جيىنعا كارەر يەلەرى، جەكە كاسىپكەرلەر، وبلىستىق ءماسليحاتتىڭ دەپۋتاتتارى، قوعام بەلسەندىلەرى، مەملەكەتتىك ورگانداردىڭ وكىلدەرى قاتىستى.
باسقوسۋدا وبلىستىق جەر قاتىناستارى باسقارماسىنىڭ باسشىسى ەسەمۇرات دۇزماعامبەتوۆ وڭىردە ورنالاسقان كەن ورىندارىن يگەرۋ ماسەلەلەرىنە توقتالدى.
وبلىس اۋماعىندا 258 كارەر بار. سونىڭ ىشىندە 37ء-سىنىڭ جۇمىسى توقتاپ تۇر. قالعان 221 كارەردىڭ جۇمىس جاساۋعا تولىق مۇمكىندىگى بار، الايدا 2020 جىلدىڭ ەسەبى بويىنشا ولاردىڭ 103-ىندە ءوندىرۋ جۇمىستارى مۇلدەم جۇرگىزىلمەگەن.
رەسپۋبليكا بويىنشا اكتاس تەك قانا ماڭعىستاۋ وبلىسىندا وندىرىلەدى.
اكتاس-ۇلۋتاستىڭ ءىرى كەن ورىندارى قاراماندىباس، جەتىباي جانە بەينەۋدە شوعىرلانعان. ال قۇرىلىس تاسىنىڭ (ششەبەن) كەن ورىندارى تاۋشىق، شەتپە اۋىلدارىنىڭ ماڭىندا ورنالاسقان.
ماڭعىستاۋ اۋدانى شەتپە اۋىلىنىڭ ماڭىندا 29 كارەر بار. قازىرگى تاڭدا ونىڭ 11ء-ى جۇمىس ىستەپ تۇر. جەرگىلىكتى تۇرعىندار كارەر يەلەرىنىڭ ەكولوگيالىق تالاپتاردى بۇزعانى تۋرالى بىرنەشە رەت شاعىمدانعان.
بۇل ماسەلەنى ماڭعىستاۋ وبلىسى بويىنشا ەكولوگيا دەپارتامەنتىنىڭ باسشىسى رۋسلان تۇكەنوۆ تە راستادى. ونىڭ ايتۋىنشا، ەكولوگيا دەپارتامەنتى توعىز سۋبەكتىگە قاتىستى جوسپاردان تىس تەكسەرۋ جۇرگىزگەن. ناتيجەسىندە ءتورت كارەر ۇساقتاۋ-سۇرىپتاۋ قوندىرعىلارىنىڭ قىزمەتىن سوت تارتىبىمەن توقتاتىپ، ولارعا 30،0 ملن تەڭگە كولەمىندە اكىمشىلىك ايىپپۇل سالىنعان.
سونىمەن قاتار كاسىپورىنداردىڭ باسشىلارىنا كارەرلەردەگى شاڭدى باسۋعا ارنالعان ارنايى سۋ قوندىرعىلارىمەن جابدىقتاۋ تاپسىرىلعان. بۇل ءادىس – شاڭ كولەمىن 60-80% ازايتۋعا مۇمكىندىك بەرەدى. سونداي-اق، ءوندىرىس اۋماعىنىڭ ىشكى جولدارىنا اسفالت توسەۋ جانە شاڭ بولماۋى ءۇشىن اۆتوكولىكتىڭ دوڭگەلەكتەرىنە سۋ سەۋىپ وتىرۋعا نۇسقاۋ بەرىلگەن. الايدا، بۇگىنگى كۇنگە دەيىن قويىلعان بارلىق تالاپتار ورىندالماعان.
زەرتتەۋ ناتيجەلەرى بويىنشا ايىنا ءبىر گەكتار جەرگە 58 كەلىدەن استام شاڭ تۇسسە، بۇل ەكولوگيالىق جاعدايعا اسەر ەتەدى.
جيىندا ءسوز العان ايماق باسشىسى كاسىپكەرلەردى قورشاعان ورتاعا زيان كەلتىرمەي، زاڭنامادا بەلگىلەنگەن بارلىق تالاپتاردى ساقتاي وتىرىپ جۇمىس ىستەۋگە شاقىردى.
– وكىنىشكە وراي، كەيبىر كارەر يەلەرى سانيتارلىق نورمالاردى بۇزىپ وتىر، مۇنداي فاكتىلەر بار. اۋدان اكىمدىگىنە كارەردەن شىعاتىن بارلىق جولدارعا باقىلاۋدى كۇشەيتۋدى جانە كولىكتەرگە شامادان تىس جۇك تيەلۋىنە جول بەرمەۋدى تاپسىرامىن. بارلىق مەنشىك يەلەرى وزدەرىنىڭ جاۋاپكەرشىلىگىن جانە قولدانىستاعى زاڭنامانىڭ تالاپتارىن، سونىڭ ىشىندە شاڭدى باسۋ قاجەتتىلىگىن ءبىلۋى كەرەك. كارەر يەلەرىنىڭ نەمقۇرايلى قاراۋىنان ىرگەلەس جاتقان ەلدى مەكەندەردىڭ تۇرعىندارى زارداپ شەگۋدە. سوندىقتان باقىلاۋدى كۇشەيتۋ كەرەك. – دەدى نۇرلان نوعايەۆ.
جيىن سوڭىندا ايماق باسشىسى جاۋاپتى تۇلعالارعا ءبىرقاتار ناقتى تاپسىرمالار جۇكتەدى.
