سوڭعى جىلدارى كۇرشىم اۋدانىنداعى مارالدى اۋىلىنىڭ مەكتەبىندە وقۋشىلار سانى ازايىپ بارادى. ءۇش جىل بۇرىن 126 بالا بولسا، ءقازىر 85 بالا قالعان. ال 1993 جىلى سالىنعان مەكتەپ عيماراتى 600 وقۋشىنى سىيعىزا الماعان ەدى.
الەۋمەتتىك جەلىلەردە تاراپ جاتقان شقو-داعى قازبا بايلىقتارىن پايدالانۋشىلارعا قاتىستى سىني سيپاتتاعى ءتۇرلى اقپاراتقا بايلانىستى جەرگىلىكتى ب ا ق وكىلدەرى مەملەكەتتىك ورگاندار مەن ساراپشىلارمەن كەزدەسۋ وتكىزگەن بولاتىن.
اتالعان جيىندا شقو ءبىلىم باسقارماسىنىڭ باسشىسى مارالدى اۋىلىنداعىمەكتەپتە ءبىلىم الۋشىلار سانىنىڭ جىلدان-جىلعا قىسقارىپ بارا جاتقانىن مالىمدەدى.
– سوڭعى ءۇش جىلدا مارالدى اۋىلىنىڭ ورتا مەكتەبىندە بالالار سانىنىڭ ازايۋى بايقالادى. ايتالىق، ءۇش جىل بۇرىن 126 بالا بولسا، وتكەن وقۋ جىلىندا 105 بالا بولعان. قازىرگى كەزدە 85 بالا بار. ونىڭ ىشىندە 68 بالا – 1-11 سىنىپ وقۋشىلارى، قالعاندارى – شاعىن ورتالىقتىڭ تاربيەلەنۋشىلەرى. بالالار سانى نەگە كەمىپ بارادى؟ ويتكەنى، حالىقتىڭ اۋىلدان كوشىپ كەتۋى جالعاسىپ جاتىر، بىلاي جالعاسا بەرسە اۋىلدا ەشكىم قالماۋى دا مۇمكىن، – دەيدى شقو ءبىلىم باسقارماسىنىڭ باسشىسى يننەسا چەرنىشيەۆا.
سالا باسشىسىنىڭ پىكىرىنشە، حالىق كوشۋىنە الەۋمەتتىك جاعداي ىقپال ەتەدى. ادامدار ءۇشىن ءومىردىڭ ساپاسى ماڭىزدى تۇرمىس ساپاسى بىلىمنەن بولەك وزگە سالالارعا دا بايلانىستى. ماسەلەن، وكىنىشكە قاراي، قازىرگى كەزدە اۋىلداعى كوشەلەر مەن جولداردىڭ جاعدايى كوڭىل كونشىتپەيدى دەۋگە بولادى.
– اتاپ وتەرلىگى، اۋىلداعى مەكتەپ 1993 جىلى سالىنعان، ول 400 ورىنعا شاقتالعان عيمارات. وندا 600 وقۋشىعا دەيىن ءبىلىم الا الادى. اۋىلدىڭ بۇل رەتتە كەلەشەگى بار. سوندىقتان مارالدى تارتىمدى ەلدىمەكەنگە اينالۋعا ءتيىس، – دەپ ويىن ءبىلدىردى باسقارما باسشىسى. – اۋىلدا بالاباقشا جوق، تەك بالالارعا ارنالعان ويىن الاڭى عانا بار. بۇگىنگى تاڭدا بالالاردىڭ جان-جاقتى دامۋى ءۇشىن بارلىق جاعداي جاساۋ تۋرالى مىندەت قويىلىپ وتىر، ياعني ساپالى ءبىلىم بەرۋ ورتاسىن قۇرۋ قاجەت. بۇل – مەملەكەت باسشىسىنىڭ دا، وقۋ-اعارتۋ مينيسترلىگىنىڭ دە تالابى.
مەكتەپتە ءقازىر 49 اۋىل تۇرعىنى ەڭبەك ەتۋدە. ونىڭ ىشىندە 24ء-ى – پەداگوگ، وزگەلەرى – قوسالقى قىزمەتكەرلەر. ياعني، مەكتەپ اۋىلدىقتار ءۇشىن ەڭ ۇلكەن جۇمىس ورنى بولىپ وتىر.
