ سورعى-سۇزگى ستانسياسىنىڭ (سسس-3) قۇرىلىسىنا كىرىستىك. نىسان وسى جىلدىڭ سوڭىنا قاراي ءىشىنارا پايدالانۋعا بەرىلەدى ال 2023 جىلدان باستاپ جاڭا سسس-3 جۇمىسىنىڭ قۋاتىن ۇلعايتامىز. بۇل بولاشاق قۇرىلىس الاڭدارىن اۋىز سۋمەن قامتاماسىز ەتىپ قانا قويماي، قازىرگى سۋ بەرۋ قۋاتىن ارتتىرۋعا مۇمكىندىك بەرەدى. ماسەلەن، ءقازىر تاۋلىگىنە 300 مىڭ تەكشە مەتردى تۇتىنساق، وندا سسس-3 قۋاتى تاۋلىگىنە قوسىمشا 100 مىڭ تەكشە مەتردەن استام قۋات بەرەدى. سونداي-اق، سسس-3-كە ۇزىندىعى 18 كم سۋ بۇرعىشتى سالامىز، – دەدى التاي كولگىنوۆ.
ەلوردادا سوڭعى 3 جىلدا 8،5 ملن شارشى مەتر تۇرعىن ءۇي سالىنعانى سەبەپتى جىلۋمەن قامتۋ قۋاتىن ارتتىرۋ قاجەت. ول ءۇشىن قالا اكىمدىگى جەو-3 قۇرىلىسىن جاڭعىرتۋدان بولەك ءۇش جەرگىلىكتى گاز قازاندىعىن جوبالاۋ بويىنشا جۇمىستاردى باستادى.
گاز قازاندىقتارىنىڭ قۋاتى ساعاتىنا 1 مىڭ گيگاكالوريادان اسادى، بۇل جەو-3 قۋاتىنان 3 ەسەدەن اسا كوپ. بۇل قۇرىلىس جۇرەتىن پەرسپەكتيۆالى اۋدانداردى جىلۋمەن قامتۋعا مۇمكىندىك بەرەدى. سونداي-اق، ەلوردادا قالانى گازداندىرۋ جۇمىسى ءجۇرىپ جاتىر. الماتى جانە سارىارقا اۋداندارى تولىعىمەن گازداندىرىلدى. ول ءۇشىن 680 كم-دەن استام گاز تاراتۋ جەلىسى سالىندى. سونداي-اق، گاز تاراتۋ جەلىلەرى قالعان ەكى اۋداندا سالىناتىن بولادى.
بۇدان بولەك، كارىز تازارتۋ قۇرىلىستارىن جوبالاۋ (كتق-2) بويىنشا جۇمىستار جۇرگىزىلۋدە، سول سياقتى ەلەكتر جەلىلەرىن جاڭعىرتۋ، «اراي»، «جۇلدىز» اۋدانىندا قوسالقى ستانسيالاردى جوبالاۋ جانە رەكونسترۋكسيالاۋ بويىنشا جۇيەلى جۇمىستار جۇرگىزىلەتىن بولادى. بۇل ماسەلەلەر ءقازىر باقىلاۋىمىزدا.
سونداي-اق، قالا ءماسليحاتى تۇرعىندار سانى جىل سايىن ءوسىپ كەلە جاتقانىن، تيىسىنشە قالا كوشەلەرىنە تۇسەتىن كۇشتىڭ ۇلعايۋىن ەسكەرىپ، قالالىق كولىكتىڭ 10 جانە ودان دا كوپ جىلعا ارنالعان ءبىرىڭعاي تەحنيكالىق باقىلاۋدى ازىرلەۋگە مۇمكىندىك بەرەتىن كەشەندى كولىك سحەماسىنىڭ (ككس) تۇجىرىمداماسىن قابىلدادى. ككس سونداي-اق جاڭا كولىك كوپىرلەرىنىڭ، كولىك ايرىقتارىنىڭ سانىن ۇلعايتۋدى، كوشەلەردى كەڭەيتۋدى، قوعامدىق كولىكتى ايتارلىقتاي جاڭعىرتۋدى كوزدەيدى.
